Kala kaścioła na Załatoj Horcy zakładajuć novy sad: što tam ciapier robicca FOTY
Dobraŭparadkavać terytoryju kaścioła Śviatoha Rocha, što mieścicca pa praśpiekcie Niezaležnaści 44, pačali ŭ mai. Na siońnia źnieśli aharodžu, što adździalała terytoryju kaścioła ad haspadarčych pabudoŭ na skryžavanni vulic Kazłova i Čyrvanazornaj.
«U listapadzie minułaha hoda hetuju zakinutuju terytoryju, na jakoj byŭ sad, zamacavali za kaściołam, — kaža dziažurnaja pa kaściole Natalla. — Što tut da hetaha rabiłasia, heta strach! Terytoryja, ličy, ničyja, tut i bamžy, i ałkašy. A jabłynievy sad byŭ stareńkim, kryvym, a zakładzieny ž na čałaviečych kaściach».
Natalla raskazała, što stahodździe tamu tut byli chalernyja mohiłki:
«Dom nasuprać kaścioła pabudavali ŭ 50-ja hady, i staražyły, z kim mnie daviałosia pahutaryć, raskazali, što pamiatajuć jašče reštki tych starych mohiłak».
Dziakujučy tamu, što pierad kaściołam pabudavali žyły dom, jaho vyratavali ad razbureńnia.
«Bačycie razburanyja pomniki pa ŭsiej terytoryi? Kali kaścieł addali viernikam u 2006 hodzie, hetyja nadmahilli pačali vykopvać litaralna ź ziamli. U 1937 hodzie majomaść kaścioła była całkam razrabavanaja. Paśla vajny tut było knihaschovišča, a kali ŭ savieckaj intelihiencyi pačałasia moda na kancerty arhannaj muzyki, ad fiłarmonii tut adkryli kamiernuju zału».
Nie tak daŭno jašče adno nadmahille prynios čałaviek z padvała doma nasuprać. Inšy pryvieźli sa zvałki, bo vyjavili, što hetyja plity z załatahorskich mohiłak. Nadpisy na pomnikach zroblenyja na łatyni, na polskaj, ruskaj, francuzskaj movach.
«Probašč kaścioła ajciec Jury choča sabrać usie znojdzienyja nadmahilli ŭ adno miesca, i nieŭzabavie tut źjavicca miemaryjał stračanym załatahorskim mohiłkam», — raskazvaje Natalla.
Pracy na terytoryi kaścioła jašče šmat. Pracujuć rabočyja, jakija raskazali, što ich zadača była vykarčavać stary sad, zasypać usie piaskom.
Paśla zrabić darožki, zakłaści novy sad i zrabić terytoryju kaścieła pryvabnaj, kudy zmohuć prychodzić ludzi, hulać ź dziećmi abo prosta pasiadzieć na łavačcy ŭ pryhožym skviery.
