Staršynia Salihorskaha traciejskaha suda napisaŭ artykuł «Pryčyny schilnaści dziaržaŭnych słužačych da seksualnych pierviersij». Heta prosta piekła
Viačasłaŭ Dryzhałovič, staršynia vyjaznoha Traciejskaha suda z Salihorska, apublikavaŭ u supołcy suda Ukantakcie artykuł, pryśviečany «vyčvarencam» na dziaržaŭnaj słužbie.
Šmatsłoŭny tekst pad nazvaj «Pryčyny schilnaści dziaržaŭnych słužačych da seksualnych pierviersij» pry žadańni možna całkam pračytać tut. Kali koratka, to va ŭsim śviecie ćvituć vyčvarenstvy i seksualnyja mienšaści. Usie prablemy ad taho, što ludzi kapijujuć hierojaŭ kino i litaratury, biełaruskaje hramadstva žyvie ŭ virtualnaj realnaści, vyčvarency paŭsiul, asablivaja prablema — dziaržsłužba.
«Akramia jak aburalnymi, nielha nie nazvać vypadki, kali adkrytyja homaseksualisty, leśbijanki, biseksuały zajmali i zajmajuć kirujučyja pasady ŭ sistemie orhanaŭ vykanaŭčaj ułady, IMPZ, i navat sistemy adukacyi Salihorskaha rajona, — turbujecca Dryzhałovič.
«Vyčvarencaŭ» na pasady padsadžvajuć transnacyjanalnyja karparacyi, upeŭnieny aŭtar.
«Sumnieŭna, što tradycyi, jakija isnujuć u Biełarusi, majuć na ŭvazie mahčymaść znachodžańnia na dziaržaŭnaj słužbie asob z perviersijami. Ale voś dziejnaść transnacyjanalnych cieniavych kampanij, nakiravanaja na zachop ułady niekanstytucyjnym sposabam, praduhledžvaje viarboŭku i ŭkaranieńnie ŭ sistemu orhanaŭ dziaržaŭnaj ułady i dziaržaŭnaha kiravańnia mienavita asob, jakija majuć tyja ci inšyja perviersii, pryčynaj čaho źjaŭlajecca padvyšanaja unušalnaść takich asob, ich schilnaść da delinkvientnych pavodzinaŭ, i, u cełym, ich sacyjapatyja».
Moža heta staronku ŭzłamali? Ci Dryzhałovič tak pažartavaŭ?
Jon sam śćviardžaje, što nie. Heta śviadomy krok čałavieka, jaki skončyŭ Akademiju kiravańnia pry prezidencie i pracuje jurystam u Salihorsku.
Dyjałoh ź im atrymaŭsia, miakka kažučy, absurdnym.
Pryvodzim razmovu ź Viačasłavam Dryzhałovičam biez kupiur.
Naša Niva: Pahladzieli vaš artykuł, pryśviečany vyčvarencam, jaki apublikavany ŭ supołcy Traciejskaha suda. Heta ž vy aŭtar?
Viačasłaŭ Dryzhałovič: Tak, tak.
NN: A jakaja meta artykuła? Heta ž nie tyčycca vašaj prafiesijnaj dziejnaści.
VD: Čamu nie tyčycca? Sprava ŭ tym, što ŭ suviazi z roznymi situacyjami ŭ halinie zabieśpiačeńnia biaśpieki darožnaha ruchu niaredka źviartajucca ludzi z pytańniami, ź nierazumieńniem taho, što adbyvajecca ŭ hetych situacyjach. I hety artykuł adzin z etapaŭ sieryi artykułaŭ, jakija pojduć paśla, na padstavie jakich ludzi zmohuć rabić niejkija vysnovy, naładžvać niejkim čynam svaje pavodziny ź inšymi ŭdzielnikami darožnaha ruchu i z orhanami, jakija zabiaśpiečvajuć biaśpieku darožnaha ruchu.
NN: Prabačcie… To bok artykuł «Pryčyny schilnaści dziaržaŭnych słužačych da seksualnych pierviersij» zaklikana zabiaśpiečyć biaśpieku darožnaha ruchu?
