Futbalist zbornaj Hiermanii syšoŭ z kamandy paśla sustrečy z Erdahanam
Wikimedia Commons
Atakujučy paŭabaronca zbornaj Hiermanii tureckaha pachodžańnia Miesut Aził, jakoha kiraŭnik Niamieckaha futbolnaha sajuza (DFB) Rajnchard Hryndel raskrytykavaŭ za sustreču z prezidentam Turcyi Taipam Erdahanam, vyrašyŭ syści z kamandy. Pra heta jon napisaŭ u siabie ŭ tvitary.
«U vačach Hryndela i jaho prychilnikaŭ ja źjaŭlajusia niemcam, kali my pieramahajem. Adnak kali my prajhrajem, ja dla ich — imihrant. I heta ŭsio tamu, što mianie da hetaha času nie pryniali ŭ niamieckim hramadstvie, niahledziačy na padatki, jakija ja płaču ŭ Hiermanii, achviaravańni niamieckim škołam i pieramozie na ČS-2014. Da mianie staviacca jak da «inšaha». Da maich siabraŭ Łukaša Padolskaha i Mirasłava Kłoze nie staviacca jak z hiermana-palakaŭ, dyk čamu ž ja hiermana-turak? Bo heta Turcyja? Bo ja musulmanin? Miarkuju, što heta važnaja prablema. Ja naradziŭsia i vyras u Hiermanii, dyk čamu ž ludzi nie ličać mianie niemcam?» — napisaŭ Aził.
Pavodle jaho słoŭ, z-za staŭleńnia z boku Niamieckaha futbolnaha sajuza i inšych jon nie choča nasić futbołku zbornaj Hiermanii. «Ź ciažaram na sercy i paśla doŭhich razvažańniaŭ u suviazi z apošnimi padziejami ja pryniaŭ rašeńnie bolš nie hulać za zbornuju Hiermanii, bo adčuvaju rasisckaje i niepavažlivaje staŭleńnie ŭ svoj adras», - dadaŭ futbalist.
Raniej členy ultrapravaj niamieckaj partyi «Alternatyva dla Hiermanii» (ADH) abvinavacili ŭ projhryšy niamieckaj zbornaj u zaklučnym tury hrupavoha etapu čempijanatu śvietu 2018 Miesuta Aziła, jaki maje tureckija karani. «Aził moža być zadavoleny, vinšavańni Erdahanu», - zajaviŭ pres-sakratar partyi.
U mai Aził razam ź niamieckim futbalistam tureckaha pachodžańnia Iłkajem Hiundahanam sustreŭsia z Erdahanam. Ich učynak raskrytykavali, pastaviŭšy pad sumnieŭ prychilnaść spartsmienaŭ demakratyčnym kaštoŭnaściam Hiermanii.
