Z pałonu ŭ Livii vyzvalili byłoha biełaruskaha śpiecnazaŭca
Fota Vadzima Zamiroŭskaha
Z pałonu ŭ Livii vyzvalili byłoha biełaruskaha śpiecnazaŭca. Viačasłaŭ Kačura byŭ u źniavoleńni ź leta 2011 hoda. Jaho vyzvaleńniu paspryjali rasijskija dypłamaty. Biełarus užo viarnuŭsia na radzimu, u aeraporcie jaho sustrakali dačka i syn, jon pajechaŭ dachaty ŭ Marjinu Horku, paviedamlaje tut.by.
Viadoma, što Kačura, były načalnik štabu 334-ha asobnaha atrada śpiecnazu HRU SSSR, słužyŭ u Afhanistanie, u Livii znachodziŭsia z červienia 2011-ha ŭ jakaści vajennaha śpiecyjalista. Jon pryjechaŭ u składzie hrupy mižnarodnych śpiecyjalistaŭ ź Biełarusi, Ukrainy i Rasii. Užo praz dva miesiacy ich zatrymali livijskija revalucyjaniery. Vajennym śpiecyjalistam vystavili abvinavačańnie ŭ supracoŭnictvie z režymam Kadafi. Častku zatrymanych paźniej udałosia vyzvalić, a biełarus zastavaŭsia za kratami.
Jak paviedamiŭ kiraŭnik rasijskaj kantaktnaj hrupy pa ŭnutrylivijskim urehulavańni Leŭ Dziańhoŭ, vyzvaleńnie Viačasłava Kačury stała mahčymaje paśla doŭhich pieramoŭ. Pytańniem vyzvaleńnia zajmaŭsia asabista kiraŭnik Čačni Ramzan Kadyraŭ, jaki kaardynavaŭ svaje dziejańni z MZS Rasii, Biełarusi, z KDB, dadaje ria.ru.
Adznačajecca, što Kačura adčuvaje siabie dobra. Apošnim časam jon znachodziŭsia ŭ lepšych umovach — jaho ŭdałosia pieravieści ŭ turmu ŭ horadzie Trypali.
