Tryźnieńnie «Niazyhara» nie spynić: Paźniak i Makiej patajemna dapamahajuć adzin adnamu
Rasijski telehram-kanał «Niezyhaŕ», jaki nie tak daŭno pisaŭ pra «insult» u Alaksandra Łukašenki, praciahvaje vydavać paviedamleńni na biełaruskuju tematyku.
Čytajcie taksama: Rasijski TASS zapuściŭ kačku, što ŭ Łukašenki insult, a paśla apublikavaŭ abviaržeńnie
Na hety raz prapahandyscki telehram-kanał, jaki pazicyjanuje siabie jak insajdarski, napisaŭ zusim nievierahodnuju «analityku» — nibyta Zianon Paźniak i Uładzimir Makiej dapamahajuć adzin adnamu.
«Niezyhaŕ» śćviardžaje, što Paźniak maje ŭpłyvovyja suviazi siarod zachodnich palitykaŭ, i biełaruski MZS u 2016 hodzie praz dyjasparu sprabavaŭ źviazacca z Paźniakom. Nibyta Paźniak vyjšaŭ na kantakt i sustreŭsia z pradstaŭnikom MZS. Telehram-kanał śćviardžaje, što ŭ vyniku hetaj sustrečy byli nastupnyja damoŭlenaści:
1. Paźniak dapamahaje Makieju naładzić suviazi z zachodnimi palitykami.
2. Makiej dapamahaje Paźniaku ŭźniać u biełaruskim hramadstvie temy, blizkija da idej BNF.
«Niezyhaŕ» miarkuje, što mienavita ŭ vyniku hetych damoŭlenaściej u biełaruskim hramadstvie stała znoŭ abmiarkoŭvacca tema Kurapat. Na dumku telehram-kanała, mienavita takim čynam, praz «nacyjanalistaŭ», Makiej sprabuje zaručycca padtrymkaj zachodnich palitykaŭ.
Takoje fantastyčnaje tryźnieńnie ad rasijskaha telehram-kanała možna patłumačyć tolki tym, što albo «Niezyhaŕ» śviadoma raspaŭsiudžvaje fejki pra Biełaruś u prapahandysckich metach, albo telehram-kanał nie maje nijakich surjoznych krynic i insajdaraŭ u Biełarusi.
