Palaki źniali špijonski sieryjał pra biełaruskija śpiecsłužby VIDEA
Televizija Canal+ pradstaviła pieršy tyzer novaha polskaha seryjału «Nielehały». Jon zrobleny pavodle knihi viadomaha polskaha aŭtara kryminalnych detektyvaŭ Vincenta Severskaha. Heta litaraturny pseŭdanim pałkoŭnika polskaj vyviedki, jaki šmat hadoŭ pracavaŭ u zamiežnych misijach pad vydumanymi imionami, piša Radyjo Svaboda.
Padziei seryjału razhortvajucca ŭ Varšavie, Stakholmie, Stambule i Miensku. Pieršy reklamny rolik seryjału pačynajecca ad sustrečy špijonaŭ na Niamizie. Mienavita ŭ Biełarusi adbyvajecca vialikaja častka špijonskich pryhodaŭ, jakija pakazanyja ŭ seryjale.
Konrad Volski, kiraŭnik elitnaha adździełu polskaj vyviedki, padčas aperacyi ŭ Stambule zatrymlivaje biełaruskaha handlara zbrojaj. Ad jaho jon daznajecca pra planavany ŭ Švecyi terakt. Zbroja, jakuju planujecca vykarystać u hetym zamachu, zachoŭvajecca ŭ Biełarusi. Volski dałučaje da aperacyi polskaha špijona Trevisa, zakanśpiravanaha ŭ mienskim KDB, kab toj zdabyŭ infarmacyju, jakaja praduchilić plan terarystaŭ. Ale špijona raskryvaje adzin ź supracoŭnikaŭ biełaruskaha KDB. Kab evakujavać Trevisa, u Miensk vypraŭlajecca aficer polskaj vyviedki Sara. Adnačasova ŭ Varšavie hienerał biełaruskich specsłužbaŭ šantažuje polskaha premjera. Polskaja vyviedka vymušanaja luboj canoj zdabyć materyjały, jakija kamprametujuć polskaha premjera.
«Usie darohi viaduć u Miensk. Pačynajecca zabojčaja hulnia z časam», — havorycca ŭ reklamnym pres-relizie aŭtaraŭ seryjału.
U «Nielehałach» źnialisia papularnyja polskija aktory Hžehaž Damiencki, Ahnieška Hrachoŭska, Andžej Severyn, a taksama aktory z Narvehii, Rasiei i Ŭkrainy. Zdymki ŭ Biełarusi ŭžo zavieršanyja. Da kanca lipienia majuć adbycca zdymki ŭ Švecyi. Premjera seryjału ŭ 10 častkach zaplanavanaja na vosień.