Muž viadučaj Radzinaj, plamieńnika zabiŭ u Krymie rasijski vajskoviec: piać faktaŭ pra novaha dyrektara «Biełaruśfilma»
Novym dyrektaram kinastudyi «Biełaruśfilm» staŭ 47-hadovy Uładzimir Karačeŭski, były kiraŭnik Teatra biełaruskaj dramaturhii.
Muzyka i śpiavak
Karačeŭski niekalki hadoŭ pracavaŭ nastaŭnikam muzyki, kiraŭnikom dziciačaj muzyčnaj studyi, paśla syšoŭ u kultarhanizatary.
Jon i sam udzielničaŭ u muzyčnych konkursach, śpiavaŭ i paśla taho, jak pačaŭ karjeru čynoŭnika.
«Adnojčy padčas śviatkavańnia novaha 2001 hoda mnie daviałosia vielmi šmat pracavać. Vystupaŭ na adkrytych placoŭkach i źlohku prastudziŭsia. Śpiavaŭ užyvuju, i prosta na scenie ŭ mianie adbyłosia niezmykańnie hałasavych źviazak. Zamoŭk jak śpiavak na try miesiacy. Pačaŭ adnaŭlać hołas pry dapamozie daktaroŭ. Heta amal atrymałasia, daktary mnie dazvolili śpiavać, ale vieści hastrolnaje žyćcio było ŭžo niemahčyma. Tak ja ŭśviadomiŭ, što tolki na hołas staŭku rabić nielha. Nie ŭ maich praviłach spyniacca i apuskać ruki. Tamu kali mnie prapanavali miesca śpiecyjalista pa kultury ŭ administracyi Savieckaha rajona Minska, ryzyknuŭ i pahadziŭsia. Pastupova ja daros da načalnika adździeła kultury», — kazaŭ Karačeŭski ŭ intervju «Viačerniamu Minsku».
Były čynoŭnik, papiarednik Dryhi
Z 2007 pa 2010 hod Karačeŭski ŭznačalvaŭ upraŭleńnie kultury Minharvykankama. Paśla čatyry hady pravioŭ na pasadzie namieśnika ministra kultury.
Karačeŭski niaredka padkreślivaŭ dva pytańni. Pieršaje — hrašovaje. Maŭlaŭ, dziaržava musić padtrymlivać prajekty, jakija pavinny akuplacca, kazaŭ pra patrebu pryciahnieńnia sponsaraŭ u śfieru kultury. Dy i sami ŭstanovy kultury pavinny dumać nie tolki pra tvorčaść, ale i pra hrošy.
«Čamu ni kinastudyja, ni śpiecyjalisty, jakija zajmajucca kinavytvorčaściu, nie šukajuć i nie zarablajuć dadatkovyja srodki na raźvićcio «Biełaruśfilma»? Čamu jany čakajuć tolki srodki ź biudžetu? Na moj pohlad, nieabchodna ŭklučać ŭsie resursy. A to adrazu pačynajuć kazać pra niejkuju składanuju sacyjalnuju situacyju», — aburaŭsia tady jašče namieśnik ministra kultury Karačeŭski padčas vizitu na «Biełaruśfilm».
Druhoje pytańnie — uvaha da «svaich». Karačeŭski kazaŭ, što ŭ pieršuju čarhu treba źviartać uvahu na miascovych vykanaŭcaŭ.
Vykazvaŭsia jon i pra biełaruskuju movu.
«My ŭ svoj čas vypuścili z-pad uvahi staŭleńnie da rodnaj movy. Raptam stali dziećmi śvietu, pačali vučyć anhlijskuju i zabyvać biełaruskuju. Kali moładź pačnie razmaŭlać pa-biełarusku, pačnie pavažać movu, tady i pieśni pačnuć źjaŭlacca. Viadoma, my starajemsia, kab u nas u kancertach hučali pieśni na biełaruskaj movie, i ŭsialak heta padtrymlivajem. Ale, na žal, jakasnaha materyjału pastupaje mała», — adznačaŭ Karačeŭski ŭ intervju partału ultra-music.com.
Ale ŭ mai 2014 Łukašenka źniaŭ Karačeŭskaha z pasady — jaho miesca zaniała Iryna Dryha.
