Lidar litoŭskich palakaŭ abvinavaciŭ Biełsat u rusifikacyi palakaŭ Biełarusi. Jamu adkazała Anžalika Borys
Lider «Vybarčaj akcyi palakaŭ Litvy» Valdemar Tamašeŭski raskrytykavaŭ telekanał Biełsat. Pavodle litoŭskaha eŭradeputata, «Biełsat na biełaruskaj movie rusifikuje palakaŭ Litvy». Pra heta palityk zajaviŭ u efiry polskaha katalickaha telekanału «TV Trwam», piša Radyjo Svaboda.
«Čamu 25 miljonaŭ złotych idzie na televiziju Biełsat, jakaja na biełaruskaj movie rusifikuje palakaŭ u Biełarusi. A čamu my, u Litvie, nia majem polskamoŭnaha kanału?» — skazaŭ Tamašeŭski.
Valdemar Tamašeŭski amal 20 hadoŭ uznačalvaje hałoŭnuju polskuju partyju Litvy. Byŭ deputatam litoŭskaha Sejmu, u 2014 hodzie byŭ abrany deputatam Eŭrapiejskaha parlamentu.
Prakamentavać zajavu Valdemara Tamašeŭskaha Svaboda paprasiła staršyniu Sajuzu palakaŭ Biełarusi Anžaliku Borys.
«Biełsat niezaležny kanał i na siońnia heta adzinaja niezaležnaja televizija ŭ Biełarusi. Tam jość pieradača dla palakaŭ i pra palakaŭ, pa-polsku — «Nad Niemnem». Heta kaštoŭnaja televizija. U Biełarusi vialikija prablemy sa svabodaj słova, blakujecca partał «Chartyja'97″. I tamu Biełsat maje vialikaje značeńnie. I dla biełarusaŭ, i palakaŭ, hramadzian Biełarusi. I ja nie pahadžajusia z deputatam Tamašeŭskim, što Biełsat rusyfikuje. Naadvarot. Biełsat supraciŭlajecca tatalnaj rusyfikacyi Biełarusi», — skazała Borys u interviju Svabodzie.
Vializny skandał u Litvie niekalki hadoŭ tamu vyklikała źjaŭleńnie Tamašeŭskaha na Antokalskich mohiłkach z hieorhijeŭskaj stužkaj na pinžaku. Sam palityk tłumačyŭ, što ličyć stužku symbalem rycarskaha duchu. Miascovaja elita tłumačyła, što heta byŭ taktyčny krok u polska-litoŭskaj palityčnaj hulni, kab zdabyć prychilnaść rasiejskamoŭnych vybarcaŭ u Litvie.