Jakaŭleŭski: Rumynija ŭ svoj čas admoviłasia pryniać ambasadaram Maksima Ryžankova
Azerbajdžan admoviŭsia vydać ahreman, to bok dać papiaredniuju zhodu, na pryznačeńnie rasiejskaha dyplamata Hieorhija Zujeva ambasadaram u Baku. Svaboda pacikaviłasia, ci byli padobnyja vypadki ź biełaruskimi dyplamatami.
«Nadzvyčajnaj sytuacyjaj» nazvaŭ takoje rašeńnie ŭ efiry radyjostancyi «Echo Moskvy» były namieśnik ministra zamiežnych spraŭ Rasiei, a ciapier viadučy navukovy supracoŭnik Instytutu ŭsiaśvietnaj ekanomiki i mižnarodnych dačynieńniaŭ Hieorhi Kunadze.
«Heta dosyć redkaja reč. Admova ŭ vydačy ahremana ambasadaru inšaj krainy — heta, viadoma ž, ja b skazaŭ, nadzvyčajnaje zdareńnie», — padkreśliŭ jon.
Vypadak z Ryžankovym
A ci byli padobnyja vypadki ŭ historyi sučasnaj biełaruskaj dyplamatyi? Na hetaje pytańnie Svabody presavy sakratar Ministerstva zamiežnych spraŭ Biełarusi Dźmitry Mirončyk adkazaŭ, što takija vypadki jany nie kamentujuć.
«Zapyt ahremanu i adkaz na jaho — stanoŭčy abo admoŭny — jany nikoli publična nie anansujucca i nie kamentujucca», — skazaŭ jon.
Mižnarodny ahladalnik Raman Jakaŭleŭski kaža, što i ź biełaruskimi dyplamatami byli padobnyja zdareńni. Ale pakolki aficyjnaj infarmacyi nakont hetaha nia znojdzieš, to surazmoŭca moža z poŭnaj upeŭnienaściu kazać pra adzin vypadak. Jon tyčycca ciapierašniaha pieršaha namieśnika kiraŭnika prezydenckaj administracyi Maksima Ryžankova, jaki raniej pracavaŭ u ambasadzie Biełarusi ŭ Polščy.
Maksim Ryžankoŭ. Fota Siarhieja Hudzilina.
«Padčas jahonaj kadencyi ŭ dvuchbakovych dačynieńniach uźnikła napružanaść, jakaja vyliłasia ŭ asymetryčnuju vysyłku z krain pa niekalki dyplamataŭ, — uzhadaŭ Jakaŭleŭski. — Ryžankoŭ byŭ vymušany viarnucca ŭ Miensk. Praź niejki čas, pavodle nieaficyjnaj infarmacyi, biełaruski bok nakiravaŭ zapyt na pryznačeńnie jaho ambasadaram u Rumyniju. Ale Bucharest nia daŭ ahremanu, bo isnuje praktyka salidarnaj palityki krain Eŭraźviazu».
