Biełarusak-bliźniat prysudzili da turmy ŭ AAE za napad na žančynu-palicejskuju
Sudździa rastłumačyŭ, što dokazy, jakija śviedčać suprać ich, źjaŭlajucca «važkimi i hruntoŭnymi».
Pavodle prysudu, 37-hadovym siostram, jakija niekatory čas byli porna-aktrysami ŭ Brytanii, ciapier treba budzie pravieści paŭhoda za kratami, a paśla vyzvaleńnia jany pavinny być departavanyja. Tym nie mienš, u vypuščanych raniej pad zakład Aleny i Sašy, jakija, darečy, nie prysutničali ŭ sudzie, jość miesiac na padaču apielacyi. Pra heta paviedamlaje Daily Mail, nahadvajučy, što rodam siostry ź Biełarusi, raniej nasili proźvišča Vielikanavy, adnak 8 hadoŭ tamu atrymali hramadzianstva Vialikabrytanii.
Jany pryjechali ŭ Łondan paśla znajomstva z brytanskim režysioram Majłzam Parkieram. U 2001-m Alena vyjšła za jaho zamuž. Uśled za joj źmianiła proźvišča i jaje siastra. Dziaŭčaty vyvučali ŭ Vialikabrytanii jurysprudencyju. Tak, Alena z 2002-ha pa 2007-y była studentkaj Łondanskaha i Viestminsterskaha ŭniviersitetaŭ.
Zatym siostry źjechali ŭ Dubaj, dzie žyli, zdymajučy ahulnuju kvateru. Abiedźvie ŭładkavalisia pracavać u jurydyčnuju firmu Al Safar & Partners: Alena — staršym kansultantam, Saša — śpiecyjalistam.
Žančyn zatrymali ŭ žniŭni 2017-ha na vychadzie z bara haścinicy ŭ rajonie Al-Barša, piša Daily Mail. Incydent pačaŭsia z taho, što supracoŭniki chutkaj sprabavali akazać dapamohu Alenie, jakaja paraniła ruku, pry hetym adna ź siaścior, jak śćviardžajecca, udaryła paramiedyka dźviercami aŭtamabila.
Jak było ahučana ŭ sudzie, niahledziačy na toje, što sam supracoŭnik chutkaj nie chacieŭ vysoŭvać nijakich abvinavačvańniaŭ, palicyja vyrašyła zatrymać žančyn, pakolki jany byli niećviarozymi.
Pa viersii abvinavačvańnia, kali siaścior pryvieźli da ŭčastka, adzin z palicejskich pajšoŭ pa vuziejšyja kajdanki, pakinuŭšy zatrymanych u mašynie razam z kaleham-žančynaj. Jak śćviardžajecca, Alena i Saša raptam biez daj pryčyny nakinulisia na jaje, pavalili na padłohu i pačali źbivać i drapać, nanosiačy ŭdary pa śpinie i hałavie.
Sami siostry svaju vinu kateharyčna admaŭlali. Jany taksama zajavili, što paśla aryštu padvierhlisia katavańniam z boku palicejskich.