Domik dla mamy. Minski architektar pabudavaŭ aryhinalnuju daču z «pirsam» FOTA
Takija historyi zaŭsiody kranajuć da hłybini dušy, niezaležna ad taho, dzie jany adbyvajucca. Hetaja — zdaryłasia niepadalok ad Minska. Syn-architektar za dva lety sprajektavaŭ i pabudavaŭ dla maci dačny domik — taki, pra jaki jana daŭno maryła… Pry budaŭnictvie nie abyšłosia biez kampramisaŭ, ale ŭ cełym — vynik zasłuhoŭvaje ŭvahi. Padrabiaznaści ab aŭtarskim prajekcie partału dom-expert.by raspavioŭ sam «vinoŭnik uračystaści» — Andruś Bezdar, zasnavalnik i art-dyrektar studyi ZROBYM architects.
Rašeńnie ab prajekcie i prajektnaje rašeńnie
Učastak u 15 sotak Natalla Ivanaŭna (ciapierašniaja haspadynia dačy) kupiła niekalki hadoŭ tamu ŭ pažyłoj žančyny, byłoj supracoŭnicy miedycynskaj ustanovy. Z pabudoŭ na ŭčastku da taho momantu znachodziŭsia tolki vahončyk-kunh z sadovym invientarom. Atačeńnie taksama nie vyklikała zachapleńnia: rossyp parnikoŭ i sabranych aby z čaho sparudaŭ, abkručanych kropielnicami, zarosłych vysokaj travoj. Słovam, učastak patrabavaŭ rasčystki. Natalla Ivanaŭna jaho abrała za toje, što za ŭsim hetym «łandšaftnym dyzajnam» chavaŭsia niadrenny sad z pładovymi drevami - tut rastuć hrušy, jabłyki, ślivy, čarešnia i višni.
U ciopły čas hoda mama pravodzić na ŭčastku šmat času: zajmajecca lubimymi sadami-aharodami. Ale ŭmovy dla žyćcia tut, skažam prosta, nijakija: ni pamycca tołkam, ni pieranačavać z kamfortam. Tak što da hetaha času ŭčastak vykarystoŭvali dla karotkačasovych «nabiehaŭ» - pa-inšamu nie vychodziła. Dumka pabudavać niešta prystojniejšaje za «bytoŭku» naviedała mianie pry pieršym pohladzie na ŭčastak.
Prajektujučy dom, ja pieršapačatkova staviŭ pierad saboj zadaču zrabić jaho nievialikim. Na ŭčastku - značny pierapad vyšyń (bolš za 2 mietry), i luby habarytny budynak niepaźbiežna paciahnuŭ by vyrab składanaha padmurka, a značyć - i pavieličeńnie koštu prajekta. Da taho ž, nie chaciełasia zabirać karysnuju płošču ŭčastka, usio ž asnoŭnaje jaho pryznačeńnie - być addušynaj dla mamy, jakaja razharnuła tut kipučuju dziejnaść pa vyroščvańni ŭsiaho i ŭsia. Kirujučysia hetym, nakidaŭ pieršasny prajekt doma, pryniaŭšy pamiery 7ch5 mietraŭ. I adrazu ž zrazumieŭ adnu reč…
Kanstruktyŭna - pra kanstruktyŭ
… Adrazu zrazumieŭ, što na fonie ŭčastka dom vyhladaje maleniečkim.
Zachaciełasia niejak pašyryć jaho (choć by vizualna), nie pryciahvajučy dadatkovych finansaŭ. Vychadam ź situacyi stała vialikaja terasa, płošča jakoj pieravyšaje płošču samoj pabudovy. Ja ŭziaŭ «nulavy» ŭzrovień doma, padoŭžyŭ liniju ŭ prastory - atrymaŭsia svojeasablivy «pirs», jaki łunaje nad ziamloj.
Heta jašče i zručna. Možna ŭ luby momant vyjści z domu i prahulacca ŭzdoŭž dreŭ, nie padymajučysia i nie spuskajučysia pa prystupkach, nie zamačyŭšy nohi ŭ mokraj travie. U kancy hetaha «pirsa» raście samaja sapraŭdnaja višnia. Škada było śpiłoŭvać maładoje dreva, tamu my prosta prarezali ŭ padłozie terasy dźvie adtuliny pad stvały.
Ciapier letam možna vystavić kresła na terasu, prosta pad kronu, i zryvać rukami jahady z halinak. Na vypadak niepahadzi sadovaja mebla prybirajecca pad kansolny «kazyrok» dachu z vynasam u dva mietry. Rolu padstreška tut vykonvajuć dva listy prazrystaha manalitnaha polikarbanatu santymietrovaj taŭščyni.
