Čatyry byłyja fihuranty spravy «Biełaha lehijona» patrabujuć kampiensacyi maralnaj škody
Byłyja fihuranty spravy «Ab padrychtoŭcy masavych biesparadkaŭ» Andrej Dundukoŭ, Viktar Maroz, Siarhiej Strybulski i Viktar Daniłaŭ nakiravali kalektyŭny hramadzianski pazoŭ u sud Maskoŭskaha rajona Minska, paviedamlaje «Viasna».
Pazoŭniki prosiać kampiensavać maralnuju škodu, atrymanuju ŭ vyniku niezakonnaha zatrymańnia, pryciahnieńnia ich u jakaści abvinavačanych, utrymańnia pad vartaj, a taksama prymianieńnia padpiski ab niavyjeździe i naležnych pavodzinach. Adkaźnikam u spravie vystupaje Ministerstva finansaŭ.
Papiaredniaje sudovaje słuchańnie pryznačana na 27 sakavika, 14.30. Spravu budzie razhladać sudździa suda Maskoŭskaha rajona Volha Kraŭčanka.
U svaim pazovie byłyja fihuranty spravy «Ab padrychtoŭcy masavych biesparadkaŭ» spasyłajucca na artykuły 939 i 968-970 Hramadzianskaha kodeksu Biełarusi, jakija praduhledžvajuć pakryćcio maralnaj škody za košt dziaržaŭnaj kazny niezaležna ad viny taho, chto nanios škodu.
Nahadajem, kryminalnaja sprava «Ab padrychtoŭcy masavych biesparadkaŭ» (č.3 art.293 KK) była raspačataja KDB napiaredadni akcyi 25 sakavika 2017 hoda. U miežach jaje byli zatrymanyja bolš za 30 asobaŭ, jakija ŭtrymlivalisia ŭ śledčych izalatarach KDB i MUS, pastupova častka ź ich była vyzvalenaja z-pad varty i kryminalny pieraśled suprać ich byŭ spynieny, a 16-ci fihurantam było pradjaŭlenaje dadatkovaje abvinavačańnie pa artykule 287 KK — «Ab stvareńni niezakonnaha ŭzbrojenaha farmavańnia». Na momant, kali za kratami zastavalisia 14 fihurantaŭ spravy, SK paviedamiŭ, što pryniaŭ da vytvorčaści spravu ab stvareńni niezakonnaha ŭzbrojenaha farmavańnia, a kryminalny pieraśled tych ža asobaŭ na padstavie č.3 art.293 KK KDB spyniŭ.
27 listapada Śledčy kamitet spyniŭ kryminalny pieraśled ŭsich fihurantaŭ spravy pa art. 287 KK Biełarusi.
