Izrail stanovicca aficyjna jaŭrejskaj dziaržavaj
Kniesiet, parłamient Izraila, pryniaŭ zakon, zhodna ź jakim Izrail z hetaha času źjaŭlajecca jaŭrejskaj dziaržavaj.
U ramkach zakona, siarod inšaha, panižajecca status arabskaj movy, što da hetaha času była adnoj z aficyjnych movaŭ krainy.
U zakonie taksama havorycca, što Ijerusalim — adzinaja i niepadzielnaja stalica Izraila.
Arabskija deputaty kniesieta asudzili hety zakon, ale premjer-ministr Bińjamin Nietańjachu nazvaŭ jaho pryniaćcie pavarotnym momantam
Pavodle novaha zakona, jaki padtrymlivajecca ŭradam krainy, Izrail — histaryčnaja radzima jaŭrejskaha naroda, jaki vałodaje vyklučnym pravam na nacyjanalnaje samavyznačeńnie na hetaj terytoryi.
Debaty ŭ kniesiecie byli burnymi i praciahvalisia bolš za vosiem hadzin. Za zakonaprajekt prahałasavali 62 deputaty, suprać - 55.
Adnak niekatoryja artykuły zakonaprajekta byli vydaleny ź jaho kančatkovaj viersii z-za krytyki z boku prezidenta i hienieralnaha prakurora Izraila. Tak, adnym z artykułaŭ mierkavałasia ŭzakonić stvareńnie čysta jaŭrejskich rajonaŭ abo haradkoŭ.
Araby składajuć kala 20% 9-miljonnaha nasielnictva Izraila.
Zhodna ź isnujučym zakanadaŭstvam araby karystajucca ŭsimi pravami hramadzian Izraila, ale pry hetym jany časta skardziacca na dyskryminacyju i na toje, što dziaržava tracić mienš na sacyjalnyja patreby ich supolnaści ŭ takich śfierach, jak adukacyja, achova zdaroŭja i pradastaŭleńnie žylla. Pa ich słovach, araby ŭ Izraili časta adčuvajuć siabie hramadzianami druhoha hatunku.
Niaŭradavaja arhanizacyja «Adała», jakaja abaraniaje pravy arabskaha nasielnictva, nazvała novy zakon sprobaj dasiahnuć etničnuju pieravahu pry dapamozie rasisckaj palityki.
Na minułym tydni Bińjamin Nietańjachu vystupiŭ u padtrymku zakona. «My budziem i dalej zabiaśpiečvać hramadzianskija pravy ŭ izrailskaj demakratyi, ale ŭ bolšaści taksama jość pravy, i bolšaść prymaje rašeńni», — skazaŭ premjer-ministr.
