Seksualny skandał u Šviedskaj akademii: kiraŭnica žury litaraturnaha Nobiela syšła ŭ adstaŭku
Sara Danius.
Kiraŭnica Šviedskaj akademii (arhanizacyja, jakaja vybiraje łaŭreata Nobieleŭskaj premii pa litaratury) Sara Danius padała ŭ adstaŭku. Pryčynaj hetamu staŭ seksualny skandał u akademii — u seksualnych damahańniach abvinavačvajecca adzin mužčyna, jaki maje ciesnuju suviaź sa Šviedskaj akademijaj. 56-hadovaja šviedka była pieršaj žančynaj, jakaja zajmała hetuju pasadu.
Sara Danius abviaściła pra svajo rašeńnie ŭ čaćvier paśla trochhadzinnaha ekstrannaha pasiadžeńnia siabraŭ akademii ŭ centry Stakholma. Jana skazała, što straciła ŭpeŭnienaść u svajoj ustanovie.
Publičny skandał vyklikaŭ aściarohi, što vobraz Nobieleŭskich premij i reputacyja Šviecyi za miažoj mohuć paciarpieć.
«Heta ŭžo surjozna paŭpłyvała na Nobieleŭskuju premiju, i heta davoli vialikaja prablema», — skazała Danius.
Adstaŭki adbyvajucca paśla taho, jak u štodzionnaj haziecie Dagens Nyheter ŭ listapadzie byli apublikavanyja zajavy 18 žančyn, jakija zajavili, što jany adčuvali hvałt z boku abvinavačanaha, źviazanaha sa Šviedskaj akademijaj.
U sieradu rada Nobieleŭskaha fondu rezka krytykavała Šviedskuju akademiju, zajaviŭšy, što arhanizacyja pahražaje zaplamić reputacyju Nobieleŭskaj premii. Akademija z tych časoŭ razarvała ŭsie suviazi z abvinavačanym i skaraciła hranty, zroblenyja jamu.
