Chto moža stać nastupnym premjer-ministram Biełarusi?
Padčas narady pa kompleksnym raźvićci Oršy kiraŭnik Biełarusi Alaksandr Łukašenka rezka raskrytykavaŭ pracu ŭrada, jaki, pa jahonych słovach, «pa-pafihiscku stavicca da daručeńniaŭ prezidenta».
«Na hetym tydni ŭnieści prapanovy pa źmienie ŭsiaho kiraŭnictva ŭrada, usioj viarchuški. Chopić hladzieć im u rot, i jany buduć nam raskazvać, jak im ciažka, jak im składana», — skazaŭ Łukašenka, źviartajučysia da kiraŭnički Administracyi prezidenta Natalli Kačanavaj.
Takim čynam, užo najbližejšym časam možna čakać vialikich kadravych pierastanovak, uklučajučy kiraŭnika ŭrada. Andrej Kabiakoŭ zajmaje svaju pasadu ad śniežnia 2014 hoda.
«NN» prapanuje ahlad mahčymych kandydataŭ na dadzienaje miesca. Za časy Łukašenki premjerami pabyvała ŭžo siamiora čałaviek. I ŭsie jany byli, jak pryniata kazać, «mocnymi haspadarnikami». Tamu varyjanty, što ŭrad uznačalić Ihar Šunievič, Uładzimir Makiej ci Valeryj Vakulčyk, byli b vialikaj navacyjaj.
Naturalna, što nijakaj harantyi taho, što mienavita niechta z našaha śpisu stanie asobaj №2 u krainie, niama. Tym nie mienš kazać ab peŭnych kandydatach možna.
Andrej Kabiakoŭ
Fota Siarhieja Hudzilina.
Łukašenka ŭsio ž pieradumvaje i nie adpraŭlaje Kabiakova staršynioj Rahačoŭskaha rajvykankama. Taki ž varyjant absalutna imavierny. Nu paharačyŭsia, skazaŭ na emocyjach, zaŭtra ŭsie zabuducca. A Kabiakoŭ rupliva robić svaju pracu. Hetaha čałavieka zusim nie zapadozryš u palityčnych ambicyjach, jon blaknie navat na fonie dvuch inšych papiarednich premjeraŭ Sidorskaha i Miaśnikoviča. Kabiakoŭ, jaki papracavaŭ pasłom u Maskvie, dobra viedaje rasijskija paradki. Jak damovicca z Kramlom pa tym ci inšym pytańni. Na Zachad premjer nie duža hladzić, ale dla hetaha ŭ Łukašenki jość Makiej.
Vasil Maciušeŭski
Fota Siarhieja Hudzilina.
Pieršy vice-premjer rodam z toj samaj Oršy, jakaja, mahčyma, budzie kaštavać miesca premjera Kabiakovu. Maciušeŭski adpaviadaje duchu času ŭ svaich manierach, adzieńni, razmovach. Jon umieje padbirać modnyja pinžaki i tufli, idealna razmaŭlaje pa-anhlijsku. Strukturnyja reformy ad Maciušeŭskaha pravodziacca vielmi pavoli. I tut pytańnie voś u čym: ci nie dazvolili, ci vice-premjer sam zbajaŭsia, paličyŭšy za lepšaje pravodzić nievialikija źmieny, nie łamajučy ŭsiu sistemu całkam.
Kirył Rudy
Fota Siarhieja Hudzilina.
A heta akurat moh by być radykalny varyjant. Pasoł Biełarusi ŭ Kitai ŭžo daŭno zaklikaje kiraŭnictva krainy sieści na «finansavuju dyjetu», kab azdaravić ekanomiku. Naprykład, Rudy prapanuje vyvieści pradpryjemstvy z padnačaleńnia ministerstvaŭ, kab jany samastojna akunulisia ŭ kankurentnaje asiarodździe. Na jahonuju dumku, pakul u krainie nie źjavicca šyroki płast ułaśnikaŭ, u ekanomicy nie źjaviacca pravilnyja stymuły dla raźvićcia. Idei Rudaha ŭ svoj čas dla Łukašenki akazalisia zanadta revalucyjnyja, tamu jaho sasłali pasłom u Kitaj. Mahčyma, ciapier paśjans laža pa-inšamu.
Biada ŭ tym, što Rudy nikoli nie mieŭ u padnačaleńni vialikaj kolkaści ludziej. A Łukašenku ŭsio ž treba vopytny haspadarnik.
