U Baranavičach baćki pieršakłaśnikaŭ damahlisia, kab biełaruskamoŭny kłas stvaryli ŭ himnazii, a nie ŭ zvyčajnaj škole
Baćki budučych pieršakłaśnikaŭ. Fota: Intex-press
Dva hady žychary Baranavič dabivalisia stvareńnia biełaruskamoŭnaha kłasa ŭ himnazii, što znachodzicca ŭ centry horada. Raniej ułady prapanoŭvali im inšyja škoły ŭ mikrarajonach.
Adkryć biełaruskamoŭny kłas u himnazii prapanavaŭ Siarhiej Puzikaŭ, kiraŭnik upraŭleńnia pa adukacyi harvykankama, paśla sustrečy baćkoŭ z kiraŭnictvam horada 25 lipienia.
30 lipienia va ŭpraŭleńni pa adukacyi pryniali kančatkovaje rašeńnie stvaryć kłas na bazie himnazii №4. Pieršy hod dzieci buduci navučacca ŭ sadku №50, jaki raźmiaščajecca ŭ Paŭnočnym mikrarajenie. Z druhoha kłasa zaniatki buduć prachodzić na bazie himnazii.
— Nas taki varyjant zadavalniaje. Pieršyja kłasy himnazii buduć navučacca taksama ŭ sadkach, i my nie vyklučeńnie, — raspaviała Intex-press Taćciana Małaščanka, maci adnoj z budučych pieršakłaśnic.
Ciapier baćki azadačanyja pytańniem, chto moža stać pieršaj nastaŭnicaj u ich dziaciej. Va ŭpraŭleńni pa adukacyi ich upeŭnili, što ŭ himnazii jość 6 nastaŭnikaŭ, jakija mohuć navučać pa-biełarusku ich dziaciej.
— Jakaść adukacyi ŭ himnazii vielmi dobraja, tamu spadziajemsia, što pytańniaŭ da nastanika ŭ nas nie budzie, — skazała Taćciana Małaščanka.
Kali vy taksama z Baranavič i žadajecie, kab vašyja pieršakłaśniki navučalisia na biełaruskaj movie, źviartajciesia ŭ himnaziju №4. Pakul zajavy ŭ taki kłas padali 9 čałaviek, paviedamlaje intex-press.by.