Łukašenka nie ŭklučyŭ Davydźku ŭ kamisiju pa infarmacyjnaj biaśpiecy, zatoje jość Marzaluk
Alaksandr Łukašenka 16 listapada zaćvierdziŭ ukaz «Ab mižviedamasnaj kamisii pa biaśpiecy ŭ infarmacyjnaj śfiery».
Stanisłaŭ Zaś. Fota Belta.by.
Kiraŭnik kamisii, dziaržsakratar Rady biaśpieki Stanisłaŭ Zaś u intervju ab stvareńni padobnaha orhana daŭ zubadrabilnyja tłumačeńni.
«Stvareńnie Mižviedamasnaj kamisii pa biaśpiecy ŭ infarmacyjnaj śfiery abumoŭlena intensiŭnym naroščvańniem niebiaśpiečnych tendencyj u hłabalnaj i nacyjanalnaj infarmacyjnaj prastory, nieabchodnaściu pavyšeńnia efiektyŭnaści dziejnaści subjektaŭ, jakija vyrašajuć raznapłanavyja zadačy pa zabieśpiačeńni infarmacyjnaj biaśpieki», — skazaŭ Zaś.
Najbolš cikavym bačycca skład hetaj kamisii. Što za ludzi buduć vyrašać pytańni infarmacyjnaj biaśpieki?
Najpierš heta kiraŭnictva Rady biaśpieki. Aproč samoha Stanisłava Zasia, siudy ŭvajšli dva jahonyja namieśniki — Uładzimir Arčakaŭ i Aleh Makaraŭ.
Administracyju prezidenta pradstavić Maksim Ryžankoŭ, u abaviazkach jakoha ciapier značacca i ideałahičnyja pytańni. Taksama ŭ kamisii pres-sakratar Łukašenki Natalla Ejsmant i načalnik hałoŭnaha ideałahičnaha ŭpraŭleńnia Administracyi prezidenta Alaksandr Iljasievič.
Vialiki błok siłavikoŭ: heta i staršynia KDB Valeryj Vakulčyk, i ministr abarony Andrej Raŭkoŭ, i kiraŭnik MUS Ihar Šunievič. Źviartaje ŭvahu, što asabista nie pradstaŭleny načalnik Śledčaha kamiteta Ivan Naskievič, jaho viedamstva ŭ kamisii pradstaŭlaje namieśnik Siarhiej Aziemša.
Niadaŭna Alaksandr Łukašenka zładziŭ publičny razhon Apieratyŭna-analityčnaha centra. Pieršapačatkova była infarmacyja, što ad pasadaŭ adchilenaje ŭsio kiraŭnictva AAC. Potym farmuloŭki padkarektavali, abaznačyŭšy, što adchilenyja tolki «niekatoryja». Bačym, što ŭ składzie kamisii namieśnik načalnika AAC Kanstancin Šulhan.
Žurnaliscki błok pradstaŭlajuć hałoŭny redaktar «SB» Pavieł Jakubovič, kiraŭnik ANT Marat Markaŭ i ministr infarmacyi Alaksandr Karlukievič.
Źviartaje ŭvahu, što ŭ kamisiju nie ŭvajšoŭ kiraŭnik Biełteleradyjokampanii Hienadź Davydźka. Heta vyhladaje paradaksalna, bo BT źjaŭlajecca najbujniejšaj miedyjnaj adzinkaj u krainie. Nidzie niama stolki supracoŭnikaŭ i takoha finansavańnia, jak u Biełteleradyjokampanii. Tym nie mienš, Davydźka apynuŭsia pa-za śpisam.
Zatoje jość u im deputat Pałaty pradstaŭnikoŭ, historyk Ihar Marzaluk. Jašče ŭ pačatku 2000-ch Marzaluk simpatyzavaŭ apazicyi, byŭ siabram sacyjał-demakrataŭ. Adnak potym staŭ prychilnikam dziejnaj ułady. Spačatku spadar Marzaluk byŭ členam Savieta Respubliki, a ciapier źjaŭlajecca deputatam Pałaty pradstaŭnikoŭ. Pry hetym pryncypova karystajecca biełaruskaj movaj.
Na dumku vajskovaha ekśpierta Alaksandra Alesina, heta adna z reakcyj na šerah infarmacyjnych pravałaŭ padčas vučeńniaŭ «Zachad-2017».
Čytajcie taksama: «Nam treba Infavojski». «Treba mianiać infarmacyjnuju sistemu». Što kažuć ekśpierty pa vynikach «Zachadu-2017»
«Padziei padčas vučeńniaŭ pakazali, što našyja pazicyi nie vielmi mocnyja, — ličyć Alesin. — I jak by siabie nie chvaliła Ministerstva abarony, da kiraŭnictva krainy ŭsio ž dajšło, što niešta treba rabić: heta i novaja kamisija, i źmiena ministra infarmacyi. Hlańcie: novy ministr [Karlukievič] pa adukacyi vajenny žurnalist, heta vyrazna pakazvaje viektar jaho raboty. Idzie rearhanizacyja infarmacyjnaj raboty. Tut ža i historyja z AAC: padčas jaho stvareńnia nie była acenienaja vieličynia pahroz u infarmacyjnaj śfiery. Bo siońnia infarmacyjnaja vajna — heta chiba nie bolšy, čym vajskovy, składnik hibrydnaj vajny. Ja dumaju, što patreba dziaržavy ŭ analitykach u hetaj śfiery budzie tolki pavialičvacca. A ŭvohule, nam patrebna ŭciamnaja stratehija kibiernietyčnaj vajny jak dadatak da vajskovaj daktryny».