«Kiraŭnik novaha typu»
Uładzimir Karačeŭski ŭznačaliŭ Teatr biełaruskaj dramaturhii ŭ tym ža 2014 hodzie paśla Ihara Sihava, jaki adpracavaŭ u RTBD kala 20 hadoŭ. Sihavu nie praciahnuli kantrakt, niahledziačy na padtrymku z boku kalektyvu teatra. Supracoŭniki RTBD navat pisali list tahačasnamu ministru kultury Barysu Śviatłovu, u jakim tłumačyli, čamu varta pakinuć na pracy byłoha kiraŭnika teatra.
Ale ich spadziavańni nie spraŭdzilisia, Śviatłoŭ patłumačyŭ, što Sihava źniali praź finansavyja prablemy. Maŭlaŭ, pakazčyki paharšajucca, hrošaj teatr nie zarablaje. Aproč taho, niečakanaja pravierki vyjaviła šerah parušeńniaŭ, i teatr byŭ aštrafavany.
Śviatłoŭ kazaŭ, što teatru patrebny «kiraŭnik novaha typu». U vyniku RTBD uznačaliŭ Uładzimir Karačeŭski.
Pryčym jaho pracu ŭ teatry kalehi acanili pazityŭna.
«Ja liču, što Karačeŭski ŭ RTBD dabiŭsia vialikich pośpiechaŭ. Jon nie bajaŭsia, staviŭ vostryja i hučnyja pjesy. Pry im pastavili «Karjeru doktara Raŭsa» Viktara Marcinoviča, maju pjesu «Pakryŭdžanaja Rasija», — kaža viadomy scenaryst i dramaturh Andrej Kurejčyk. — U Ministerstva kultury Karačeŭskaha pryvioŭ Pavieł Łatuška, i heta pakazčyk, što Karačeŭski čałaviek trochi druhoj farmacyi, čym inšyja čynoŭniki. Karačeŭski — małady technakrat, jak i sam Łatuška».
Muž Natalli Radzinaj
Karačeŭski žanaty z Natallaj Radzinaj — ale nie z hałoŭnym redaktaram «Chartyi», a z televiadučaj ANT. Jany ažanilisia ŭ 2013 hodzie.
Radzina naradziłasia ŭ rasijskim Bransku. Skončyła Branski piedahahičny ŭniviersitet pa śpiecyjalnaści «vykładčyk ruskaj movy i litaratury». Čatyry hady pracavała na Połackim rehijanalnym telebačańni ŭ jakaści karespandenta. Paśla pierajšła na ANT, dzie viadzie pieradaču «Naša ranica».
U 2014 hodzie ŭ pary naradziŭsia syn Arciom. Darečy, Radzinaj było 37 hadoŭ, kali jana stała mamaj.
U novaha kiraŭnika «Biełaruśfilma» ad minułaha šlubu jość darosłaja dačka Žanna, raskazvała «Kamsamolskaja praŭda».
Plamieńnika-majora zastreliŭ u Krymie ruski siaržant
Karačeŭski maje ŭkrainskija karani, jon rodam ź Biardzianska, tam ža žyvuć i baćki.
U krasaviku 2014 hoda jaho plamieńnika zastreliŭ rasijski vajskoviec. Ukrainski major Stanisłaŭ Karačeŭski paśla zachopu Kryma razam z adnavajskoŭcami rychtavaŭsia da vyjezdu va Ukrainu. Abstaviny kanfliktu z rasijskimi vajskoŭcami dahetul nieviadomyja.
Stanisłaŭ Karačeŭski.
«Ukrainskija aficery sprabavali znajści prytułak u vajskovym internacie. U pracesie pieraśledu na ŭsich piaci pavierchach rasiejcy ŭzarvali śvietłašumavyja hranaty. Kapitan Jarmolenka zdoleŭ schavacca ŭ pakoi. U hety čas zabojca, rasijski małodšy siaržant Zajcaŭ, zastreliŭ z aŭtamata majora Karačeŭskaha: adna kula — u tułava, inšaja — u hałavu». Paźniej Zajcava asudzili na 2 hady.
Paśla hetaj trahiedyi druhi plamieńnik Karačeŭskaha pierajechaŭ u Biełaruś.
