Zbornaja pa chakiei pakidaje elitny dyvizijon. Upieršyniu za 15 hadoŭ
Biełaruś — Aŭstryja — 0:4 (0:1, 0:3, 0:0)
Reuters.com
Hety matč nazyvali «matčam žyćcia». Paśla piaci hulniaŭ i ŭ biełarusaŭ, i aŭstryjcaŭ było pa piać parazaŭ. Praŭda, alpijskaja družyna mieła na rachunku adzin bał (adabrali jaho ŭ šviejcarcaŭ).
Chto b siońnia pieramoh, toj z 90% upeŭnienaściu harantavaŭ by sabie miesca ŭ elicie.
Ale biełarusy biazvolna sastupili — 0:4. Zdavałasia, što pieršaja šajba, prapuščanaja ŭ pieršym pieryjadzie, vypadkovaja, ale zatym atrymali try ŭ druhim pieryjadzie. Aŭstryjcy kožny raz realizavali bolšaść. U trecim pieryjadzie nijakaha biełaruskaha navału na čužyja varoty nie adbyłosia.
Šviecyja — 14, Rasija — 10, Čechija, Šviejcaryja — 9, Słavakija — 8, Francyja — 6, Aŭstryja — 4, Biełaruś — 0.
U apošnim tury biełarusy zhulajuć sa Słavakijaj, a Aŭstryja — z Čechijaj. Ale heta hulnia ničoha nie vyrašaje.
Zbornaja Biełarusi nie pakidała elitny dyvizijon z 2005 hoda (apošni raz vylatała ŭ 2003-m, kab na nastupny hod viarnucca). Darečy, u 2005-m zbornuju ŭznačaliŭ Hlen Chenłan.
***
Nahadajem, što biełarusy na hetym ČS prajhrali šeść matčaŭ z šaści: Šviecyi (0:5), Francyi (2:6), Rasii (0:6), Šviejcaryi (2:5), Čechii (0:3), Aŭstryi (0:4). U šaści matčach zakinuli ŭsiaho čatyry šajby, i toje tolki ŭ dvuch matčach.
Paśla parazy ad Rasii byŭ adpraŭleny ŭ adstaŭku Dejv Ljuis, ale hetaja kadravaja pierastanoŭka taksama ničoha nie vyrašyła.
Supiernikami ŭ nižejšym dyvizijonie (1A) ŭ nastupnym hodzie buduć zbornyja Vienhryi, Kazachstana, Litvy (što zavajavała pucioŭku z 1B), Słavienii i, vidać, Paŭdniovaj Karei (abo Narviehii), što taksama pakinie elitu. Miescy biełarusaŭ i karejcaŭ (narviežcaŭ) zojmuć zbornyja Vialikabrytanii i Italii.