Rasijski tabłoid «Viersija»: Łukašenka dapamahaje akupantam-karnikam i kijeŭskim hałavarezam
Papularny rasijski štotydniovik «Viersija», jaki maje tyraž bolš za 170 tysiač ekzemplaraŭ, apublikavaŭ na hałoŭnaj staroncy svajho sajta materyjał «Padvojnaja hulnia biełaruskaha prezidenta», u jakim pastaviŭ u vinu kiraŭniku Biełarusi toje, što naša kraina adpraviła na kantralavanuju Ukrainaj terytoryju Danbasa humanitarnuju dapamohu pamieram 80 tysiač dołaraŭ. Žurnalist rasijskaha vydańnia nazyvaje heta dapamohaj «akupantam-karnikam» i «kijeŭskim hałavarezam».
«Viersija» aburajecca, što humanitarnaja dapamoha pajšła nie ŭ kvazirespubliki, a ŭ Kramatorsk, jaki znachodzicca pad kantrolem Ukrainy. Admietna, što Kramatorsk, ukrainski horad z ukrainskaj uładaj, žurnalist nazyvaje «akupavanym».
Na dumku rasijskaha vydańnia, Łukašenka zaŭsiody na baku Kijeva.
«Pa sutnaści, Łukašenka, jak minimum, dvojčy vyratavaŭ kijeŭski režym. A ciapier jašče z ruki padkormlivaje humanitarnaj biełaruskaj tušonkaj karnikaŭ, jakija zasiedzielisia ŭ akopach», — piša «Viersija».
Atakuje vydańnie nie tolki Łukašenku. Pasła Biełarusi va Ukrainie «Viersija» nazyvaje «vialikim prychilnikam Niezaležnaj i jaje novych hierojaŭ». Taksama vydańnie śćviardžaje, što biełaruskija hramadzianie ŭdzielničajuć u kanflikcie pieravažna na ŭkrainskim baku, a ŭdzieł na baku tak zvanych «narodnych respublik» — adzinkavyja vypadki.
«I kali pa viartańni ŭ Biełaruś «patryjotam», jakija zmahalisia razam z ukrainskimi karnikami-nacyjanalistami, addajucca pašana i słava, to sapraŭdnych hierojaŭ Danbasa mohuć i pasadzić»,
— piša «Viersija».
Varta adznačyć, što Biełaruś va ŭkrainskim kanflikcie zaniała pazicyju strohaha niejtralitetu. Pad kryminalny pieraśled padpadajuć jak tyja hramadzianie Biełarusi, što pajechali vajavać na baku DNR-ŁNR, tak i tyja, što pajšli dobraachvotnikami va ŭkrainskija siłavyja struktury.
