Heta navat lepš, čym basiejn i pasiadziełki ź siabrami. Masaž tvaru: raskazvajem
Razam z doktaram-fizijaterapieŭtam i fitaterapieŭtam, kaśmietykam Taćcianaj Hančar prabiahajem pa asnoŭnych vidach masažu tvaru, vyznačajem, kamu i dla čaho jany patrebnyja i što značyć trapić u dobryja ruki ŭ samym pramym sensie.
U ideale, kaśmietyčny masaž tvaru treba rabić kožnaj žančynie, jakaja choča jak maha daŭžej zastavacca pryhožaj i maładoj, upeŭnienaja Taćciana. Jość roznyja mierkavańni, ale, na jaje dumku, pačynać možna ŭžo ad 25 hadoŭ, kali aktyvizujecca naturalny praces stareńnia skury i hihijeničnaha dohladu i masak stanovicca niedastatkova.
Jakija masažy tvaru byvajuć
Samy papularny — kaśmietyčny masaž z kremam. Jość ełastyčny masaž, jon idzie bolš jak lačebny i zaklučajecca ŭ šerahu naciskańniaŭ. Jaho prymianiajuć pry hłybokich marščynach, a taksama dla skury sa źnižanaj zdolnaściu supraciŭlacca miechaničnym uździejańniam.
Masaž pa Žakie rekamiendujuć prymianiać dla prablemnaj skury z zapaleńniami i hnajnikami. Jon robicca tolki pa talku, biez vykarystańnia kremaŭ. U jaho asnovu zakładzienyja ruchi-paščypvańni pa peŭnych schiemach.
U limfadrenažnym masažy ŭsio zvodzicca da dobraha viedańnia limfatyčnych sasudaŭ i limfavuzłoŭ. Pracedura dazvalaje chutka pryvieści siabie ŭ normu, prybrać acioki, pastoznaść.
Apošnim časam nabyvaje papularnaść chiramasaž. U kaśmietałahičnych centrach jaho padajuć jak alternatyvu płastyčnaj chirurhii. Raspracavaŭ jaho ispanski doktar-dermatołah pry kancy minułaha stahodździa. Jon vyvučyŭ usie mahčymyja ŭschodnija mietodyki masažu, padklučyŭ štości svajo, i atrymałasia hetakaja revalucyjnaja sistema. Hety masaž doŭžycca davoli doŭha, navat da hadziny. I ŭździejańnie adbyvajecca nie tolki na tvar, ale i na šyju, vobłaść dekalte, plečavuju zonu. Sam pa sabie masaž vielmi pryjemny, paśla jaho ŭźnikaje pačućcio hłybokaha supakajeńnia. To bok praceduru možna razhladać jak dobry naturalny antydepresant.
Darečy, zvyčajna masaž doŭžycca da 15 chvilin. Na maju dumku, hadzina masažu — heta ŭžo pierabor. Pa-pieršaje, heta robić praceduru bolš darahoj. Pa-druhoje, nie ŭ kožnaj žančyny jość tak šmat času. Z punktu hledžańnia kaśmietołaha, maska paśla masažu tvaru, to bok na padrychtavanuju skuru, robić praceduru našmat bolš efiektyŭnaj. Asabliva dobraja maska. Kali ž masaž doŭžycca hadzinu, to kudy jašče i masku rabić?
Što masaž daje žančynie
Padčas masažu žančyna atrymlivaje hłybokaje zadavalnieńnie. U naš čas, kali mora stresaŭ, kali ty ŭvieś čas niekudy biažyš, kali jość siamja, praca, to nasamreč paprostu nie zastajecca času na siabie.
Kali brać dastupnyja rełaks-pracedury, tuju ž łaźniu, basiejn, špacyr, pasiadziełki ź siabrami, toje, što dapamahaje źniać stres sučasnaj žančynie, ja b pastaviła masaž tvaru na pieršaje miesca pa efiektyŭnaści. Paśla jaho ty adčuvaješ siabie całkam pierazahružana. I ŭžo paśla pieršaj, paśla druhoj pracedury ty atrymlivaješ dobry tvar. Skura padciahvajecca, razhładžvajecca, prybirajecca aciočnaść. Ty bačyš efiekt adrazu.
Ale, kaniečnie, masaž pravodziać sistemna. Kab byŭ adčuvalny efiekt, patrebna ad šaści da dziesiaci pracedur viasnoj i vosieńniu. Rekamiendujuć padtrymlivać dasiahnuty stan praceduraj kali nie raz na tydzień, to raz na dva tydni ci chacia b raz na miesiac.
Što nielha zrabić samomu
Naturalna, masažnyja linii lubaja žančyna moža vyvučyć samastojna, bo heta hałoŭnaje praviła masažu — uździejničać vyklučna pa masažnych linijach. Kožnaja žančyna moža rabić elemientarnyja pahładžvańni i pachłopvańni pa hetych linijach, pakul ranicaj ci ŭviečary nanosić na tvar krem.
