RPC pasłała sihnał pra hatoŭnaść na kampramis u pytańni aŭtakiefalii Ukrainskaj carkvy
Mitrapalit Anufryj — kiraŭnik Ukrainskaj pravasłaŭnaj carkvy Maskoŭskaha patryjarchata. Fota Pravoslavie.ru.
Tak možna acanić adkaz Archijerejskaha sabora Ruskaj pravasłaŭnaj carkvy na pasłańnie Fiłareta, patryjarcha Ukrainskaj pravasłaŭnaj carkvy Kijeŭskaha patryjarchata. Adkaz isnuje, choć pakul niezrazumieła, ci było pasłańnie.
«Paśla harotnych dvaccaci piaci hadoŭ razładaŭ, hvałtu, uzajemnaj niepryjaznaści, kryŭd i niaładaŭ, jakija ŭźnikli va ŭkrainskim pravasłaŭi i ŭkrainskim hramadstvie ŭ vyniku raskołu, źjaŭlajecca, narešcie, mahčymaść stać na šlach viartańnia jednaści», — havorycca ŭ pastanovie Archirejskaha sabora Ruskaj pravasłaŭnaj carkvy 2017 hoda.
Raniej RPC admaŭlałasia ad lubych pieramoŭ i patrabavała ad Fiłareta, jakoha Maskva nie vyznavała i praklała, pakajańnia, a ad usich ukrainskich pravasłaŭnych — «viartańnia va ŭłońnie RPC».
Poŭny źmiest pasłańnia patryjarcha Fiłareta i ci jano sapraŭdy isnavała, stanie viadomy siońnia. Ale na sabory RPC było zajaŭlena, što ŭ im ukrainski ijerarch prabačaje i prosić prabačeńnia. «Prašu prabačeńnia va ŭsim, čym zhrašyŭ słovam, spravaj i ŭsimi maimi pačućciami, i taksama ad serca ščyra daruju ŭsim», — havorycca ŭ liście.
Va Ukrainie isnuje 12 000 prychodaŭ Ukrainskaj pravasłaŭnaj carkvy Maskoŭskaha patryjarchata (UPC-MP) i 5 000 prychodaŭ Ukrainskaj pravasłaŭnaj carkvy Kijeŭskaha patryjarchata. Adnak sacyjołahi fiksujuć, što
dola viernikaŭ, jakija adnosiać siabie da Maskoŭskaha patryjarchata ŭvieś čas źnižajecca. Na 2014 hod va Ukrainie takich było ŭžo tolki 20% nasielnictva, u 2016-m — tolki 15%. U toj ža čas da pravasłaŭnych Kijeŭskaha patryjarchata siabie adnosiać 25%, jašče 7% — unijaty (hreka-kataliki), 2% — pravasłaŭnyja-aŭtakiefalisty, 2% — pratestanty i 1% — kataliki.
Dola žycharoŭ Ukrainy, jakija ličać, što pravasłaŭnaja carkva krainy maje być nieadjemnaj častkaj Ruskaj pravasłaŭnaj carkvy, źniziłasia z 22% u 2010 hodzie da 10% u 2016-m. U takich umovach RPC ryzykuje zastacca «carkvoj bieź viernikaŭ». Ukrainskija ijerarchi UPC-MP šturchajuć Maskvu da kampramisu. Pakul havorka idzie pra «molitviennoje obŝienije» i dyjałoh, ale kancavym vynikam jakoha budzie-taki pryznańnie samastojnaści ŭkrainskaj carkvy.
Ukrainskija ŭłady chacieli b stvareńnia adzinaj pamiesnaj pravasłaŭnaj carkvy i bačać u hetym važny padmurak dla nacyjanalna-dziaržaŭnaha budaŭnictva. Nacyjanalnyja dziaržavy, dzie bolšaść ci častku nasielnictva składajuć pravasłaŭnyja, — Sierbija, Rumynija, Hruzija, Polšča i h.d. — raniej ci paźniej dabivalisia kananičnaha pryznańnia dla samastojnych carkoŭnych arhanizacyj.
U Biełaruskaj pravasłaŭnaj carkvie taksama isnuje žadańnie zdabyć poŭnuju samastojnaść, ale na čale carkvy staić mitrapalit Pavieł, prysłany z Rasii, a častka jepiskapaŭ staić na pazicyjach krajniaha ruskaha nacyjanalizmu.
