Voś taki «Biełaruski viečar» u Łondanie: harełka, sieladziec, «Charoški»
«Padzialusia ŭražańniem ad svajho naviedvańnia padziei «of celebration of Belarusian and food, music, film, poetry, literature, and more» u Łondanie», — piša ŭ siabie ŭ fejsbuku biełarus, aŭtar «Našaj Nivy» Aleś Hierasimienka, jaki ciapier vučycca ŭ stalicy Vialikabrytanii.
Fota sa staronki Alesia Hierasimienki ŭ fejbuku.
«Padzieja była niezvyčajnaja tym, što była arhanizavanaja ŭ adnoj z łondanskich sinahoh. Dy nie prostaj, a Reform! Ja trapiŭ na padzieju, bo arhanizatary chacieli bačyć kahości ź Biełarusi.
Na ŭvachodzie ŭ sinahohu mianie sustreŭ chłopiec, apranuty ŭ styli tancoraŭ ansambla «Charoški». Jon pa-rasiejsku z akcentam prapanavaŭ mnie pakaštavać chleb z sollu. Takuju reč ja bačyŭ tolki ŭ televizary. Ja skazaŭ, što ŭžo dobra paviačeraŭšy, i prajšoŭ u zalu.
Reform-sinahoha akazałasia vielmi padobnaj da školnaj aktavaj zały. U zale stajali stały, a za imi siadzieli pradstaŭniki łondanskaj habrejskaj dyjaspary. Pieravažna, pa vyhladzie, piensijaniery. Jany jeli sieladziec i zapivali jaho kaniešnie ž… harełkaj. Uvachod kaštavaŭ niedzie 30 rubloŭ.
U zale taksama byŭ arhanizavany bar. Vybar byŭ nie vielmi šyroki: kampot albo harełka.
Ja ŭziaŭ kampot, prajšoŭ da svabodnaha stała i sieŭ, čakajučy na zajaŭlenuju biełaruskuju muzyku, paeziju i litaraturu. Da mianie padyšła arhanizatarka, jakaja skazała, što ja adziny biełarus na hetym viečary.
Pierformans pačaŭsia z prezientacyi dabračynnaha prajekta, jaki arhanizavaŭ hetu padzieju. Prajekt zaviecca The Together Plan. Jaho ideja prostaja: bahatyja łondanskija habrei maralna i materyjalna dapamahajuć biednym habrejam ź Biełarusi, jaki pieražyli Chałakost.
Na ekranie źjavilisia foty žančyny ź Viciebska, jakaja vyhladała na hadoŭ 70. Pačaŭsia raspoviad pra biełaruskich habrejaŭ i Chałakost.
Paśla pačałosia znajomstva ź Biełaruśsiu. Ź jaho možna było zrabić vysnovu, što ŭ Biełarusi žyło šmat habrejskich mastakoŭ. Tam taksama i pjuć šmat vodka, i zajadajuć jaje sialodkaj i krekierami. Prahučała niekalki muzyčnych kampazicyj: habrejskich i rasiejskich. Taksama ja daviedaŭsia, što šmat amierykanskich halivudskich dziejačaŭ pachodziać z Rasii. U Biełarusi była miaža asiedłaści, paśla revalucyja, paśla Druhaja suśvietnaja i Chałakost, paśla byŭ Čarnobyl.
Ułasna biełaruskaj kultury tyčyŭsia tolki adzin momant viečara: vierš Kupały, začytany chłopcam z «Charošak». U astatnim vyhladała, što Biełaruś — heta takoje miesca, dzie žyło šmat habrejaŭ, ale ŭsie ŭžo źjechali albo byli zabityja. Niekalki, praŭda, zastałosia, i ich treba terminova ratavać. U Biełarusi taksama lubiać habrejskija śpievy i tancy, rasiejskuju muzyku, savieckija rečy i harełku. Taksama tam jość niekalki dziŭnych ludziej, jakija pišuć vieršy pa-biełarusku.
Voś takaja Biełaruś.
Nastupny viečar «pra Biełaruś» adbudziecca ŭ Łondanie 8 krasavika».