Pieršapačatkova ja płanavaŭ rabić modulny dom na asnovie «karkaśnika», bo heta adzin z kirunkaŭ majoj architekturnaj studyi. Ale zrazumieŭ, što pryjdziecca ŭkłaści jašče prystojna srodkaŭ i času va ŭnutranaje azdableńnie, a hetaha chaciełasia paźbiehnuć. Tady pryniali rašeńnie budavać «zrub». Praŭda, vielmi śpiecyfičny: z klejenaha brusa taŭščynioj 7 sm. Z kanstruktyvam mnie dapamahaŭ architektar Ivan Amosaŭ, jaki śpiecyjalizujecca na brusovych chatach, sumiesna z našym prarabam Mikałajem Karalenkam.
Bolšaść pierasiekaŭ - schavanaha typu, tamu i ŭnutry, i zvonku dom vyhladaje, jak karkaśnik. Čaho ja i chacieŭ. Nu, i, zrazumieła, u takim domie nie patrabujecca ŭnutranaja azdableńnie: my prosta pafarbavali jaho znutry i prapitali admysłovymi prapitkami zvonku.
Uličvajučy reljef učastka, dom stavili na mietaličnyja šrubavyja pali (+ rostvierk z draŭlanaha brusa pa viersie, u jakaści padmurka).
Pakolki SUMMER HOUSE - dom vyklučna dla letniaha pražyvańnia, ścieny ŭciaplać nie mieła sensu (dy i bolš za 50% ścien - heta škleńnie). Tak što uciaplalnik kłali tolki na dach i padłohu, pryčym - nie stolki dla ŭtrymańnia ciapła ŭ chałodnuju paru, kolki - dla zachavańnia prachałody letam. Nad stollu - 25 sm płast minvaty, pad padłohaj - 20 sm. Dla dadatkovaha abahravańnia ŭ pieryjad mižsiezońnia, u domie ŭstalavali pieč-kamin.
Płoski dach vizualna vyhladaje haryzantalnym. Na samoj spravie, dla advodu apadkaŭ jaho sprajektavali z uchiłam u 5%. Pa bakach my «vyraŭniali» jaje parapietami, tamu z vulicy ŭchił nieprykmietny. U jakaści dachavaha pakryćcia vykarystoŭvali pradukcyju kampanii «Technanikol» na bitumnaj asnovie.
Asnoŭnyja vokny hladziać na paŭnočny zachad, što pieraškadžaje pierahrevu doma na praciahu dnia letam, z paŭdniovaha boku zroblena tolki nievialikaje akienca. Škłopakiety pamierami 2.1ch2.1 m za narmalnuju canu znajści akazałasia składana: šmatlikija kampanii admaŭlalisia mantavać vokny takich pamieraŭ. Kankretna - u hetym domie, nie žadali brać na siabie adkaznaść. Tamu što dom z brusa - heta ŭžo svaje niuansy va ŭstanoŭcy voknaŭ. Plus - raźmieščany na schile, što jašče bolš uskładniaje mantaž. Ale ŭ vyniku znajšłasia «śmiełaja» kampanija: vyrabili, pryvieźli, i (nie biez vysiłkaŭ) ustanavili. Nam važna było zachavać pryvatnaść, tamu dom sprajektavany tak, što znachodzicca ŭ hłybini ŭčastka, kutniaje škleńnie zachinajecca drevami i amal nie vidać z darohi.
Interjer: «hadovy» dyzajn z vosieńskimi notkami
Prajekt pieršapačatkova zadumvaŭsia jak dača dla pražyvańnia ŭ ciopłuju paru hoda. Tamu nie chaciełasia ŭkładać šmat srodkaŭ u kanstruktyŭ ścien ci azdableńnie adzinaha pamiaškańnia. Ź inšaha boku - jak dyzajnier i architektar, ja adčuvaŭ patrebu ŭ tvorčym samavyjaŭleńni ŭ hetym prajekcie. Dumaju, dom atrymaŭsia cikavym, samabytnym, ale nieidealna - u im šmat kampramisnych rašeńniaŭ.
U mianie była ideja: ścieny ŭ domie pavinny być biełymi, a padłoha i stol - «z teksturaj dreva». Ścieny zruba pafarbavali biełaj farbaj, na padłohu pakłali došku z masivu chvoi, stol - abšyli listami biarozavaj faniery. Mnie naohuł padabajecca hety materyjał, my šmat čaho prajektujem z faniery, tuju ž našu sieryjnuju meblu BY furniture.
