Vice-premjer Rusy ŭziaŭ na budaŭnictva doma ŭ Drazdach rublovy kredyt na $75 tysiač. Da devalvacyi
Va ŭmovach pastajannaha abiasceńvańnia biełaruskaha rubla maraj mnohich udała ŭziać kredyt u rublach, bo viartać hrošy budzieš pa inšym kursie. Abvalnaja devalvacyja — i ty maješ zvyšdachody.
Vice-premjer Michaił Rusy moža pravieści majstar-kłas — jak atrymać nadzieł u Drazdach, a paśla jašče ŭziać u «Biełarusbanku» na budaŭnictva doma $75 tysiač u rublach na 20 hadoŭ.
Michaił Rusy.
Bolš za sotniu čynoŭnikaŭ i inšych pradstaŭnikoŭ elity atrymali ziamielnyja nadzieły ŭ «Drazdach» i «Drazdach-2» — prestyžnych katedžnych pasiołkach na ŭskrajku Minska.
Čytajcie taksama: Ad Abielskaj da Jarmošynaj: 112 uładalnikaŭ katedžaŭ u Drazdach, poŭny śpis
Učastki, rynkavy košt jakich siahaje da $500 tysiač, vydzialajucca pradstaŭnikam namienkłatury na nieprazrystych umovach. Ad čynoŭnika patrabujecca tolki pabudavać na pustoj ziamli dom na svoj hust.
Ale dzie ŭziać hrošy na takoje budaŭnictva? Ministerskaha zarobku na heta moža i nie chapić.
Michaił Rusy — vice-premjer, jaki adkazvaje za sielskuju haspadarku, nie samuju bahatuju halinu ekanomiki.
Čytajcie taksama: Historyja žyćcia Michaiła Rusaha, ministra, jaki pierasiedzieŭ usich premjeraŭ
Siamja čynoŭnika — a heta, pavodle aficyjnaj bijahrafii, žonka i dźvie darosłyja dački, — žyvie ŭ čatyrochpakajovaj kvatery płoščaj bolš za 110 kvadratnych mietraŭ.
U 2013 hodzie Rusamu vydzielili ŭčastak u «Drazdach-2».
U adroźnieńnie ad niekatorych inšych susiedziaŭ-čynoŭnikaŭ, jon zadumaŭ ścipły, nievialiki dom, mienšy za 300 kvadratnych mietraŭ. Adnak kab dabudavać jaho, vice-premjer nieŭzabavie vyrašyŭ uziać kredyt u banku.
Dom Rusych u «Drazdach-2».
Varta zrabić adstupleńnie i nahadać, što heta byŭ za čas. Paśla finansavaha kryzisu 2011 hoda amal usie banki spynili žyllovyja prahramy, atrymać kredyt na budaŭnictva žylla było małarealna. Naprykład, u «Biełarusbanku» zvyčajnym ludziam hrošy vydavalisia pad 35—40% hadavych. Dla tych, chto nie vieryŭ u tryvałaść nacyjanalnaj valuty, heta moh być prymalny varyjant. Ale dla atrymańnia bujnoj sumy hrošaj treba paćvierdzić svaju płaciežazdolnaść kaśmičnymi zarobkami.
Da taho ž kredyt u zvyčajnaj situacyi pieraličvajecca na rachunak zabudoŭščyka ci pradaŭcu žylla. A vice-premjeru, jaki ŭžo mieŭ učastak, hrošy mahli być patrebnyja tolki dla biahučych budaŭničych vydatkaŭ.
Tym nie mienš Rusamu ŭdałosia ŭziać u kredyt 750 miljonaŭ dadenaminacyjnych rubloŭ (75 tysiač rubloŭ paśla denaminacyi). Pa tahačasnym kursie heta $75 tysiač.
Infarmacyi pra toje, pad jaki pracent byŭ vydadzieny hety kredyt, u adkrytych krynicach niama.
Kredytnyja kalkulatary bankaŭ pakazvajuć, što, kab atrymać takija hrošy pa staŭkach taho času, treba było prademanstravać bolš za $10 tysiač štomiesiačnaha dachodu — u siabie i ŭ paručalnikaŭ.
Bankaŭskija rabotniki, apytanyja «Našaj Nivaj», zapeŭnili, što rašeńnie ab vydačy takoha kredytu nie mahło być pryniata biez uzhadnieńnia z kiraŭnictvam.
Uziatyja ŭ dziaržaŭnym banku 75 tysiač rubloŭ Michaił Rusy budzie addavać na praciahu 20 hadoŭ.
Michaił Rusy (druhi źleva, u harnitury).
Užo za pieršyja dva hady kurs dalara padskočyŭ udvaja. U vyniku kredyt abiasceniŭsia.
Cikavy fakt: pry rehistracyi svajho dabudavanaha katedža Rusy pakinuŭ dla praviarajučych orhanaŭ zajavu, u jakoj zapeŭniŭ, što pabudavaŭsia za ŭłasnyja hrošy, biez vykarystańnia lhotnych kredytaŭ.
