Kreml adkazaŭ na ideju stvareńnia niezaležnaj ad RPC carkvy va Ukrainie
Kreml nie padtrymlivaje ideju aŭtakiefalii Ukrainskaj pravasłaŭnaj carkvy, zajaviŭ pres-sakratar prezidenta Rasii Dźmitryj Piaskoŭ, paviedamlaje RBK.
«Dziejańni, nakiravanyja na raskoł carkvy, naŭrad ci mohuć padtrymlivacca i naŭrad ci mohuć vitacca», — zajaviŭ Piaskoŭ, adznačyŭšy, što pazicyja RPC i jaje kiraŭnika patryjarcha ŭsioj Rusi dobra viadomaja.
Viarchoŭnaja rada padtrymała 19 krasavika zvarot prezidenta Ukrainy Piatra Parašenki da Kanstancinopalskaha patryjarcha Varfałamieja ab pradstaŭleńni aŭtakiefalii Ukrainskaj pravasłaŭnaj carkvie. Za adpaviednuju pastanovu prahałasavali 268 deputataŭ z 450.
«Vy, vaša śviataść, adziny čałaviek u śviecie, jaki maje kananičnaje prava i zakonnuju ŭładu vyrašać takoha rodu pytańni. Usia naša nacyja hladzić na Vas z hłybokaj pavahaj i nadziejaj, tamu što mienavita ŭ vašych siłach — padaryć nam adzinstva, mir i zhodu, u jakich my tak majem patrebu i jakich my tak doŭha byli pazbaŭleny», — piša prezident Ukrainy ŭ svaim zvarocie da patryjarcha Varfałamieja.
Jon padkreślivaje, što dabrasłavieńnie patryjarcha i dakumient ab aŭtakiefalii «dapoŭniać zaćviardžeńnie niezaležnaści i samastojnaści Ukrainy ŭ duchoŭnym vymiareńni».
U dakumiencie taksama ŭkazana, što pradastaŭleńnie aŭtakiefalii «stanie nie tolki ŭračystaściu pravasłaŭja, ale i aktam hłybokaj histaryčnaj spraviadlivaści», umacuje relihijnuju svabodu va Ukrainie, uzmocnić pravy i svabody hramadzian.
