Rasijski sajt: Makiej — najbolš prydatnaja fihura dla Zachadu ŭ jakaści novaha lidara Biełarusi
Užo bolš za dva tydni minuła sa Dnia Voli, a pakryŭdžany hołas rasijskich čarnasociencaŭ z hetaj nahody nie pierastaje danosicca z-za ŭschodniaj miažy. Na hety raz jany vydali novy artykuł «Razvažańni paśla Dnia Voli», u jakim śćviardžajecca, što Biełaruś paŭtaraje šlach Ukrainy, Uładzimir Makiej — hałoŭny «zachodnik» u biełaruskaj palitycy, a BPC nibyta zaihryvaje z vorahami «ruskaha śvietu».
Na dumku aŭtara, Dzień Voli ŭ Minsku byŭ jaskravym śviedčańniem taho, što Biełaruś pavolna i aściarožna kročyć ukrainskim šlacham. I ŭsie pieradumovy ŭ Biełarusi dla hetaha nibyta, jość.
Pieradumovy:
1. Patrabujecca histaryčnaja padzieja, da jakoj možna pryviazać mif ab baraćbie krainy za niezaležnaść, majučy na ŭvazie adryŭ ad Rasii.
Tut akcentujecca ŭvaha, što takim «mifam» i «chimieraj» źjaŭlajucca BNR i Dzień Voli.
2. Nieabchodna najaŭnaść aktyŭnaj rusafobskaj mienšaści, pažadana (ale nie abaviazkova) pryviazanaj da peŭnaj terytoryi.
Tut aŭtar uzhadvaje «litvinaŭ», jakija nibyta chočuć adarvać Biełaruś ad Rasii, i paraŭnoŭvaje ich z ukraincami-haličanami.
3. Drejf vyšejšaha kiraŭnictva ŭ bok Zachadu.
Tut plažać ministra zamiežnych spraŭ Uładzimira Makieja.
«Nielha nie zaŭvažać taho, što miesca hałoŭnaha biełaruskaha zachodnika va ŭładzie tryvała zamacavaŭ za saboj ministr zamiežnych spraŭ Biełarusi Uładzimir Makiej, pryčym raście jon u hetaj roli jak na draždžach, litaralna z kožnym dniom»,
— aburajecca aŭtar.
Uładzimir Makiej
Nie padabajucca aŭtaru i zajavy, jakija zrabiŭ Makiej u intervju kanału Euronews.
«Što da samoha Uładzimira Makieja, składana nie pryznać: na siońnia kiraŭnik biełaruskaha MZS — najbolš prydatnaja palityčnaja fihura dla Zachadu ŭ jakaści novaha lidara Biełarusi. Jon adnaznačna aryjentavany na Jeŭropu i ZŠA i hatovy «dyviersifikavać» adnosiny z Rasijaj. I, hałoŭnaje, jaho prymajuć u Łondanie. A intervju Euronews całkam možna ličyć prahramnym»,
— piša «Fond stratiehičieskoj kultury».
Čytajcie taksama:
Ministr Makiej: Dziaržava ŭpieršyniu praciahnuła ruku svaim apanientam
Makiej: Biełaruś i ES za dva hady dasiahnuli ŭ adnosinach bolšaha, čym za 20 hadoŭ sankcyj
4. Abaviazkova vysokaja aktyŭnaść sietkavych «rusafobskich» ŚMI.
Aŭtar źviartaje uvahu na adnosny pośpiech biełaruskich niedziaržaŭnych miedyja ŭ internecie. Hetyja resursy (Biełsat, Radyjo Svaboda) ŭ artykule nazyvajucca «rusafobskimi».
Adznačajecca, što ŭ fejsbuku daminuje «Radyjo Svaboda», jakoje maje ažno 130 tysiač padpisantaŭ u svajoj supołcy, što značna pieravyšaje kolkaść padpisantaŭ dziaržaŭnych i prarasijskich miedyja.
A voś na jutubie dobryja pakazčyki ŭ «Biełsata». Chacia kanał ANT maje bolš padpisantaŭ, čym Biełsat (100 tysiač suprać 60 tysiač), ale što da kolkaści realnych prahladaŭ pieradač na YouTube, Biełsat u internet-aŭdytoryi ŭ dziasiatki, a časam u sotni raz bolš papularny, čym ANT.
«Siońnia ŭ biełaruskaj apazicyi, u tym liku ŭ adkryta rusafobskaj, niama kankurentaŭ siarod internet-ŚMI, jakija adlustroŭvajuć pazicyju bolšaści biełarusaŭ»,
— piša aŭtar.
5. Udar pa pravasłaŭi znutry.
Znoŭ uzhadali ŭdzieł kiraŭnika Sinadalnaha infarmacyjnaha adździeła BPC Sierhija Lepina ŭ Dni Voli.
«Zaihryvańnie słužbovych asob Biełaruskaha ekzarchata z tymi, chto nienavidzić «ruski śviet» i Biełaruś u im, nadzvyčaj niebiaśpiečnaje: heta pramym šlacham pryviadzie da takich samych vynikaŭ, što i va Ukrainie»,
— papiaredžvajuć čarnasociency.
Sierhij Lepin
Udzieł BPC u Dni Voli jany paraŭnoŭvajuć ź dziejnaściu «raskolnikaŭ, unijataŭ i bandytaŭ-nacyjanalistaŭ».
Čytajcie taksama:
Pres-sakratar BPC na Dni Voli: «Słava Chrystu! Žyvie Biełaruś!»
