Čačnia addaje pašanu čałavieku, jaki zastreliŭ pałkoŭnika Budanava: tysiačy mašyn źjechalisia ŭ jaho rodavaje sielišča
48-hadovy Jusup Temierchanaŭ, zabojca pałkoŭnika Budanava, pamior 3 žniŭnia ŭ sibirskaj kałonii. Aficyjnaja viersija — «ad chraničnych zachvorvańniaŭ». I ad 3 žniŭnia ŭ sielišča Hiełdahan, dzie budzie pachavany Temierchanaŭ, jeduć tysiačy ludziej.
Rasijski niezaležny sajt «Kavkazskij uzieł» piša, čto na ŭjeździe ŭ Hiełdahan uźnikli vializnyja zatory, ludzi jeduć z usich rajonaŭ Čačni i Inhušecii. A jašče tysiačy ludziej vykazvajuć spačuvańni svajakam pamierłaha praz WhatsApp — samy papularny mesendžar na Kaŭkazie, adznačaje rasijski niezaležny sajt «Mieduza».
Pałkoŭnik Budanaŭ staŭ simvałam pakut čačencaŭ u časie dźviuch vojnaŭ za niezaležnaść, druhaja ź jakich była kaŭkazcami prajhranaja. Budanaŭ zabiŭ, a niekatoryja miarkujuć, što i zhvałciŭ 18-hadovuju Elzu Kunhajevu ź siała Tanhi.
Kali historyja nabyła rozhałas, sud nad im ciahnuŭsia try hady. Urešcie jaho pryznali vinavatym.
Vyzvaliŭsia jon daterminova. Ale ŭ 2011 hodzie ŭ Maskvie jaho zabili čatyrma kulami na vychadzie z nataryjalnaj kantory, dzie jon afarmlaŭ dazvoł na vyjezd svajoj niepaŭnaletniaj dačce.
U zabojstvie Budanava vinavatym pryznali Temirchanava. Sam jon viny tak i nie pryznaŭ. Piać hadoŭ jon pravioŭ u roznych turmach. Dla čačencaŭ, navat samych łajalnych Maskvie, jon zastaŭsia hierojem.
Kadyraŭski telekanał «Hroznyj» paviedamlaje: «Užo druhi dzień u dvary Temierchanavych bieśpierapynnaja płyń žycharoŭ Čačenskaj Respubliki i susiednich rehijonaŭ, jakija pryjšli vykazać spačuvańni svajakam zahinułaha. Taksama słovy spačuvańnia vykazvajuć šmatlikija karystalniki sacyjalnych sietak».
Samy viadomy rasijski bajec źmiešanych adzinaborstvaŭ Chabib Nurmahamiedaŭ vykłaŭ fatahrafiju Temierchanova ŭ svaim instahramie i napisaŭ: «Niachaj Ałach daruje tvaje hrachi».
Čačenka Zara Murtazalijeva, jakaja žyvie ŭ Paryžy, apublikavała videa z cyrymonii raźvitańnia i napisała: «Kožny pamre, ale nie kožny budzie žyć u pamiaci naroda. Svaich hierojaŭ narod vybiraje sam».
Dziasiatki tysiač ludziej vitali kartež ź ciełam Temierchanava vokličami «Ałach akbar» pa darozie z aeraporta ŭ radzinnaje sielišča.
