«Pinskdreŭ» — rabaŭładalnickaje pradpryjemstva. Pradukcyja prapitana kryvioju i ślaźmi!» — źjaviłasia VIDEA. U chołdynhu kažuć: «Paklop!»
U sacsietkach źjaviłasia karotkaje videa, na jakim hrupa mužčynaŭ u maskach ahučvaje pretenzii da meblavaha chołdynhu. Siabie jany nazyvajuć «Radaj rabočych «Pinskdreva».
«Pinskdreŭ» — rabaŭładalnickaje pradpryjemstva, śćviardžajuć aŭtary videa i zaklikajuć klijentaŭ — asabliva rasijan — bajkatavać pradukcyju.
«My prapanavali ŭšanavać pamiać zahinułych ad vybuchu zavodu DSP chvilinaj maŭčańnia [U 2010 hodzie na zavodzie pa vyrabu DSP adbyŭsia vybuch, zahinuli 14 čałaviek — Red.]. Pa zavodzie biehali majstry i pahražali, što kali ŭ kaho-niebudź spynicca stanok, to taki čałaviek budzie zvolnieny», — kažuć mužčyny ŭ videazvarocie.
Taksama jany źviartajuć uvahu na častyja śmierci na pradpryjemstvie. Adznačym, što za 2 miesiacy 2018 hoda zahinuła ŭžo dvoje rabočych: u studzieni mužčynu traŭmavała abstalavańniem, a ŭ pačatku sakavika cieła apracoŭščyka draŭniny znajšli na terytoryi adnaho z pradpryjemstvaŭ chołdynhu.
Ale ci sapraŭdy ludzi na videa majuć dačynieńnie da pradpryjemstva? Ci viedaje načalstva, chto jany? Što čakaje pratestoŭcaŭ? Ci sapraŭdy była historyja z chvilinaj maŭčańnia?
Dyrektar pa pracy ź piersanałam «Pinskdreva» Mikałaj Truško paviedamiŭ, što pradpryjemstva padaść pazoŭ u sud. Padrabiazna adkazać na pytańni, ahučanyja ŭ videazvarocie, Truško nie zachacieŭ.
«My pojdziem u sud, padadzim pazoŭ za paklop. Videa toje zapisaŭ Dźmitry Kudranok, jaki ciapier u Rasii ci dzie. Usio, bolš nijakich kamientaroŭ», — paviedamiŭ jon.
Dźmitry Kudranok byŭ rabočym na «Pinskdrevie» i ŭznačalvaŭ padobnuju «Radu rabočych» jašče 6 hadoŭ tamu, paśla čaho byŭ zvolnieny.
Dźmitryj Kudranok siońnia sapraŭdy ŭ Rasii.
«Nie, zapisaŭ nie ja. Ja ž znachodžusia ciapier u palityčnaj emihracyi — mnie ŭ KDB abiacali, što ja ŭ Biełarusi pracy nie znajdu. Tak što fizična nie ŭ stanie. Ja b zapisaŭ lepš», — pažartavaŭ jon u kamientary dla «Našaj Nivy».
Kudranok pryjazžaŭ u Biełaruś dla ŭdziełu ŭ vybarach u miascovyja saviety (ad partyi «Spraviadlivy śviet»). Paśla znoŭ źjechaŭ
«Kiraŭnictva «Pinskdreva» moža zaraz kaža ŭsio, što zaŭhodna. Niekali im prapanavaŭ vysłuchać rabočych i pajści pa šlachu rašeńnia prablem. Jany vyrašyli zatykać rot ludziam i rabić vyhlad, što ničoha nie adbyvajecca i prablemy pracoŭnych ich nie datyčacca. Hetak ža samaje, možna kazać i pra ŭładu horada, jakaja była vydatna abaznanaja ab situacyi na pradpryjemstvie. Usie jany vyrašyli zasunuć hałavu ŭ piasok. Voś vynik.
Ja im zaŭsiody kazaŭ, što nielha da ludziej stavicca jak da bydła. Toje, što tam ciapier pačałosia - heta vynik sfalsifikavanych vybaraŭ, na jakich ja byŭ kandydatam. Nie budu kazać, jak u cełym pa Biełarusi, ale na majoj akruzie z dapamohaj prostych ludziej, navat tych, kaho ja asabista nie viedaju, byŭ arhanizavany taki kantrol, što najmienšyja adchileńni ad praŭdzivych vynikaŭ byli b adrazu bačnyja, što i abyłosia. Ludzi aburanyja, što ich padmanuli. Apošniaj ža kroplaj, jakaja pierapoŭniła čašu ciarpieńnia stała Niadaŭniaja čarhovaja śmierć rabočaha na lesabiržy (heta adno sa strukturnych padraździaleńniaŭ chołdynhu «Pinskdreŭ»), — kaža Kudranok
Varta adznačyć, što farmalna ŭ Biełarusi rabotniki majuć prava na zabastoŭku ci inšyja formy pratestu, ale ŭ realnaści ŭdzielnikaŭ pratestaŭ zvalniajuć.
