Alaksandr Špakoŭski: Stvoranaja Zachadam prapahandysckaja mašyna pracuje na toje, kab pierarabić śviadomaść biełarusaŭ
Hazieta «Pravda», jakaja źjaŭlajecca drukavanym orhanam rasijskaj kampartyi, źviarnuła ŭvahu na Biełaruś. Vydańnie zaniepakojenaje tym faktam, što Biełaruś pašyraje kantakty z Zachadam. Hazieta sprabavała vyśvietlić pryčyny hetaha pry dapamozie palitołaha Alaksandra Špakoŭskaha.
Alaksandr Špakoŭski niekali byŭ u apazicyjnym «Pravym aljansie» i achoŭvaŭ Alaksandra Milinkieviča, a ŭ vyniku zbliziŭsia z «jeŭrazijcami». Ciapier jaho źviazvajuć sa strukturami Ministerstva ŭnutranych spraŭ. Fota zviazda.by.
Na dumku Špakoŭskaha, palityka Zachadu ŭ dačynieńni Biełarusi dobra pradumanaja i adpracavanaja. Hałoŭnymi metami hetaj palityki jon ličyć naviazvańnie Biełarusi libieralna-rynačnaj ekanamičnaj madeli, a taksama praduchileńnie stvareńnia paŭnavartasnaj Sajuznaj dziaržavy Biełarusi i Rasii.
Palitołah miarkuje, što suprać Biełarusi viadziecca sapraŭdnaja infarmacyjnaja vajna. Zachad nibyta imkniecca stvaryć niehatyŭny vobraz biełaruska-rasijskaj intehracyi. Pry hetym zachodnija miedyja, jak śćviardžaje Špakoŭski, imknucca prapahandavać u Biełarusi zachodnija intehracyjnyja struktury.
Asobnym punktam idzie «prapahanda nacyjanalizmu» ŭ Biełarusi.
«Dla lepšaha razumieńnia sučasnaha stanovišča adznaču, što padtrymka biełaruskaha nacyjanalizmu i vykarystańnie hetaj ideałohii ŭ hieapalityčnym prociborstvie z Rasijaj źjaŭlajecca tradycyjnaj ustanoŭkaj źniešniaj palityki ZŠA»,
— upeŭnieny Špakoŭski.
Palitołah śćviardžaje, što Zachad aktyŭna infiltravaŭ u biełaruskuju palityku i žurnalistyku nacyjanalistaŭ, ale biezvynikova:
— Prajekt pabudovy ŭ Respublicy Biełaruś prazachodniaj nacyjanalistyčnaj dziaržavy paciarpieŭ paražeńnie.
Z 1995 pa 2011 hod, miarkuje palitołah, Zachad sprabavaŭ niekalki raz ažyćciavić u Biełarusi kalarovuju revalucyju. Hetyja dziejańni nibyta chavalisia za fihavym listkom «abarony pravoŭ čałavieka». Ale ŭ Zachadu ničoha nie atrymałasia, tamu, miarkuje Špakoŭski, jany źmianili svaju taktyku pry niaźmiennaj stratehii.
«Ad kursa na «kalarovuju revalucyju» Zachad pierajšoŭ da novaha kursa, jaki atrymaŭ nazvu «transfarmacyja» i «ŭciahvańnie». Jon praduhledžvaje pastupovuju niehvałtoŭnuju źmienu ŭłady i hieapalityčnaha vybaru Respubliki Biełaruś z dapamohaj źmieny hramadskaj śviadomaści i kaštoŭnasnaj bazy nasielnictva»,
— kaža Špakoŭski.
Z 2015 hoda zachodnija niekamiercyjnyja arhanizacyi pačali vydzialać hrošy nie na revalucyju, a na padtrymku hramadska karysnych apalityčnych inicyjatyŭ, meta jakich — źmiena nastrojaŭ biełaruskaha hramadstva i elit.
Hałoŭnymi zachodnimi fondami, jakija pracujuć ź Biełaruśsiu, Špakoŭski nazyvaje IRI (Mižnarodny respublikanski instytut Respublikanskaj partyi ZŠA), NDI (Nacyjanalny demakratyčny instytut Demakratyčnaj partyi ZŠA), NED (Nacyjanalny fond u padtrymku demakratyi, ZŠA), GMF (Hiermanski fond Maršała, Hiermanija-ZŠA), PACT (ZŠA), SIDA (Šviedskaje ahienctva pa dapamozie raźvićciu), KAS (Fond Konrada Adenaŭera Chryścijanska-demakratyčnaha sajuza Niamieččyny), FES (Fond Frydrycha Ebierta Sacyjał-demakratyčnaj partyi Niamieččyny), jakija razam z asobnymi hrantami ŭradaŭ padtrymlivajuć roznyja internet-resursy i błohieraŭ:
«Stvorana, materyjalna abstalavana mahutnaja prapahandysckaja mašyna, jakaja pracuje na toje, kab pierarabić śviadomaść biełaruskaha hramadstva».
Adnak asablivych pośpiechaŭ, miarkuje Špakoŭski, zachodnija struktury nie dasiahnuli. Tolki nievialikaja častka nasielnictva ŭspryniała ideałohiju, jakuju nibyta prapahanduje Zachad. U pieršuju čarhu — u pytańni nacyjanalnaj identyfikacyi. Ale krytykuje Špakoŭski nie tolki Zachad (jaki prapahanduje nacyjanalizm), ale i rasijskich čarnasociencaŭ, jakija admaŭlajuć isnavańnie asobnaj biełaruskaj nacyi.
Vinavacić Špakoŭski i rasijski isteblišment, jaki zamiest taho, kab budavać raŭnapraŭnuju Sajuznuju dziaržavu razam ź Biełaruśsiu, raźviazvaje handlovyja vojny. Na dumku praŭładnaha palitołaha, heta škodzić hieapalityčnym intaresam samoj Rasii, bo tolki ŭmacoŭvaje pazicyi Zachadu ŭ Biełarusi:
«Pry acenkach biełaruskaj situacyi rasijskamu kiraŭnictvu, ŚMI i ekśpiertnym kołam varta paźbiahać jak mierkavańniaŭ ab «padtrymcy» nacyjanał-radykalizmu z boku aficyjnaha Minska, tak i vialikadziaržaŭnych napadak na dziaržaŭnuju niezaležnaść, historyju i kulturu Biełarusi. Usio heta nieadkładna vykarystoŭvajuć nacyjanalisty dla dalejšaj dyskredytacyi biełaruska-rasijskaha sajuza, raspalvańnia nianaviści i varožaści».
