Pryvatnyja mižharodnija maršrutki abaviažuć adpraŭlacca z vakzałaŭ, a kiroŭcy suprać. Tłumačym, što adbyvajecca
Z 26 lutaha pačynajuć dziejničać novyja praviły mižharodnich pieravozak. Jany vielmi nie padabajucca kiroŭcam i vyklikajuć pytańni ŭ pasažyraŭ.
Ciapier pryvatnyja mižharodnija maršrutki adpraŭlajucca z roznych kropak haradoŭ. Naprykład, u Minsku histaryčna skłałasia, što mikraaŭtobusy na Salihorsk stajali na vulicy Kirava, a tyja, što jechali ŭ Hrodna, — z vulicy Družnaja. Kiroŭcam było niavyhadna zaklučać damovy z vakzałami, tamu jany zabirali pasažyraŭ prosta sa stajanak, časam nielehalnych.
Maršruty časam stanavilisia hnutkimi: jak było zručna kiroŭcam i pasažyram. Naprykład, na poźnich rejsach maršrutki razvozili klijentaŭ pa damach. Zabraniravać miescy taksama było prosta — adzin telefonny zvanok ci zajaŭka na sajcie. Uzhadniać maršruty ci raskład ruchu z uładami było nieabaviazkova.
Ciapier praviły źmieniacca. Ministerstvu transparta nie padabajecca, što pryvatnyja pieravozčyki majuć licenziju «nierehularnych pieravozak», a ŭ realnaści jeździać rehularna i płaciać mienšyja padatki. Da taho ž nichto nie sačyŭ za techničnym stanam maršrutak.
U vyniku dziaržaŭnyja aŭtaparki nie mahli kankuravać z pryvatnikami.
Mahčymyja źmieny nie radujuć kiroŭcaŭ. Jany navat stvaryli pietycyju, u jakoj prosiać Mintrans unieści papraŭki ŭ zakon, kab jon «nie pieraškadžaŭ pracavać». U pietycyi tłumačacca i noŭvaŭviadzieńni:
«Maršrutčykaŭ abaviažuć adpraŭlacca tolki z vakzała, jeździć pa vyznačanym maršrucie i spyniacca tolki na kankretnych prypynkach, raspracavać raskład, intervały ruchu transpartnych srodkaŭ, kolkaść rejsaŭ pa maršrucie i inšaje. Pry hetym pieravozčyki pavinny buduć płacić za pasłuhi apierataru aŭtamabilnych pieravozak i aŭtavakzała».
Pryvatnyja pieravozčyki buduć pavinny pradastavić dziaržavie dadzienyja pra kolkaść i stan mašyn. Jany prapracujuć try miesiacy. Paśla budzie praviedzieny konkurs, na jakim vybieruć tych, chto atrymaje prava pracavać pa novych praviłach. Inšym pryjdziecca zakryć biznes ci zamarozić jaho ŭ čakańni novaha konkursu, kažuć pieravozčyki.
Nasamreč pytańniaŭ šmat i ŭ pasažyraŭ, i ŭ kiroŭcaŭ. Tolki adkazvać na ich pakul achvotnych nie znachodzicca.
U adździele pasažyrskich pieravozak minskaha aŭtavakzała «Centralny» «Našaj Nivie» paviedamili, što detalaŭ novaŭviadzieńniaŭ nie viedajuć. Ale skazali, što da ich dla zaklučeńnia damovy źviarnuŭsia pakul tolki adzin pieravozčyk.
Va ŭpraŭleńni pasažyrskich pieravozak «Minsktransa» adkazać na pytańni taksama nie zmahli.
Źviazacca z pradstaŭnikami Ministerstva transpartu nie atrymałasia.
Tym časam, chtości ź pieravozčykaŭ pakul nie pradaje kvitki na dni paśla 26 lutaha. A chtości płanuje pracavać pa starych schiemach.
«Pakul my pracujem, jak pracavali. I budziem praciahvać, pakul nie raźbiaremsia, što my parušajem, — paviedamiŭ «Našaj Nivie» dyrektar adnoj ź firm-pieravozčykaŭ. — U mianie pytańniaŭ nakont hetych novaŭviadzieńniaŭ bolš, čym u vas. Zaklučać damovu z apierataram? Z vakzałam? A navošta mnie vakzały? Jany pasažyraŭ mnie dadaduć? Nie».
