Labiedźku aštrafavali za pres-kanfierencyju kala «Pajedziem, pajadzim»
Za ŭdzieł u presavaj kanferencyi kala bramy restaracyi «Pajedziem, pajadzim», jakuju sud nazvaŭ pikietavańniem, Anatola Labiedźku aštrafavali na 50 bazavych — 1225 rubloŭ. Sudździa Viktoryja Šabunia pryznała jaho vinavatym pavodle č. 3 art. 23.34 KoAP «Parušeńnie paradku arhanizacyi ci praviadzieńnia masavaha mierapryjemstva», paviedamlaje «Radyjo Svaboda».
Major milicyi Ihar Čarniaŭski, jaki składaŭ pratakoł, nie źjaviŭsia na sud, jon u adpačynku.
Anatol Labiedźka patłumačyŭ, što atrymaŭ zaprašeńnie ŭziać udzieł u pres-kanferencyi. Jon praštudziravaŭ Zakon ab ŚMI i nie znajšoŭ tam artykuła, jaki b rehlamentavaŭ miesca praviadzieńnia presavaj kanferencyi. Jon taksama spasłaŭsia na prykład z Alaksandram Łukašenkam, jaki pryjaždžaje na pole, pobač žurnalisty, i jon adkazvaje na ich pytańni.
Pavodle Labiedźki, na pres-kanferencyi chacieli raskazać žurnalistam, što ŭ budaŭnictvie restaracyi «Pajedziem, pajadzim» jość vialiki karupcyjny składnik.
U sudzie prahledzieli i aperatyŭny videazapis presavaj kanferencyi, pradstaŭleny milicyjaj.
Heta pieršy ŭ historyi praces, dzie sudziać za pres-kanferencyi, — skazaŭ Labiedźka i pavinšavaŭ spadaryniu Šabuniu, što jana pieršaja sudździa, jakaja sudzić za pres-kanferencyju i infarmavańnie.
Sudździa začytała rapart milicyjanta Čarniaŭskaha: «Labiedźka demanstratyŭna stajaŭ kala bramy na fonie bieł-čyrvona-biełaha ściaha, pieraškadžaŭ prajezdu transpartu». I vyniesła rašeńnie — štraf u 50 bazavych vieličyniaŭ, abo 1225 rubloŭ. Prysutnyja adreahavali vokličami «Hańba!».
Rašeńnie sudu Anatol Labiedźka budzie abskardžvać.
