Łukašenka pamiłavaŭ mera Salihorska, prysudžanaha paŭhoda tamu za karupcyju da 8 hadoŭ
U śniežni 2017 hoda sud Minskaj vobłaści prysudziŭ byłoha kiraŭnika Salihorskaha rajona Alaksandra Rymašeŭskaha da 8 hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści, a na dniach jon, pa dadzienych krynicy TUT.BY, vyjšaŭ na volu.
— Zaraz u Salihorsku ŭsie abmiarkoŭvajuć navinu: Rymašeŭskaha adpuścili z kałonii, jon na svabodzie, — paviedamiŭ čytač.
U vioscy Kamień Kapylskaha rajona, dzie ŭ byłoha čynoŭnika jość dom, hetuju infarmacyju paćviardžajuć miascovyja.
— Jon pryjechaŭ u viosku pazaŭčora, kažuć, užo pavinien źjechać u Bresckuju vobłaść na pracu, — raspaviadaje miascovaja žycharka.
U vioscy Kamień Kapylskaha rajona Alaksandr Rymašeŭski kaliści vučyŭsia ŭ škole. I mienavita niedaloka ad hetaj vioski 30 maja 2017 hoda čynoŭnika zatrymali na miescy złačynstva. U toj dzień, pa dadzienych abvinavačvańnia, jon atrymaŭ 2,7 tysiačy dalaraŭ.
Toje, što Rymašeŭski na voli, paćvierdziŭ i inšy miascovy žychar. Sam Alaksandr Branisłavavič nie adkazvaje na zvanki.
U prakuratury Salihorskaha rajona, a taksama ŭ Salihorskim rajvykankamie admaŭlajucca havaryć na hetuju temu.
Advakat Dźmitryj Haračka, jaki abaraniaŭ padčas pracesu Rymašeŭskaha, kaža, što ŭpieršyniu čuje pra vyzvaleńnie. Jon udakładniŭ: prysud byŭ abskardžany ŭ Viarchoŭnym sudzie i pakinuty bieź źmienaŭ.
Jak ža były čynoŭnik moh vyjści na volu, kali prysud byŭ pakinuty ŭ sile, a raźličvać na UDV jon jašče nie moh? Pavodle infarmacyi krynicy tut.by, Alaksandr Rymašeŭski byŭ pamiłavany prezidentam.
- U naš adras infarmacyja nie pastupała, - kamientuje Dźmitryj Bryloŭ, aficyjny pradstaŭnik Hienieralnaj prakuratury RB.