Zabojcu hrodzienskaha muzykanta asudzili ŭ Rasii na 8 hadoŭ kałonii
Arciom Samojłaŭ
U Praŭdzinskim rajonnym sudzie (Kalininhradskaja vobłaść) vynieśli prysud pa spravie ab zabojstvie hrodzienskaha muzykanta Arcioma Samojłava. 30-hadovy hramadzianin Rasii vinu pryznaŭ častkova i atrymaŭ 8 hadoŭ turmy, paviedamili ŭ pres-słužbie Praŭdzinskaha rajonnaha suda.
Što zdaryłasia
U vieraśni 2017 hoda muzyka razam sa svaimi siabrami z Hrodna adpraviŭsia ŭ Kalininhradskuju vobłaść u pasiołak Jermakova na zarobki. Za niekalki dzion da adjezdu dadomu Arcioma zabili.
Sud ustanaviŭ, što ŭ noč na 24 vieraśnia 2017 hodu asudžany ŭ stanie ałkaholnaha apjanieńnia ŭ chodzie kanfliktu nanios haradziencu nie mienš za 10 udaraŭ pa hałavie kułakami i hałavoj. Ad atrymanych traŭmaŭ Arciom pamior na miescy.
«Zabivać nie chacieŭ»
Asudžany vinu pryznaŭ častkova, skazaŭšy, što nie chacieŭ zabivać paciarpiełaha. Pavodle jaho viersii, svarka adbyłasia z-za taho, što jon adrezaŭ hrodziencu vałasy, sabranyja na patylicy ŭ kasičku. U taho heta vyklikała lutaść i jon udaryŭ kryŭdziciela. Zaviazałasia bojka, małady čałaviek upaŭ i ŭdaryŭsia hałavoj.
Śledstva kvalifikavała dziejańni abvinavačanaha pa č. 4 art. 111 KK RF jak naŭmysnaje pryčynieńnie ciažkaj škody zdaroŭju, niebiaśpiečnaj dla žyćcia čałavieka, što paciahnuła pa nieaściarožnaści śmierć paciarpiełaha.
Sud pryznaŭ vinu padsudnaha całkam dakazanaj i pahadziŭsia z farmuloŭkaj abvinavačvańnia, zajaŭlenaj Śledčym kamitetam Kalininhradskaj vobłaści. Pry pryznačeńni pakarańnia sud uličyŭ źmiakčalnyja akaličnaści: jaŭku z pavinnaj, raskajańnie, sadziejničańnie rasśledavańniu, a taksama najaŭnaść šaści małaletnich dziaciej i toj fakt, što padsudny sam vyklikaŭ chutkuju dapamohu da miesca złačynstva.
U vyniku zabojca hrodzienca byŭ pryhavorany da vaśmi hadoŭ pazbaŭleńnia voli z adbyvańniem pakarańnia ŭ kałonii strohaha režymu. Prysud nie ŭstupiŭ u zakonnuju siłu.
