Nieviadomyja vam sposaby kantracepcyi: ad ekskremientaŭ krakadziła da sučasnych śviečak
«Źmiašajcie hudron, kamiennuju sol, sok cybuli i zmažcie pałavy člen» — takija mietady kantracepcyi prapanoŭvali ŭ XIV stahodździ isłamskija daktary. A pieršy sposab zaściarohi ad ciažarnaści ŭvohule byŭ apisany jašče ŭ Biblii — pierarvany pałavy akt, jaki niekatoryja praktykujuć i siońnia, choć hiniekołahi nie rajać dy i ŭvohule nie ŭsie daktary biarucca nazyvać heta kantracepcyjaj, bo tut ciažka kazać pra efiektyŭnaść — prosta sprava vypadku.
Fota Pxhere.com
Hałoŭny pazaštatny dziciačy hiniekołah Ministerstva achovy zdaroŭja Biełarusi Aksana Ivaniškina-Kudzina doŭhi čas zajmajecca daśledavańniem histaryčnaha aśpiektu dalikatnaj temy kantracepcyi.
«My možam udaskanalvać peŭnyja techničnyja momanty, ale sutnaść zastajecca toj ža: va ŭsie stahodździ isnavała prablema niežadanaj ciažarnaści. I jana budzie isnavać, pakul isnuje čałaviectva, — tłumačyć doktar pryčyny svajoj daśledčyckaj zacikaŭlenaści. — I voś ciapier, kali miedycyna i farmakałohija znachodziacca na vysokim, prahresiŭnym uzroŭni, my pavinny viedać, jak ža minimizavać pabočnyja efiekty. Zadača daktaroŭ — danieści da žančyny toje, što luby srodak kantracepcyi lepšy, čym pieraryvańnie ciažarnaści.
Viadoma, siońnia nichto nie budzie spryncavacca vocatam, ale histaryčnyja źviestki kažuć nam pra toje, što i ŭ Siaredniavieččy viedali pra śpiermicydy — rečyvy, što źmianiajuć chimičnaje asiarodździe ŭ pochvie i razburajuć śpiermatazoidy. Mahčyma, heta padasca dziŭnym, ale ŭsie srodki kantracepcyi, jakija isnujuć ciapier, byli vynajdzienyja jašče ŭ Staražytnym Jehipcie».
Miechaničnyja srodki kantracepcyi
«Heta preziervatyvy, mazi, kremy, śviečki, spryncavańnie. U Staražytnym Jehipcie žančyny karystalisia vahinalnymi śviečkami, jakija ŭ toj čas rabilisia ź miodu i karbanatu natryju.
U Jehipcie byli vyrablenyja i pratatypy preziervatyvaŭ. Jany słužyli ŭpryhožańniem dla mužčyn i ŭjaŭlali saboj nievialičkija kaŭpaki z kišak abo mačavych burbałak žyvioł z kaštoŭnymi kamianiami, što paśla śmierci pakidali razam ź niabožčykam. Pieršy viadomy nam preziervatyŭ byŭ skuranym i nasiŭ jaho nie chto inšy jak faraon Tutanchamon», — raspaviadaje hiniekołah.
Viadoma, što ŭ Staražytnaj Rusi rabili spryncavańnie mačoj, svajoj abo partniora. Heta vyhladaje dzikunstvam, ale kali ŭspaminać Staražytny Jehipiet, dzie žančynam unutr uvodzili ekskremienty krakadziłaŭ, to pieršy varyjant užo nie zdajecca takim žudasnym. Paźniej žančyny stali ŭvodzić unutr tampony, zmočanyja ŭ vocacie.
«Jašče nie tak daŭno žančyny narakali na śviečki. Maŭlaŭ, treba dakładna praličvać, kali adbudziecca pałavy akt, uvodzić śviečku roŭna za paŭhaziny. Taja pačynała pienicca, vyciakać. Jaki tut seks? Tut užo nie da seksu. Siońnia ž śviečki inšyja, padładžanyja pad rytm žančyny», — źviartaje ŭvahu Aksana Ivaniškina-Kudzina.
Sučasnyja žančyny najčaściej vykarystoŭvajuć śviečki dla kantracepcyi, kali jość supraćpakazańni da ŭnutrymatačnaj ci pieraralnaj kantracepcyi, u łaktacyjnym i paślarodavym pieryjadzie, paśla pierapynieńnia ciažarnaści, pry nierehularnaj intymnaj blizkaści, u pieryjad mienapaŭzy, a taksama padčas pierapynku va ŭžyvańni pieraralnych kantraceptyvaŭ ci padčas zamieny ŭnutrymatačnaha supraćzačatkavaha srodku. Śviečki mohuć prymianiacca jak samastojna, tak i ŭ spałučeńni ź inšymi kantraceptyvami (naprykład, z preziervatyvam), heta musić być prapisana ŭ instrukcyi. Taksama ich možna vykarystoŭvać padčas ciažarnaści (znoŭ ža, heta musić być prapisana ŭ instrukcyi).
