Rasija pierakidvaje na biełaruskija składy tanki i harmaty? Nie, heta čarhovy fejk
Dniami ŭ biełaruskich ŚMI źjaviłasia infarmacyja pra toje, što «Rasija zaviazie na biełaruskija składy svaje tanki i harmaty», heta nibyta adbudziecca ŭ ramkach padrychtoŭki da vajny.
Pry hetym aŭtary spasyłajucca na prajekt prahramy Sajuznaj dziaržavy «Ab udaskanaleńni abjektaŭ vajskovaj infrastruktury».
Aŭtary davodziać, što ŭ ramkach hetaj damovy płanujecca pierakinuć u Biełaruś rasijskuju vajennuju techniku i zbroju.
Ale ci tak heta? Davajcie raźbiaremsia.
Tekst hetaj damovy i płan mierapryjemstvaŭ dastupny na pravavych partałach Biełarusi i Rasii (dostup da servisa «Etałon-anłajn» płatny).
Pra što tam havorycca? Dakumient kanstatuje, što častka vajskovaj infrastruktury Biełarusi i Rasii znachodzicca ŭ zaniadbanym abo niesučasnym stanie, što stavić pad pahrozu efiektyŭnaść jaje vykarystańnia.
Tamu, maŭlaŭ, treba pravieści madernizacyju.
U pryvatnaści, za hrošy ź biudžetu Sajuznaj dziaržavy płanujecca kapitalny ramont lotnišča i sistemy ciepłazabieśpiačeńnia Baranavickaj avijabazy, kapitalny ramont lotnišča ŭ Mačuliščach, pabudova padjazdnych daroh da asobnych vajskovych častak, ramonty schoviščaŭ, reziervuaraŭ i radyjopieradajučych pryładaŭ.
Heta što datyčyć Biełarusi, u Rasii taksama šerah vajskovych abjektaŭ projdzie madernizacyju i ramont.
Dola Biełarusi ŭ finansavańni hetaha prajektu — 35%, Rasii — 65%.
Varta adznačyć, što anałahičnaja prahrama «Udaskanaleńnia abjektaŭ vajennaj infrastruktury» užo pravodziłasia ŭ 2008-2012 hadach. Źmiest toj prahramy (z ulikam roźnicy madernizavanych abjektaŭ) całkam adpaviadaje prahramie na 2016-2019 hady. I, jak bačna, biełaruskija składy nie zapoŭnilisia rasijskaj technikaj i zbrojaj u papiarednija hady. Niama padstavaŭ mierkavać, što niešta ekstraardynarnaje zdarycca i ciapier.
Zrešty, u hetym dakumiencie nie viadziecca havorki ni pra jakija harmaty i tanki.
Možna padumać, što aŭtary fejka pierabłytali hety dakumient z pahadnieńniem «Ab sumiesnym techničnym zabieśpiačeńni rehijanalnaj hrupoŭki vojskaŭ», u jakim adznačajecca, što ŭ razie «narastańnia vajennaj pahrozy» dla Biełarusi Rasija moža dać nam svaju zbroju. Ale havorka viadziecca tolki pra «žaleza» biez asabovaha składu.
Adnak navat hety dakumient kaža, što takoje moža adbycca tolki pry kankretnych umovach, a «zialonyja čałaviečki» mohuć uvajści na terytoryju Biełarusi tolki ŭ razie pačatku bajavych dziejańniaŭ pamiž Biełaruśsiu i treciaj krainaj.
A ŭ hetym naviny nijakaj niama.
Taksama varta nahadać, što staŭleńnie biełaruskich uładaŭ da prysutnaści rasijskich vojskaŭ na terytoryi Biełarusi demanstruje chacia b toje, što napiaredadni vučeńniaŭ «Zachad-2017» na ŭzroŭni Hienštaba rasijskamu boku byli vystaŭlenyja limity na znachodžańnie vajskovaj techniki na terytoryi našaj krainy. Hety (u tym liku) krok vyklikaŭ choład pamiž vajskovym kiraŭnictvam krain: na hałoŭnuju arenu vučeńniaŭ, u Biełaruś, nie źjavilisia ni Uładzimir Pucin, ni ministr abarony Siarhiej Šajhu.
Čytajcie taksama: Pucin pieradaŭ FSB kantrol nad miažoj Biełarusi? Pahraničny kamitet: Heta łuchta
***
Na telehram-kanał «Našaj Nivy» možna padpisacca tut.
