Tramp paabiacaŭ abnarodavać dadzienyja ab zabojstvie Kenedzi
Prezydent ZŠA Donald Tramp abvierh infarmacyju pra toje, što jon nibyta źbirajecca zablakavać publikacyju dakumentaŭ ab zabojstvie 35-ha prezydenta ZŠA Džona Kenedzi ŭ listapadzie 1963 hodu, paviedamlaje «Radyjo Svaboda».
«Paśla atrymańnia adpaviednaj infarmacyi ja jak prezydent źbirajusia dazvolić adkryć zablakavanyja i zasakrečanyja dakumenty pa Džonu Kenedzi», — napisaŭ Tramp ŭ svaim tvitery.
Raniej vydańnie Politico sa spasyłkaj na nienazvanych pradstaŭnikoŭ administracyi Trampa paviedamiła, što kiraŭnik Biełaha doma źbirajecca zablakavać publikacyju častki dakumentaŭ, pryśviečanych zabojstvu Kenedzi, pakolki jany mohuć nanieści škodu nacyjanalnaj biaśpiecy.
U 1992 hodzie Kanhres ZŠA pryniaŭ zakon ab tym, što materyjały pa zabojstvie Džona Kenedzi mohuć być rassakrečanyja praz 25 hadoŭ — u 2017 hodzie. Niekatoryja dakumenty byli dadadzienyja ŭ hety archiŭ praz šmat hadoŭ paśla «złačynstva stahodździa», jakoje adbyłosia 22 listapada 1963 hodu ŭ Dałasie, štat Techas.
Historyja zabojstva Džona Kenedzi źjaŭlajecca adnoj z samych zahadkavych u 20 stahodździ i da hetaha času vyklikaje šmat pytańniaŭ.
46-hadovy prezydent Kienedzi pamior na praciahu paŭhadziny. Śviedka, jaki bačyŭ snajpera, pieradaŭ jaho apisańnie palicyi. Na praciahu nastupnych hadziny z pałovaj padazravany Li Harvi Osvald zastreliŭ palicyjanta, jaki sprabavaŭ spynić jaho, schavaŭsia ŭ kinateatry, dzie ŭrešcie byŭ znojdzieny i aryštavany. Jon śćviardžaŭ palicyi, što nievinavaty, ale labaratornyja daśledavańni paćvierdzili, što heta jon stralaŭ z zabojčaj zbroi.
Praz dva dni, kali palicyja vyvodziła Osvalda z palicejskaha ŭčastka, padazravanaha zabojcu zastreliŭ Džek Rubi, uładalnik načnoha klubu z kryminalnymi suviaziami. Takim čynam Osvald nikoli nie paŭstaŭ pierad sudom.
Šmatlikija kamisii raśśledavali zabojstva Kenedzi i samaja viadomaja ŭradavaja kamisija Ŭorena ŭ 1964 hodzie pryjšła da vysnovy, što Osvald dziejničaŭ u adzinočku. Inšuju vysnovu zrabiŭ u 1978-m hodzie Specyjalny kamitet pa teraryzmu, zajaviŭšy, što heta była vierahodna zmova. Ale kamitet nia moh vyznačyć nivodnaha inšaha jaje ŭdzielnika akramia Osvalda.
Dla miljonaŭ amerykancaŭ siońnia pytańnie zastajecca adkrytym. Apytańnie, praviedzienaje sioleta infarmacyjnym ahienctvam AP pakazała, što bolš za 59 pracentaŭ amerykancaŭ ličać, što heta była zmova.
24-hadovy Li Harvi Osvald, były marski piachotnik ZŠA, u 1959-m hodzie emihravaŭ u SSSR, pravioŭ niekalki hadoŭ u Miensku i viarnuŭsia ŭ Złučanyja Štaty ŭ 1962-m.