Siarhiej Rumas
Fota Siarhieja Hudzilina.
Na čas vice-premjerstva Siarhieja Rumasa prypaŭ finansavy kryzis 2011 hoda. Sam vice-premjer zapomniŭsia niekatorymi svaimi rynkavymi prapanovami, a taksama pierapałkaj z pamočnikam prezidenta pa ekanomicy Siarhiejem Tkačovym. Utrymacca doŭha na pasadzie Rumas nie zmoh. Jaho adpravili ŭ dastatkova spakojnaje kresła staršyni praŭleńnia Banka raźvićcia, a taksama jon zastaŭsia kiravać Biełaruskaj fiederacyj futboła. Rumas moh by stvaryć pazityŭny vobraz novaha ŭrada, jon abajalny i ŭmieje trymacca pierad kamieraj. Pry hetym jon nie padobny da čałavieka, jaki hatovy pravodzić «šokavuju terapiju».
Mikałaj Snapkoŭ
Fota Siarhieja Hudzilina.
Mahiloŭski ekanamist Snapkoŭ vielmi daŭno ŭ kiroŭčaj abojmie. Jon pieražyŭ šmatlikija kadravyja pieratrusy. Snapkoŭ byŭ ministram ekanomiki, ciapier adkazvaje za hety napramak u Administracyi prezidenta. Heta razumny čynoŭnik, jaki maje reputacyju aściarožnaha libierała. Na piaredni kraj Snapkoŭ nie imkniecca vysoŭvacca. Palityčnych zajavaŭ nie robić nikoli. Snapkoŭ idealny vincik hetaj sistemy. Pracu na čale ŭrada jon by jaŭna nie zaparoŭ, ale ci byŭ by jon premjeram rostu, skazać vielmi składana.
Alaksandr Kosiniec
Fota kp.by.
Ciapier Kosiniec zajmaje choć i nie duža publičnuju, ale dastatkova važnuju pazicyju pamočnika prezidenta. Miedyk pa adukacyi, Kosiniec šmat hadoŭ kiravaŭ Viciebskaj vobłaściu. Jon byŭ kiraŭnikom Administracyi prezidenta i vice-premjeram. Zdajecca, što Kosiniec byŭ by hatovy ŭziacca za lubuju pracu i vierna słužyć kiraŭnictvu.
Siarhiej Sidorski
Fota souzveche.ru.
Davajcie razhledzim i takija varyjanty. Tym bolš, što apošnim časam cyrkulujuć čutki, što Sidorski dapracoŭvaje apošnija dni ministram pramysłovaści Jeŭrazijskaj ekanamičnaj kamisii. Nu, pryznačali niekali Malcava dvojčy ministram abarony, a Rusaha — dvojčy ministram sielskaj haspadarki. Čamu b i z premjeram nie paŭtaryć taki fokus? Sidorski, mabyć, jašče nie zabyŭsia na staruju pracu i chutka zmoh by ŭvajści ŭ staruju baraznu.
Anatol Isačenka
Fota pravo.by.
Siarod «hubiernataraŭ» ciapier niama jarkich asob kalibru Siamiona Šapiry ci Barysa Batury. Navat ciažka schodu ŭzhadać, chto ž tam kiruje Bresckaj ci Viciebskaj vobłaściu. Adznačyć chiba možna staršyniu Minskaha abłvykankama Anatola Isačenku. Hety čałaviek uznačalvaŭ łukašenkaŭski saŭhas «Haradziec». Šmat pracavaŭ na roznych pasadach u Mahiloŭskaj vobłaści. Takija kadry lubić Łukašenka. Admietna, što mienavita ź Isačenkam sustreŭsia Łukašenka paśla «insultu», jaki prypisali jamu rasijskija ŚMI.
Zhadany vyšej Šapira, moža, i paciahnuŭ by ŭrad, ale ŭžo doŭha siadzić zusim biez pracy.
Alena Kudraviec
Fota kp.by.
Administracyjaj prezidenta žančyna kiruje dastatkova badziora. Pracaj Kačanavaj Łukašenka publična nie aburaŭsia. Čamu nie zrabić i premjeram pradstaŭnicu najlepšaj pałovy čałaviectva? Mabyć, na takuju pasadu mahła padyści kiraŭnička Biełaruskaj kalijnaj kampanii Alena Kudraviec. Dośviedu jana ŭžo nabrałasia, ciapier moža iści na pavyšeńnie.
