Biełaruś rašuča asudziła ŭdar pa siłach Asada
AP
U Biełarusi rašuča asudzili ŭdary, naniesienyja pa terytoryi Siryi 14 krasavika. Pra heta paviedamlaje MZS Biełarusi.
«Tym samym situacyja ŭ Siryi faktyčna pieratvarajecca ŭ miždziaržaŭny ŭzbrojeny kanflikt, jaki paciahnie dalejšuju niekantralavanuju eskałacyju, jakaja vychodzić za ramki rehijonu», — adznačyli ŭ viedamstvie.
U MZS Biełarusi zaklikali ŭsie baki nieadkładna spynić prymianieńnie vajennaj siły suprać inšych dziaržaŭ i šukać šlachi ŭrehulavańnia kanfliktaŭ mirnymi srodkami za stałom pieramovaŭ.
U zamiežnapalityčnym viedamstvie taksama adznačyli, što prymianieńnie zabaronienych vidaŭ zbroi masavaha paražeńnia nie pavinna zastavacca biez nastupstvaŭ. Adnak kroki ŭ adkaz pavinny hruntavacca na adnaznačnych i pravieranych faktach i rabicca ŭ strohaj adpaviednaści z normami mižnarodnaha prava.
«Nivodny z hetych kryteryjaŭ nie byŭ vykanany tymi, chto siońnia nanios udar pa Siryi», - padkreślili ŭ Ministerstvie zamiežnych spraŭ.
Na dumku MZS, Arhanizacyja pa zabaronie chimičnaj zbroi (AZCHZ) pavinna mieć mahčymaść terminova pravieryć infarmacyju ab prymianieńni chimičnaj zbroi ŭ Siryi i paviedamić vyniki rasśledavańnia Radzie Biaśpieki AAN.
«Ličym, što ŭsim čalcam Rady Biaśpieki AAN varta prykłaści maksimalnyja vysiłki dla vykanańnia ŭskładzienaj na ich mižnarodnaj supolnaściu zadačy pa adnaŭleńni i padtrymańni mižnarodnaha miru i biaśpieki», — padsumavali ŭ MZS Biełarusi.