Sprava REP: Śledčy DFR śćviardžaje, što Fiadynič prysvojvaŭ hrošy
Na čaćviorty dzień pracesu nad liderami prafsajuzu REP Hienadziem Fiadyničam i Iharam Komlikam u jakaści śviedki praz Skype dapytali śledčaha, nie pakazvajučy jahonaha tvaru, piša radyjo «Svaboda».
Supracoŭnik Departamentu finansavych raśśledavańniaŭ Siarhiej Dźmitryjeŭ zajaviŭ sudu, što staršynia prafsajuzu REP — padsudny Hienadź Fiadynič mieŭ rachunak u banku SEB u Litvie z 2012 hodu.
Jakim čynam byli atrymanyja hetyja źviestki, ci pradstaŭlaŭ bank vypisku — śviedka nie paviedamiŭ, spasłaŭšysia na tajamnicu śledztva.
Hienadź Fiadynič chadajničaŭ, kab supracoŭnika DFR Dźmitryjeva, jaki kiravaŭ pieratrusami ŭ žniŭni 2017 hodu ŭ ofisie prafsajuzu REP, dapytali ŭ sudzie asabista.
«Jamu tut ničoha nie pahražaje, i jahonym blizkim taksama. My nie arhanizavanaja kryminalnaja hrupoŭka, a ludzi Biełarusi», — skazaŭ lider prafsajuzu REP.
Ale sudździa Maryna Fiodarava chadajnictva adchiliła.
Siarhiej Dźmitryjeŭ praz Skype raspavioŭ, što na rachunak Fiadyniča ŭ banku SEB byli pieraličanyja 140 tysiač eŭra i 17 tysiač dalaraŭ. Srodki pastupali ad dackaha prafsajuzu ZF štomiesiac. Hrošy nibyta zdymali ŭ Vilni i pieravozili roznyja ludzi pa 5 tysiač, a Fiadynič i Komlik ich potym zabirali.
Pavodle śledčaha DFR, z 2011 hodu Fiadynič 160 razoŭ pierasiakaŭ miažu: «Hrošy vyvozilisia nibyta dla prafsajuznaj dziejnaści, a nasamreč vykarystoŭvalisia ŭ asabistych metach».
Na pytańnie advakataŭ, jakim čynam była atrymanaja vypiska banku, ci pradstaŭlaŭ jaje sam bank, Dźmitryjeŭ adkazaŭ, što heta tajamnica.
«Heta sakretnaja infarmacyja»
Na pytańnie, čamu Dźmitryjeŭ śćviardžaje, što hrošy vykarystoŭvalisia ŭ asabistych metach, śledčy adkazaŭ, što tak skazali śviedki. Na bolšaść udakładnialnych pytańniaŭ advakataŭ i abvinavačanych supracoŭnik DFR adkazvaŭ: «Heta sakretnaja infarmacyja».
Śledčy dadaŭ, što častku infarmacyi znajšli pry pieratrusach, a taksama zdabyli ź pierapiski praz elektronnuju poštu.
Kali Hienadź Fiadynič pacikaviŭsia, čamu Dźmitryjeŭ śćviardžaje, što hrošy jon vydatkavaŭ na asabistyja mety, supracoŭnik DFR adkazaŭ: «Heta vyniki aperatyŭna-vyšukovaj dziejnaści».
Fiadynič prosić udakładnić: «Kudy ja patraciŭ hrošy, jakija nibyta prysabiečyŭ?»
Dźmitryjeŭ na heta adkazaŭ: «Vam vidniej».
Pavodle Fiadyniča, niama peŭnaści i adnosna paštovaj skryni, jakaja nibyta naležała Iharu Komliku. U pratakole śledztva ŭkazana, što punkt dostupu pa ŭvachodnaj i vychodnaj karespandencyi pa skryni nia vyznačany. A tamu nie dakazana, što skrynia naležyć Komliku.
Kali abvinavačanyja zapytalisia, čamu mnohija śviedki skardzilisia na cisk i zapałochvańni padčas dopytaŭ u DFR, ci było takoje, Siarhiej Dźmitryjeŭ adkazaŭ: «Nie, u DFR tak nia robiać», paviedamlaje pravaabarončy centar «Viasna».
