Prezidentam Mieksiki moža stać Čavies i Tramp u adnoj asobie FOTA
Na vybarach prezidenta Mieksiki, jakija prachodziać u niadzielu, 1 lipienia, favarytam vystupaje levy kandydat pa mianušcy Amła.
Jaho prychilniki vierać, što jon pieramoža karupcyju i biednaść, praciŭniki ža abvinavačvajuć jaho ŭ papuliźmie, paraŭnoŭvajuć z Trampam i niabožčykam Uha Čaviesam i aścierahajucca, što Amła moža źniščyć maładuju mieksikanskuju demakratyju, piša Bi-bi-si.
Amła — heta inicyjały 64-hadovaha byłoha mera Miechika Andresa Manuela Łopiesa Abradora, mienavita hetaj abrevijaturaj jaho čaściej za ŭsio nazyvajuć mieksikancy.
Kandydat ad kaalicyi, u jakuju ŭvachodzić jaho ŭłasnaja levaja partyja «Marena», były mer Miechika Łopies Abrador abiacaje ŭ vypadku pieramohi na vybarach razburyć toje, što jon nazyvaje «mafijoznaj dziaržavaj», pieramahčy karupcyju, a dla pačatku — rezka skaracić zarpłaty vyšejšym dziaržaŭnym čynoŭnikam.
Apytańni pakazvajuć, što rejtynh Amła vahajecca ŭ rajonie 50%, i jon lohka pabivaje troch astatnich kandydataŭ u prezidenty — tym bolš što vybary prezidenta ŭ Mieksicy prachodziać u adzin tur.
Krytyki Łopiesa Abradora surjozna zaniepakojenyja jaho levym papulizmam i aścierahajucca, što jon moža zavieści Mieksiku tudy ž, kudy zavioŭ Vieniesuełu niabožčyk Uha Čavies. Inšyja paraŭnoŭvajuć jaho z Donaldam Trampam — u pryvatnaści, za nieluboŭ da presy, jakaja krytykuje jaho, choć Amła abiacaje «pryvieści ŭ prytomnaść» amierykanskaha prezidenta, jaki abiacaŭ adharadzicca ścianoj ad mieksikanskich imihrantaŭ.
Amła zajaŭlaŭ, što nie vieryć u mieksikanskuju demakratyju. U 2006 hodzie, paśla taho jak jon prajhraŭ prezidenckija vybary z adryvam mienš za 1%, prychilniki Łopiesa Abradora na niekalki tydniaŭ zabłakavali centralnuju mahistral u Miechika i faktyčna paralizavali ruch u horadzie.
U 2012 Łopies Obrador taksama bałatavaŭsia ŭ prezidenty — ale znoŭ prajhraŭ.
Amła niejak nazvaŭ Viarchoŭny sud instrumientam aliharchii. Intelektuałaŭ i presu jon klajmić «buržujami» i pradažnaj absłuhaj mafii va ŭładzie.
Mieksikanskaj demakratyi usiaho kala 20 hadoŭ: pieršyja alternatyŭnyja vybary prezidenta ŭ vyniku libieralizacyi palityčnaha režymu prajšli ŭ 2000 hodzie. Z tych časoŭ ŭłada ŭ Mieksicy źmianiajecca rehularna.
Adnak demakratyčnyja instytuty i padzieł uładaŭ pakul nie nadta dapamahajuć Mieksicy dać rady z karupcyjaj, biednaściu i žachlivym uzroŭniem złačynnaści.
U rejtynhu ŭsprymańnia karupcyi Transparency International Mieksika dzielić 135-je miesca ŭ śviecie z Rasijaj, Papua — Novaj Hviniejaj, Kyrhyzstanam i Łaosam.
Samaja ž vostraja prablema Mieksiki na dadzieny momant — heta vielizarnaja kolkaść zabojstvaŭ.
Za apošnija 11 hadoŭ u krainie byli zabityja bolš za 200 tysiač čałaviek. Letaś — 30 tysiač. U apošnija paŭhoda, padčas pieradvybarčaj kampanii, u Mieksicy byli zabityja 130 palitykaŭ, u tym liku 48 kandydataŭ na roznyja pasady.
1 lipienia — vybary nie tolki prezidenta, ale i parłamienta, a taksama inšych vybarnych orhanaŭ roznych uzroŭniaŭ. Sotni ludziej źniali svaje kandydatury prosta ad strachu za svajo žyćcio.