VD: U tym liku.
NN: A adkul spasyłki na psichijatraŭ i psichołahaŭ? Vy ž nie psichijatr sam…
VD: Ź ich prac. My, jurysty, u pieryjad navučańnia prachodzim taki pradmiet, jak jurydyčnaja psichałohija. I hetyja cytaty ŭziaty z prac, jakija prachodziać u miežach hetaha kursa.
NN: Skažycie, a da čaho tut apovied pra vypadki, kali homaseksuały i leśbijanki zajmajuć pasady na dziaržsłužbie? Jakaja roźnica, čym zajmajecca čałaviek?
VD: Patłumaču, u nas u dziaržavie kala 200 tysiač dziaržsłužačych. To bok seksualnyja pierviersii, da jakich schilnyja tyja ci inšyja hramadzianie, abumoŭlenyja ŭ pieršuju čarhu ich chvorym psichičnym stanam. Što tłumačyć ich schilnaść da devijantnych pavodzinaŭ. Ci patrebnyja krainie na dziaržsłužbie hramadzianie, jakija schilnyja da takich pavodzinaŭ?
NN: Vy ličycie, što leśbijanka nie moža vykonvać takuju pracu, ci što?
VD: Tak dumajuć viadučyja psichołahi i psichijatry, ja tolki vykładaju ich pazicyju.
Ja vam patłumačyŭ, takija ludzi schilnyja da devijantnych pavodzinaŭ bolš, čym usie astatnija. I, jak praviła, jany hetyja ŭčynki robiać, u toj ci inšaj stupieni. Čamu? Zrazumieła — bo adčuvajuć ad hetaha zadavalnieńnie.
NN: A dziejnaść «transnacyjanalnych cieniavych kampanij, nakiravanaja na zachop ułady niekanstytucyjnym mietadam»? Heta vy Biełaruś majecie na ŭvazie?
VD: Kali vy znajomyja z paniaćciem «transnacyjanalnyja cieniavyja kampanii», to musicie viedać, što adzin z asnoŭnych dachodaŭ takich kampanij — zabieśpiačeńnie dziaržpieravarotaŭ i zachop ułady niekanstytucyjnym šlacham.
NN: A što heta za kampanii? Nazvy, moža, ahučycie?
VD: Heta cieniavyja kampanii. Vy navučalisia ŭ jakoj ustanovie adukacyi?
NN: Fiłałahičnaja adukacyja, ja nie vielmi znajomy z «cieniavymi kampanijami».
VD: Kali vy projdziecie pierapadrychtoŭku ŭ Akademii kiravańnia pry prezidencie pa niejkaj śpiecyjalnaści, to ŭ kurs bolšaści śpiecyjalnaściaŭ pa pierapadrychtoŭcy ŭvachodziać pradmiety, na jakich vy daviedajeciesia, što takoje transnacyjanalnyja cieniavyja kampanii i jak jany ažyćciaŭlajuć dziaržaŭnyja pieravaroty.
NN: To bok vas navučyli hetamu ŭ Akademii pry prezidencie?
VD: Nu tak. Nie navučyli, a raskazali, padzialilisia.
NN: Pra toje, što hetyja kampanii ŭkaraniajuć vyčvarencaŭ u sistemu dziaržaŭnaj ułady?
VD: Nieabaviazkova vyčvarencaŭ. Ale, u pryncypie, heta adzin z typaŭ ludziej, jakija najbolš paddajucca ŭpłyvu, jakija schilnyja da takoha rodu kantaktaŭ. Čałavieka možna prosta kupić, možna da čahości schilić. Ale kali ŭ čałavieka, prabačcie za vyraz, dziravaja psichika, to ź im praściej vyrašać taho kštałtu pytańni. Kali jon źjaŭlajecca sacyjapatam, to heta prosta znachodka dla špijona.
Što takoje Vyjazny traciejski sud i jak pracuje heta alternatyva dziaržaŭnym sudam?