UNP 102377403. Pradstaŭnictva Sumiesnaha ŭkrainska-ispanskaha pradpryjemstva ŭ formie tavarystva z abmiežavanaj adkaznaściu «Śpierko Ukraina» (Ukraina) u Respublicy Biełaruś.
Barjernyja srodki kantracepcyi
«Pieršyja zhadki pra ŭnutrymatačnuju kantracepcyju taksama źjavilisia ŭ staražytnaści. Jość śviedčańni, što ŭ Japonii, naprykład, najbolšaj papularnaściu karystaŭsia sposab źmiaščeńnia ŭ matku srebnych šarykaŭ. U tym ža Jehipcie ŭ mumijach žančyn u połaści matki znachodzili śpirali z tryśniahu», — kaža hiniekołah.
Siońnia isnuje ahromnistaja kolkaść śpiralaŭ: dla maładych i žančyn va ŭzroście, dla tych chto naradžaŭ i chto nie, tyja, što ŭtrymlivajuć srebra, zołata, miedź, i tyja, što nie ŭtrymlivajuć mietałaŭ, jość ź lačebnym efiektam.
Aralnyja kantraceptyvy
«Na harmanalnyja tabletki, jak ich nazyvajuć u narodzie, narakańni buduć da taho času, pakul jany buduć isnavać», — adznačaje Aksana Ivaniškina-Kudzina.
Ciapier niama aralnych kantraceptyvaŭ, jakija b vykarystoŭvalisia tolki dla taho, kab zaścierahčy žančynu ad ciažarnaści. U ich zakładzienyja i lačebnyja funkcyi. Jany dapamahajuć pry parušeńniach mienstrualnaha cykła, pry niejkich inšych hiniekałahičnych zachvorvańniach.
«Vykarystańnie takich tabletak vymahaje peŭnaj adkaznaści ad žančyny, bo ich pryjom nielha prapuskać. Žančyna i jaje doktar biaruć na siabie abaviazki, kali doktar pryznačaje takija tabletki, a žančyna pačynaje ich užyvać. Bo, jak havorycca, alerhija byvaje navat na vadu, — tłumačyć hiniekołah. — Jość tut i inšy bok.
Ujavim, što žančyna prymaje aralnyja kantraceptyvy z 20 hadoŭ. Jana ich pje, pje, a potym praz hadoŭ 10 zadumvajecca pra ciažarnaść. Pry doŭhim užyvańni aralnych kantraceptyvaŭ funkcyja jaječnikaŭ moža sasłabieć. Tamu vykarystoŭvać hetyja srodki treba z rozumam. Niahledziačy na toje, što ŭ ich samaja vysokaja kantraceptyŭnaja efiektyŭnaść (kala 99 %), jany nie ŭsim pasujuć».
Preziervatyŭ — najlepšy siabar maładości
«Niezdarma jašče ŭ 1504 hodzie italjanski anatam Fałopia padrabiazna apisvaŭ jak srodak zaściarohi ad raspaŭsiudžanaj tady ŭ Jeŭropie chvaroby — sifilisu — preziervatyŭ: ilniany miašečak, prapitany roznymi travami i solami. I na siońnia ja nie baču lepšaha srodku abarony, čym preziervatyŭ, asabliva dla moładzi. Tamu treba ŭkładvać u hałavu maładym ludziam, što ich najlepšy siabar — preziervatyŭ. Pa-pieršaje, tamu što jon efiektyŭna zaścierahaje ad niepažadanaj ciažarnaści. A pa-druhoje, preziervatyŭ moža abaranić i ad roznych pałavych infiekcyj. Da taho ž jon nakładvaje adkaznaść na aboich partnioraŭ, što ŭmacoŭvaje adnosiny», — davodzić Aksana Ivaniškina-Kudzina.
Na ščaście, samyja dziŭnyja staražytnyja sposaby kantracepcyi zastalisia ŭ staražytnaści, i siońnia my majem efiektyŭnyja i biaśpiečnyja srodki ad niepažadanaj ciažarnaści. Karystacca imi možna śmieła, tolki nie zabudźcie papiarednie prakansultavacca z doktaram, jon dapamoža adšukać toj varyjant, jaki najlepš padychodzić vašamu arhanizmu.
