Davydźka pra «Chartyju’97»: Kali da vas prychodzić u hości zamiežnik i hadzić na dyvan, vy majecie prava nie puścić jaho ŭ dom
«Moj punkt hledžańnia prosty: kali da vas prychodzić u hości zamiežnik i hadzić na dyvan, vy majecie prava jaho na dziasiaty raz prosta nie puścić u dom … Začynili fortku, ź jakoj brudnaje pavietra išło ŭ naš dom … Novy hod pačynajecca z ačyščeńnia. Treba zaŭsiody vymyć kvateru i vyčyścić usio toje, što zaminaje narmalna raźvivacca».
Pra heta zajaviŭ staršynia Biełteleradyjokampanii i kiraŭnik «Biełaj Rusi» Hienadź Davydźka ŭ efiry «Kłuba redaktaraŭ» na «Biełaruś 1», kamientujučy błakavańnie sajta «Chartyja'97».
«Da svabody słova heta maje dastatkova ŭskosnaje dačynieńnie, bo za 20 hadoŭ i hety sajt, i mnohija inšyja sajty pisali ŭsio, što zaŭhodna, u tym liku krytykujučy ŭładu. Moža być, časam nie zaŭsiody kanstruktyŭna, z vypadami ŭ bok asobnych čynoŭnikaŭ — kali łaska. Ale kali pačynajucca ekstremizm, zakliki da niezakonnych dziejańniaŭ… I kali pry hetym vykarystoŭvajecca internet-resursy, heta pavinna pierapyniacca hetaksama, jak heta pierapyniajecca i ŭ nievirtualnym žyćci. Kali ty kahości abražaješ na vulicy, ty paniasieš pakarańnie. A ŭ internecie heta čamuści stała normaj, kali ŭ niejkich artykułach ci kamientarach možna lubymi słovami abrazić čałavieka, i našy pravaachoŭnyja orhany nie źviartajuć na heta nijakaj uvahi», — aburyŭsia kiraŭnik Uładzimir Piarcoŭ, kiraŭnik pradstaŭnictva telekanał «Mir» u Biełarusi i ziać byłoha pieršaha namieśnika Administracyi prezidenta Alaksandra Radźkova.
Redaktar «Sovietskoj Biełoruśsii» Pavieł Jakubovič źviarnuŭ uvahu, što błakavańnie «Chartyi» — pasłańnie astatnim udzielnikam miedyjaprastory: «Treba zrabić prostuju vysnovu: nie zabyvajcie, što svaboda słova — adkaznaja reč. Pieratvaracca u zbroju masavaha źniščeńnia nie varta».
