Mužčyna ź siakieraj napaŭ na ludziej u Buda-Kašalovie
30-hadovy ahresar zatrymany.
Adbyłosia ŭsio ŭviečary 2 červienia. Kala 19-j hadziny nieviadomy kinuŭsia ź siakieraj na minakoŭ. Jamu ŭdałosia paranić dvaich mužčyn, piša gomel.today.
Milicyja zmahła zatrymać mužčynu. Im akazaŭsia 30-hadovy miascovy žychar. Adrazu jaho pavieźli ŭ psichijatryčnuju balnicu.
Miascovyja ŚMI pišuć, što mužčyna byŭ pad spajsami. Ale ŭ Buda-Kašaloŭskim rajadździele Śledčaha kamiteta kažuć, što takich dadzienych niama.
«Kroŭ na ałkahol uziali — analiz pakazaŭ, što mužčyna byŭ ćviarozy. Analiz na narkotyki pakul nie hatovy, ale, najchutčej, jon taksama ničoha nie pakaža. Sam mužčyna admaŭlaje, što ŭžyvaŭ niejkija rečyvy, — raspaviali «Našaj Nivie» śledčyja. — Što šturchnuła jaho na ŭčynak, pakul nieviadoma. Papiarednie možna kazać pra niejkaje psichičnaje rastrojstva. Dakładna pakažuć ekśpiertyzy. Praŭda, na psichijatryčnym uliku mužčyna nie byŭ, sam taksama nie zmoh patłumačyć, čamu straciŭ kantrol nad saboj».
Ciapier mužčyna praciahvaje znachodzicca ŭ psichijatryčnaj balnicy, ź im pracujuć miedyki.
Dvoje mužčyn, jakich paraniŭ napadnik, taksama ŭ balnicy. U adnaho lohkija cialesnyja paškodžańni. U druhoha — ciažkija, čerapna-mazhavaja traŭma. Miascovyja vydańni pišuć, što apošni — u ciažkim stanie.
«Napeŭna, nielha kazać, što mužčyna ŭ ciažkim stanie. Prynamsi, paciarpiełyja sami dabiralisia ŭ balnicu. A paśla my z kožnym ź ich razmaŭlali. Mužčyna ź ciažkimi paškodžańniami — u prytomnaści, narmalna z nami hutaryŭ», — paviedamili «Našaj Nivie» pravaachoŭniki.