Ale ž samy važny elemient masažu, raźminańnie, što zakładzienaje ŭ asnovu, jakoje daje hety efiekt padciahvańnia, sam sabie nie zrobiš. Bo dla hetaha treba znachodzicca ŭ rassłablenym stanie, a adnačasova być rassłablenym i pracavać nad saboj paprostu niemahčyma.
Znoŭ ža, u kłasičnym masažy tvaru isnuje bolš za 50 ruchaŭ, jakija pravilna i efiektyŭna vykanać moža tolki śpiecyjalist, što dobra viedaje anatomiju, fizijałohiju i maje praktyku. A praktyka prychodzić tolki paśla šmatlikich paŭtareńniaŭ. Tym bolš, masaž tvaru — heta samaja składanaja masažnaja technika. Dapuścim, śpina — heta vialikaja adnosna roŭnaja častka tułava. Tvar ža paraŭnalna nievialiki, i na im znachodzicca mnostva anatamičnych vystupaŭ: nos, vusny, brovy, vočy. I treba, kab padčas masažu ruki pracavali harmanična, adzin ruch pieraciakaŭ u inšy. Kali zadziavaješ nos abo viejki, u čałavieka, jakomu robiać masaž, adrazu ŭźnikaje peŭny dyskamfort, tamu što parušajecca jaho błaženny stan.
Jašče važna, kab śpiecyjalist, jaki pravodzić masaž, akcentavaŭ uvahu, ci jość na štości alerhija.
Kamu lepš abyścisia biez masažu
Siarod supraćpakazańniaŭ: hnajnikovyja zachvorvańni, vostryja infiekcyjnyja zachvorvańni, hierpietyčnyja vysypańni, praźmiernaje avałasieńnie. A taksama takija ciažkija stany jak sardečnaja niedastatkovaść, lohačnaja niedastatkovaść i inšyja.
Robim masaž samastojna
Voś nievialički kompleks praktykavańniaŭ, jakija niaciažka zrabić samastojna.
Treba zaznačyć, što masažu tvaru musić papiaredničać dobraje ačyščeńnie. Tvar budzie dobra padrychtavany, kali zrabić ciopły kampres. Jašče lepš, kali kampres budzie ź lekavymi travami, jakija padychodziać vašamu typu skury.
1. Siadźcie pierad lusterkam, śpinu trymajcie roŭna i rassłabcie plečy. Zrabicie ŭdych. Na vydychu, paviarnuŭšy hałavu ŭprava, zirnicie praz pravaje plačo. Praz try siekundy pavolna viarniciesia ŭ zychodny stan. Zrabicie toje samaje, paviarnuŭšy hałavu ŭleva.
2. Razahrejcie ŭ dałoniach uvilhatnialnyja krem i aściarožna naniasicie jaho na tvar. Pakładzicie dałoni na tvar jak na fota i na vydychu rabicie lohkija masažnyja ruchi ad centra da vušej.
3. Naciśnicie na łob padušačkami palcaŭ jak pakazana na fota, rabicie imi rytmičnyja kruhavyja ruchi i ruchajciesia da vušej. Praciahvajcie, pakul nie razahrejecca ŭvieś łob.
4. Rytmičnymi stymulujučymi kruhavymi ruchami pamasirujcie skuły. Krychu naciskajcie na ich padušačkami palcaŭ i ruchajciesia ad nosa da vušej. Paŭtarycie try razy.
5. Prykładzicie vialikija palcy ruk źniešnim bokam pad skuły la nosu i na vydychu naciśnicie palcami ŭvierch. Tak, byccam sprabujecie prypadniać skuły. Praciahvajcie naciskać, pakul nie daličycie da piaci, a paśla na ŭdychu pavolna asłabcie nacisk. Paŭtarycie toje samaje ź siaredniaj častkaj skuł, a zatym ź ich źniešnim bokam.
6. Naciśnicie palcami abiedźviuch ruk na myšcy padbarodku, zrabicie lohkija rytmičnyja kruhavyja ruchi pa ŭsioj linii skivicy da samych vušej. Ściśnicie zuby i, adčuŭšy palcami vialikuju myšcu, rassłabcie skivicu i pamasirujcie jaje. Paŭtarycie try razy.
7. Vialikija palcy pastaŭcie pad padbarodkam, inšyja adviadzicie ŭ baki. Zrabicie ŭdych. Na vydychu naciśnicie vialikimi palcami na nižniuju skivicu, paličycie da troch, a paśla pavolna asłabcie nacisk. Prajdziciesia takim čynam pa ŭsioj nižniaj skivicy, pavialičvajcie i źmianšajcie nacisk. Zaviaršycie pahładžvańniem usiaho tvaru.
