Zianon. Novyja vieršy
Vieršy apublikavanyja ŭ litaraturnym almanachu biełarusaŭ zamiežža «Biełarus» za 2017 hod.
Na chvilinu zadumaŭsia
Naziraju za vobłakami.
Chvali raki. Viecier šumić. Sierabrycca vada.
Pach chvajovy,
Daloki sinieje les.
Ajčyna.
Žanočyja hałasy.
Choraša i pryhoža.
I ŭsio ž taki,
Niekali skončycca hety śviet,
I stanie hroš cana
Bahaćciu, straściam, pieramoham.
I źniknie ŭsio, jak dym nad polem,
I vieršu ścipłamu majmu
Nichto nie adzaviecca.
I schaładzieje Kraj.
Pad vialikim čyrvonym Soncam
Kružlaje pustaja Ziamla
I Miesiac kryvavy nikomu śviecić.
Tak budzie. Tak pryjdzie
Žnivo na ideały.
Tolki dla niečaha
Nad pryrodaj
Pakul što
My byli i žyviem
U charošym, pryŭkrasnym,
Nadzvyčajna dzivosnym Śviecie.
Peŭna jość dzie jaho praciah
I srabrystyja zory,
I vietłyja hałasy,
I anioły na kryłach latuć…
Ci ž bo chto tudy trapić,
Što zabyŭsia pra pryšłaść,
Pra vielič i skruchu
I hodnaść svaju pramianiaŭ
Na źniknieńnie?
Paškadujma apošnich ludziej,
Što straciać Ajčynu,
Što nia ŭbačać nikoli
Ni novaj Ziamli,
Ni lubovi,
Ni novaha Nieba.
Paškadujma siabie,
Bo tolki Viera ŭratuje nas.
4.06.2014
3 cyklu «Travień» (2016 h.)
* * *
Rańniaje sonca i višnievy ćviet
Znoŭ ja ŭbačyŭ u traŭni
Na schile žyćcia.
* * *
Biełyja višni ćvituć,
Źvisajuć cieraz parkan
U čužoj krainie.
* * *
Pisać pra charastvo
(Navat sabie) — varta,
Kab viedać, što praŭda žyvie.
* * *
Promni bliskočuć u kviecieni hruš.
Vietryk majovy…
Usio heta jšče isnuje.
Tolki nadta ž daloka
Apynuŭsia ja ŭ hetym śviecie.
* * *
Višnievy ćviet
U cieniu adryny
Zichcicca na fonie ściany.
Havareńnie
Vulka doŭha havaryła
Bieź pierapynku.
I raptam spyniłasia
I maŭčyć.
— Dyk niachaj Vulačka Dalej havoryć, —
Kaža Vićka, —
Kab zdavałasia,
Što žyćcio
nie spyniajecca.
27.04.2016
Vudačnik
Rybku łović ad hultajstva,
Hladzić na papłavok,
A na vyhlad — mudrec.
27.04.2016
Zaloty
A Vulka słova skaža dy j rahoča.
— I sam nia viedaju, jak tut być, —
Dumaje Vićka.
27.04.2016
Płyń
Žyvie toje, što imkniecca da viečnaści.
Tak pabudavana pryroda,
Jakaja ŭznaŭlaje siabie biaskonca.
15.IX.2016
3 cyklu «Travień» (2017 h.)
* * *
U lesie majovym —
Pad hruzam hadoŭ —
Pačuŭ ja čaromchi pach.
* * *
U travieńskim śniezie
Biaroza źbialeła —
Jak na viasielli staić.
* * *
Što tak dzivosna byvaje viasnoj?
Nad biełym ćvicieńniem kružlaje ŭ pavietry
Chałodny majovy śnieh.
9.05.2017. Vilnia
* * *
Kali travieński śnieh viesnavy
Spadaŭ na pasochły čarot,
Uspomniŭ ja vosieński viecier.
* * *
Travieński śnieh pralacieŭ…
Daŭno-daŭno ŭ junactvie
Hetaksama było.
* * *
Navat nia viedaju,
Čamu tak śpiavaje duša,
Kali ŭ čas viesnavy
Na ćvitučyja višni
Apuskajecca travieński śnieh.
* * *
Majskaja poŭnia ŭzyšła,
Cichi čas,
I piaje sałaviej.
