98 — «za», 2 — «suprać». Deputaty prahałasavali za źmieny ŭ Zakon ab ŚMI, pa jakim buduć identyfikavać kamientataraŭ
Fota Voli Aficeravaj
Biełaruskija deputaty ŭ pieršym čytańni pryniali papraŭki ŭ Zakon ab ŚMI, zhodna ź jakimi kamientataraŭ na internet-forumach pavinny identyfikavać, a supracoŭniki internet-vydańniaŭ, jakija nie prajšli rehistracyju, pazbaŭlajucca statusu žurnalista.
Pradstaŭlaŭ źmieny ŭ Zakon ab ŚMI, jakija robiać bolš žorstkimi patrabavańni da internet-vydańniaŭ, novy ministr infarmacyi Alaksandr Karlukievič.
Papraŭki ŭ Zakon ab ŚMI, nahadajem, praduhledžvajuć dobraachvotnuju rehistracyju interniet-resursaŭ u jakaści ŚMI (ich buduć zvać «sietkavymi vydańniami»). Supracoŭniki niezarehistravanych internet-resursaŭ nie buduć ličycca žurnalistami i nie zmohuć źviartacca ŭ dziaržorhany i inšyja arhanizacyi pa akredytacyju dla svaich karespandentaŭ.
Taksama ŭvodzicca abaviazkovaja identyfikacyja tych, chto raźmiaščaje materyjały ŭ internet-resursach (nie tolki ŭ sietkavych vydańniach), u tym liku kamientataraŭ na forumach, dapuskajecca mahčymaść błakavańnia sacyjalnych sietak.
Zakon taksama zabaronić raspaŭsiud pradukcyi zamiežnych ŚMI ŭ Biełarusi biez najaŭnaści dazvołu, a redakcyi telekanałaŭ pavinny buduć zabiaśpiečyć u štotydniovym abjomie viaščańnia abjom telepieradač biełaruskaj (nacyjanalnaj) vytvorčaści nie mienš jak 30 pracentaŭ.
Pa słovach Alaksandra Karlukieviča, nieabchodnaść źmienaŭ u Zakon ab ŚMI źviazana ŭ tym liku z harmanizacyjaj biełaruskaha zakanadaŭstva z zakanadaŭstvam Rasiei i Kazachstana. A ŭ zaklučeńni deputackaj kamisii skazana, što «zakonaprajekt nakiravany na abaronu dziaržaŭnych i hramadskich intaresaŭ, nacyjanalnaj biaśpieki».
— Internet daloka nie zaŭsiody słužyć raźvićciu hramadstva i dziaržavy, — patłumačyŭ deputatam ministr infarmacyi nieabchodnaść źmienaŭ u zakon.
— Vy kazali pra vopyt Rasii i Kazachstana, a dośvied našych bližejšych krain-susiedziaŭ, Jeŭrasajuza, uličvaŭsia? — spytała deputat Alena Anisim.
— Surjozna vyvučałasia zakanadaŭčaja baza Jeŭrapiejskich krain — Hiermanii, Francyi, Vialikabrytanii, — zapeŭniŭ ministr.
— Čym vyklikana zachavańnie normy pazasudovaha paradku abmiežavańnia dostupu da internet-resursaŭ, - udakładniła adna z deputataŭ.
- Chutkaściami vyklikana, inakš rašeńnie budzie pryniata praz praciahły adrezak času.
Deputaty taksama pacikavilisia, ci nie syduć kamientatary paśla ŭviadzieńnia identyfikacyi ŭ internecie na inšyja, niebiełaruskija placoŭki.
- Identyfikacyja siońnia isnuje ŭ šmatlikich uładalnikaŭ internet-resursaŭ, i heta nie vyklikaje abureńnia, napeŭna, toj prahnoz, pra jakija vy kažacie, budzie tyčycca bujnych internet-placovak, jakija zacikaŭleny ŭ vialikich abjomach rekłamy. Kali spažyviec i tyja ŭdzielniki sacyjalnych sietak, elektronnaj prastory apryjory nie buduć vykonvać zakanadaŭčuju bazu i buduć sychodzić u niejkuju inšuju prastoru, ja nie baču ničoha strašnaha.
Kažučy pra toje, jak mienavita buduć identyfikavać kamientataraŭ ŭ internecie, ministr vykazaŭ zdahadku, što, mahčyma, «praz esemes budzie adpraŭlacca paviedamleńnie»