Tamu vyrašana było vykarystać hety materyjał i ŭ dyzajnie interjeru, naprykład - pry vyrabie kuchonnaj stalnicy. Pa sutnaści, ad faniery ŭ joj - tolki tekstura, tam vielmi składanaja, šmatuzroŭnievaja apracoŭka. Zatoje, jak i kamieniu, hetaj stalnicy nie strašnyja ni tempieraturnyja vahańni, ni vilhać.
Ubudavanaja šafa, spalny podyum, kuchnia - usio rabili na zamovu mebielščyki našaj architekturnaj studyi.
Adno z kampramisnych rašeńniaŭ - dobraŭparadkavańnie zony hatavańnia. Skažam, vyciažku my vyrašyli nie rabić: šmat času za hatavańniem pravodzić tut nichto nie płanuje, da taho ž varačnaja panel - usiaho na dźvie kanforki. Tamu rola naturalnaj vyciažki «delehavanaja» raźmieščanamu pobač aknu. Z ulikam hadavoj skiravanaści doma, mieli na ŭvazie, što hatavańnie ježy zbolšaha budzie prachodzić u barbiekiu-zonie, na terasie.
Pry ŭsioj prastacie vykarystanych rašeńniaŭ, unutry dom atrymaŭsia vielmi «biełaruskim», u interjery heta prasočvajecca. Biełyja kolery i tekstura dreva, kašpo z kałasami, dekor z sałomy … Sałoma navat unutry lažanki - spać na takoj vielmi zručna.
Chacieli vytrymać hetuju «biełaruskaść» i ŭ eksterjery: adzinuju źniešniuju ścianu ja znarok «afakturyŭ» z dapamohaj vynasnych draŭlanych elemientaŭ. Krychu paźniej dadali padśviatleńnie - i dom zajhraŭ novymi farbami, źjaviłasia hulnia śviatła i cieniaŭ, što adrazu nadało domu niejkuju «razynačku».
Niazručnyja vyhody
Dom znachodzicca ŭ sadovym tavarystvie, u 40 km ad Minska. Vada jość tolki letam, a pa-za siezonam tudy navat prajechać składana - jakaść daroh pakidaje žadać lepšaha. Zychodziačy z hetaha, vyrašyli i vyhody pakul pakinuć «letnimi». Śmiešna pra heta kazać, ale prajekt SUMMER HOUSE pačaŭsia… z vuličnaha tualeta. Śpiarša my pabudavali jaho, kab mamie było kamfortniej pracavać na ŭčastku. Ale budavali jaho pa ŭsich kanonach, z začynam na budučyniu: ciapier heta samy «modny» vuličny tualet u tavarystvie. Da taho ž jon sumieščany ź letniaj dušavoj kabinkaj, tamu jaho možna nazvać paŭnavartasnym «źniešnim sanvuzłom».
Paźniej - zrobim prajom u ścianie doma pobač sa spalnaj zonaj, i prybudujem z tylnaha boku doma paŭnavartasnuju vannu. Hety praces budzie sumieščany z kapańniem na ŭčastku ułasnaj śvidraviny. U prybudovu paviesim bojler - i atrymajem u dačnym domie paŭnavartasny «haradski» ŭzrovień kamfortu.
Inšaja «małaja architekturnaja forma» - altanka pad nazvaj Wooden Cabin. U jaje navat svaja historyja jość. My pabudavali jaje niekalki hadoŭ tamu, z pareštkaŭ našaha pieršaha modulnaha doma. Niejki čas jana stajała ŭ Minsku, zatym ja jaje pieravioz na ŭčastak, i z taho času jana znachodzicca tut, vykonvajučy funkcyju kłasičnaj altanki. Dach - manalitny polikarbanat.
Cana pytańnia?
Ahulnaja cana ŭ mianie atrymałasia kala 28 000 $ za ŭsio: dom, interjer (materyjały + rabota), vuličny sanvuzieł, manalitny parkinh (jaho zalivali asobna), haspadarčy błok, altanka, płot.
Dla klijentaŭ, dumaju, u 30 000 u.a. abyšoŭsia b tolki dom. Treba razumieć, što praktyčna ŭsie rečy vyrablalisia na zamovu, što paŭpłyvała na kančatkovuju canu. Da taho ž u šerahu miescaŭ vykarystoŭvalisia nie samyja biudžetnyja materyjały. Kali vykarystoŭvać bolš prostaje azdableńnie i kanstruktyŭnyja rašeńni - canu možna trochi «pryziamlić».
