U Bielhii adkryli novy pomnik stvaralniku muzyki da vierša «Mahutny Boža» Mikołu Ravienskamu
1 listapada na mohiłkach u bielhijskim Luvienie byŭ uračysta adkryty adnoŭleny pomnik Mikołu Ravienskamu. Pra heta paviedamiŭ u svaim fejsbuku Pavieł Chivuk.
«Ideja ab ustalavańni novych plitaŭ uźnikła letaś, akurat na Dziady. Niekalki miesiacaŭ išło abmierkavańnie, jak majuć vyhladać hetyja plity, jaki kamień maje być vykarystany dy jaki źmiest maje nieści adnoŭleny pomnik. Było vidavočna, što patrebny niejki tekst na niderłandskaj movie dla śviedčańnia ŭsim ab biełaruskim kampazitary. Adnačasova chaciełasia, kab była ŭzhadka himnu «Mahutny Boža», muzyku dla jakoha napisaŭ Mikoła Ravienski. A naprykancy ŭźnikła ideja dadać partret kampazytara», — adznačyŭ jon.
Mikoła Ravienski
Naradziŭsia ŭ 1886 u majontku Kapłancy, ciapier Biarezinski rajon Minskaj vobłaści.
Skončyŭ Maskoŭskuju kansiervatoryju (1930).
Pracavaŭ rehientam i nastaŭnikam śpievaŭ u Navahrudku. 3 1919 u Minsku, kiraŭnik choru pry Biełaruskim rabočym kłubie, chormajstar haradskoha teatra. 3 1930 vykładaŭ u muzyčnym technikumie, Biełaruskaj kansiervatoryi. Padčas nacysckaj akupacyi rehient carkoŭnaha choru ŭ Červieni (Ihumien). 3 1944 u Hiermanii, z 1950 u Bielhii, u Luvienskim univiersitecie stvaryŭ studencki ansambl biełaruskaj muzyki.
Aŭtar apracovak biełaruskich narodnych piesień i piesień na vieršy M. Bahdanoviča («Słuckija tkačychi» i inšyja), Ja. Kupały, Ja. Kołasa («Moj rodny kut», «Kraj naš biedny» i inšyja), K. Bujło (histaryčnaja siuita «Kurhan» pavodle adnajmiennaha vierša), C. Hartnaha, Z. Biaduli, jakija častkova ŭvajšli ŭ jaho «Zbornik piesień z notami» (1922), biełaruskaj opiery «Branisłava» (libreta U. Duboŭki; nie zavieršana), biełaruskaj apierety «Zaloty» (pavodle V. Dunina-Marcinkieviča), muzyki na teksty carkoŭnych malitvaŭ, u t.ł. «Mahutny Boža» (na słovy N. Arsieńnievaj). Kampanavaŭ relihijnuju muzyku. Padrychtavaŭ pracu «Charakternyja rysy biełaruskaj narodnaj pieśni» (zastałasia ŭ rukapisie).
U kancy žyćcia kiravaŭ choram biełaruskich studentaŭ u Bielhii, ź im daŭ mnoha kancertaŭ u krainach Zachodniaj Jeŭropy.
Pamior u 1953 u bielhijskim Luvienie.
