Biełaruski deputat atrymaŭ miedal «Słužu Rasii» ad biełaruskaha ž abjadnańnia adstaŭnych raźviedčykaŭ
Na sajcie deputata biełaruskaha parłamienta Aleha Leŭšunova źjaviłasia spravazdača z kanfierencyi hramadskaha abjadnańnia «Vieterany vajskovaj raźviedki».
Sajt vybiraj.by źviarnuŭ uvahu na toje, što jamu tam uručyli nahrudny znak rasijskaha ŭzoru: «95 hod HRU HŠ UZ RF», na jakim napisana «Słužim Rośsii».
Pry hetym viadoma, što Leŭšunoŭ u HRU nie słužyŭ — tolki ŭ pavietrana-desantnych vojskach jašče za Savietami.
Deputat Aleh Leŭšunoŭ pravaruč ad trybuny ŭ čas kanfierecyi, fota z sajta Leŭšunova
Voś što pra dziŭnuju situacyju skazaŭ sam deputat.
«Heta była sustreča ź vieteranskaj arhanizacyjaj, jany ŭsie słužyli jašče za Savietami. Mianie zaprasili jak deputata kamisii pa pracy i sacyjalnych pytańniach. Ja pahavaryŭ ź imi, raskazaŭ pra svaju rabotu, heta čysta simvalična ŭsio. A ŭznaharoda… heta znak pamiatny prosta. Čamu tam napisana «Słužym Rasii»? Ja nie viedaju. Ale ja nie chacieŭ naŭprost vykazvać pratest, kab nie kryŭdzić hetych ludziej», — skazaŭ nam Leŭšunoŭ.
«Dyk ci budziecie nasić znak z takim nadpisam?» — spytalisia my.
Nadpis «Słužym Rasii» unizie.
«U mianie chapaje ŭznaharod i biez taho. Ja maju dziaržaŭnuju ŭznaharodu «Za advahu» ad Biełarusi. U nas ža situacyja takaja: kamunistam uručajucca miedali za podpisam Ziuhanava, afhancam taksama praz rasijskija arhanizacyi ŭručajucca», — adkazaŭ deputat.
Leŭšunoŭ nie staŭ kazać, ci tolki jamu dali taki znak, ci i inšyja prysutnyja jaho atrymali.
«Nie mahu za inšych kazać, ale tam byli i pradstaŭniki Minabarony, i inšych viedamstvaŭ», — adrezaŭ jon.
Varta adznačyć, što hetaja zahadkavaja arhanizacyja «vieteranaŭ raźviedki» nie maje kantaktnych telefonaŭ — jany tolki štočaćvier źbirajucca ŭ Domie aficeraŭ.
Tamu pakul niezrazumieła, čamu biełaruskaja (pa rehistracyi) arhanizacyja ŭručaje pamiatnyja znaki ad imia rasijskich struktur.
U Minabarony situacyju prajaśnić taksama nie mohuć: pres-aficer Uładzimir Makaraŭ skazaŭ, što viedamstva ŭznaharodžvaje tolki zaćvierdžanymi ŭ Biełarusi ŭznaharodami i pamiatnymi znakami, i jon, maŭlaŭ, nie ŭ kursie spravaŭ vieteranskich arhanizacyj.
