Biełaruska pra ŭrahan u Irłandyi: Kali piasočnicu adkinuła ŭ muža, my nie vychodzili z domu
Urahan «Afielija», jaki ŭ apošnija dni ščyruje na terytoryi Vialikabrytanii i Irłandyi, pakinuŭ sotni tysiač damoŭ biez elektryčnaści, paralizavaŭ dziejnaść transpartu i školnych ustanoŭ. Try čałavieki zahinuli ad jaho nastupstvaŭ.
Alesia Fiedarovič 12 hadoŭ žyvie ŭ Irłandyi, dzie pracuje pierakładčykam i viadzie kursy «Mova Nanova» ŭ Limieryku. Jana raskazała «Ninie» pra toje, jak miascovyja ŭłady i žychary sustrakali stychiju i jak zmahajucca z nastupstvami.
Alesia Fiedarovič.
«Miascovyja słužby dobra padrychtavalisia da mahčymaj katastrofy. U ŚMI było šmat papiaredžańniaŭ pra ŭrahan. Hałoŭnym pryncypam, jak zaŭsiody, staŭ «Health and safety» («Zdaroŭje i biaśpieka»). Ludziam rekamiendavali zastavacca ŭ pamiaškańniach, dzie b jany ni znachodzilisia, paŭsiul publikavali numar telefonu ekstrannaj dapamohi, — tłumačyć Alesia. — Była arhanizavanaja transparciroŭka biazdomnych u biaśpiečnyja miescy. U našym horadzie isnavała pahroza zatapleńnia (raka i raniej vychodziła ź bierahoŭ), tamu napiaredadni kala jaje ŭstalavali barjery. Niekatoryja ŭčastki darohi pierakryła palicyja. Bolšaść ustanoŭ była zakrytaja, roznyja mierapryjemstvy admienienyja, nie pracavaŭ hramadski transpart. Jašče ŭ niadzielu baćkoŭ prainfarmavali, što škoły nie buduć pracavać, a ŭ paniadziełak nas napatkaŭ samy strašny ŭrahan».
Muž Alesi zachacieŭ źniać na videa toje, što adbyvajecca navokał, ale ŭ jaho nie atrymałasia.
«U svaim dvary my adčuvali siabie ŭ adnosnaj biaśpiecy, bo ad navakolnaha śvietu jaho zachinaje kamiennaja 4-mietrovaja ściana. Tym nie mienš usiaho praź niekalki chvilin paryvam vietru ŭźniało vialikuju, dyjamietram bolš za mietr, piasočnicu i adkinuła prosta ŭ muža. U jaho vybiła telefon. Dobra, što sami my paškodžańniaŭ nie atrymali. Paśla hetaha vypadku my ŭžo nie ryzykavali vysoŭvacca z doma», — praciahvaje biełaruska.
Ciapier nastupstvy «Afielii» rasčyščajuć nie tolki avaryjnyja słužby, vajennyja, ale i prostyja ludzi, kožny prybiraje kala svajho domu.
Miascovych vielmi ŭskałychnuŭ toj fakt, što, nasupierak papiaredžańniam, padčas štormu adzinki vychodzili na vulicy. Tamu ŭradam razhladajecca varyjant uvieści kryminalnuju adkaznaść dla tych, chto padviarhaje ryzycy nie tolki svajo žyćcio, ale i zdaroŭje pradstaŭnikoŭ ratavalnych słužbaŭ.
Na vychodnyja ŭ Irłandyi znoŭ abiacajuć štorm, ale asnoŭnaja niebiaśpieka, pa mierkavańni mietearołahaŭ, minuła.
