Čamu ŭ situacyi z seksualnymi damahańniami važna abaranić i mužčyn?
Akcior Kievin Spejsi, kinapradziusier Charvi Vajnštejn, ministr abarony Vialikabrytanii, biełaruski himnast Vital Ščerba… Uspłyvajuć usio novyja imiony ludziej, jakich abvinavačvajuć u seksualnych damahańniach i hvałcie.
Čamu hetyja historyi tak doŭha zamoŭčvali i ahučyli tolki praz šmat hadoŭ? Tamu što zvyčajna subjekt i abjekt takich pavodzin znachodziacca ŭ niejkaj ijerarchii: načalnik-padnačaleny, nastaŭnik-vučań i hetak dalej. Składana supraćstajać «macniejšamu». Plus usim ludziam banalna strašna adkryta pryznavacca ŭ niepryjemnych rečach. Tym bolš, nie zaŭsiody hetaje pryznańnie ciahnie za saboj pakarańnie vinavataha.
U kinaindustryi skandały, źviazanyja z charasmentam (lubyja pavodziny, jakija mohuć pakryŭdzić ci parušyć asabisty miežy inšaha čałavieka, psichałahičny ci fizičny cisk), zdaralisia i raniej, ale sprava z Vanštejnam stała najbolš šmathałosnaj i pryviała da taho, što ad jaho adraklisia nie tolki aktrysy, ale i kalehi, dziełavyja partniory. Hety prykład zapuściŭ pazityŭnuju łancuhovuju reakcyju, jakuju my zaraz i nazirajem: achviar padtrymlivajuć, a ahresaraŭ haniać.
Ale tut adkryvajecca dadatkovy ŭraźlivy momant: kab sapsavać kamuści karjeru, imidž ci siamiejnyja adnosiny dadatkova prosta pra heta zajavić. Nakolki heta źjaŭlajecca praŭdaj, nichto zvyčajna nie raźbirajecca.
Kali praanalizavać apošnija skandały, to bačna, što čaściej za ŭsio u tym, što jany padvierhlisia damahańniam, pryznajucca žančyny.
Učora da ich liku dałučyłasia biełaruskaja mastačka Nika Sandras. Niahledziačy na toje, što ŭ jaje žyćci chapała niepryjemnych žestaŭ z boku supraćlehłaha połu, jana zaklikaje nie raspalvać vohnišča inkvizicyi na pustym miescy i tłumačyć, čamu važna abaraniać nie tolki słabych achviar-žančyn, ale i mužčyn: ad vykazvańniaŭ pieršych.
My paličyli heta mierkavańnie vielmi cikavym, tamu publikujem całkam.
Nika Sandras.
— Zaraz žančyny jak z łancuha sarvalisia i davaj raspaviadać pra toje, jak da ich brudna damahalisia mužyki. U maim žyćci taksama chapała takich vypadkaŭ.
Nie budu ŭdavacca ŭ padrabiaznaści, ale niedvuchsensoŭnyja prapanovy pastupali jak ad zusim nieznajomych taksistaŭ, tak i ad pracadaŭcaŭ. A adzin raz navat ad kapitana milicyi, jaki zatrymaŭ mianie nočču na vulicy dla «vyśviatleńnia asoby».
U niejki momant ja stamiłasia i nabyła sabie pryhožuju adviortku ź pierłamutravaj ručkaj. Ja stała nasić jaje ŭ sumačcy, a ŭ ciomny čas sutak u ruce, hatovaja ŭvatknuć u šyju kožnamu, chto zachoča maich nie sankcyjanavanych pacałunkaŭ.
Ciapier da mianie nichto nie čaplajecca. Mabyć, na tvary napisana «zavalu». A zamiest adviortki pad rukoj majecca staradaŭni vielizarny vostry kluč.
Čamu ja taksama maŭčała i nikudy nie skardziłasia? U mianie nie było mamy i taty, ciotki, dziadźki, siastry ci brata, jakija mahli b padtrymać, padniacca i pajści abaraniać. Ja sama prosta źbiahała i ŭsio. Traŭmy tyja vypadki mnie nie nanieśli, a siońnia ja sama mahu za siabie pastajać.
Ale ja ŭsio roŭna za mužčyn. Za mužnych i viasiołych. Za tych, chto padaje ruku i palito, za tych, chto doryć bukiety i prytrymlivaje dźviery. Ja za mužčyn, jakija vyjaŭlajuć svaju mužnaść va ŭčynkach. Za zdolnych pryniać rašeńnie i nieści adkaznaść. Ja za mužčyn, jakija ŭmiejuć spačuvać, suciešyć, padbadzioryć, abaranić… Asabista ja chaču być piaščotnaj žančynaj u śviecie mocnych, mužnych mužčyn.
Mianie krychu pałochajuć uraźlivyja damy, jakija mohuć niapravilna traktavać mužčynskuju ŭvahu, i ŭsio heta «palavańnie na viedźmaŭ», što adbyvajecca. Ciapier tak lohka złamać žyćcio i karjeru luboha chłopca adnym, navat nie paćvierdžanym słovam.
Jon moža apraŭdacca, ale imidžavyja straty stanuć niezvarotnymi. Nie kažučy ŭžo ab traŭmie dla siamji i dziaciej.
Mianie pałochajuć hipiertrafiravanyja fieminisckija prajavy. Tak, ja bačyła žančynu, jakaja abłajała mužčynu za toje, što jon chacieŭ padnieści jaje čamadan.
Ja nie adčuvaju niepryjaznaści da mužčyn, jakija chočuć pryŭdaryć za mnoj. Dziaŭčynki lubiać zalacańni i flirt. Prosta nie treba pierahinać. Mužčynam sa svaimi žadańniami, a žančynam sa svaimi abvinavačvańniami.
