Kitajskaja «Hulnia piarścionkaŭ» hrandyjozna pravaliłasia ŭ prakacie — stvaralniki zhubili $100 miljonaŭ
Film «Asura» ź biudžetam u 113 miljonaŭ dalaraŭ sabraŭ tolki 7 miljonaŭ u prakacie za pieršyja vychadnyja i byŭ źniaty z ekranaŭ u niadzielu, piša Financial Times.
Stužka raspaviadaje pra pryhody maładoha pastucha Ru I, jaki raptoŭna daviedaŭsia pra toje, što źjaŭlajecca reinkarnacyjaj adnoj z hałovaŭ Asury, trochhałovaha karala śvietu, paviedamlała pierad premjeraj u lipieni anhłamoŭnaje kitajskaje vydańnie Global Times. Adnoj z najbolšych techničnych składanaściaŭ stvaralniki filma nazvali pakaz troch hałovaŭ na adnym ciele.
Vyhladaje, što pieramudryli. Nie vyratavali film navat niaŭzbrojenym vokam bačnyja cytaty z «Vaładara piarścionkaŭ», «Zornych vojnaŭ» i «Hulni tronaŭ»:
Jaki ž kitajski film biez drakonaŭ? U «Asury» ich cełyja statki. Paśvić ich aktrysa, nadta padobnaja da Dajnerys Tarharyjen. Paraŭnajcie:
Film byŭ stvorany na ŭłasnaj studyi kitajskaha technałahičnaha hihantu Alibaba. Biełarusam hetaja kampanija znajomaja pa svajmu servisu internet-dastaŭki AliExpress.
Kitaj, jaki jašče niekalki dziesiacihodździaŭ tamu byŭ adstajučaj krainaj, u apošni čas vyjšaŭ na pieršyja miescy ŭ śviecie jak vytvorca ŭsiaho, što tolki mahčyma. Dapamahła hetamu nie tolki pracavitaść, ale i toje, što kitajski biznes nie hrebavaŭ masava kapijavać zamiežnyja vyraby, spadziejučysia, što kolkaść pakrysie piarojdzie ŭ jakaść. Ciapier kitajskija aŭtamabili — prynamsi pa dyzajnie — mała adroźnivajucca ad zachodnich, a ZŠA musiać navat abaraniać svoj rynak ad kitajskich smartfonaŭ, jakija našmat bolš tannyja za amierykanskija iPhone (jakija taksama ŭ asnoŭnym vyrablajuć u Kitai).
Apošnim časam Kitaj sprabuje zrabicca suśvietnaj «fabrykaj maraŭ». Meta — raspaŭsiudžvać za miežy nie tolki ŭłasnuju ekanamičnuju moc, ale i idei, vobrazy — najpierš z dapamohaj kino. Ale voś tut pačynajucca prablemy. Jak vyhladaje, zamała prosta skapijavać halivudskija pryjomy. Papiaredni kitajski błokbastar, «Vialikaja ściana», stvorany ŭ supracoŭnictvie z amierykancami, krytyki taksama nazvali niaŭdałym, choć jon i prynios u prakacie adnosna nievialiki prybytak u 20 miljonaŭ dalaraŭ pry 150-miljonnym biudžecie.
Darečy, na hetym tydni Biełaruśfilm zaklučyŭ pahadnieńnie z kitajskaj studyjaj Chongqing Film Group Co., Ltd.
Jany źbirajucca sumiesna zdymać ramantyčnuju stužku pra kachańnie biełaruskaj studentki i kitajskaha nastaŭnika tancaŭ.
Ci vyviedzie heta sa stuparu biełaruskuju kinavytvorčaść? Jak bačym, navat samim kitajcam supracoŭnictva z Halivudam nie harantuje pośpiechu. Vidać, dla taho, kab stvaryć film, jaki zachopić sercy, patrebna štości bolšaje, čym vialiki biudžet.