Piać pryčyn, čamu nielha adpraŭlać u adstaŭku ministra abarony Andreja Raŭkova
Trahičnaja śmierć u Piečach 21-hadovaha pryzyŭnika Alaksandra Koržyča vyklikała niejmavierny rezanans u hramadstvie. U spravu daviałosia ŭmiešvacca Alaksandru Łukašenku.
Naprykład, były kiraŭnik Biełteleradyjokampanii Alaksandr Zimoŭski miarkuje, što ciapierašni ministr abarony budzie adpraŭleny ŭ adstaŭku, kab «abličča zachavaŭ» kiraŭnik krainy.
Mnohija hramadzianie dabivajucca adstaŭki Raŭkova. Na sajcie zvarot.by było sabrana bolš za 11 tysiač podpisaŭ za zvalnieńnie ministra.
Andrej Raŭkoŭ. Fota ria.ru.
Adnak ironija ŭ tym, što ŭ asobie Raŭkova my majem najlepšaha ministra abarony za časy isnavańnia niezaležnaści. Čamu jaho adstaŭka pryniasie bolš škody, čym karyści?
Raŭkoŭ zdolny vypravić situacyju lepš, čym chto inšy
Raŭkovu dastałasia nie samaja zajzdrosnaja spadčyna. Biełaruskaje vojska ŭ vialikaj stupieni zastajecca savieckim, z usimi vyciakajučymi, jak taja ž dziedaŭščyna. Nie pry Raŭkovu jana pačałasia, nie jon jaje prydumaŭ. Uspomnicie historyi svaich baćkaŭ, jakija raskazvali pra savieckuju dziedaŭščynu.
Čym bolš elitnyja vojski, tym ź mienšaj dziedaŭščynaj sutykajucca tam sałdaty. Bo trenirujuć svaje bajavyja ŭmieńni i navyki, a nie zajmajucca łajdactvam. Ale ŭ niekatorych čaściach sapraŭdy ličać za patrebnaje nie vučyć sałdataŭ «radzimu abaraniać», a rabić kvadratny śnieh i inšyja miehapatrebnyja rečy. Aby sałdat byŭ choć čymści zaniaty hod-paŭtara, a aficery spakojna sabie spali.
Biełaruskaje vojska maje padraździaleńni, jakija pa svajoj padrychtoŭcy mała čym adroźnivajucca ad najlepšych jeŭrapiejskich. Nie dziva, što mižnarodnymi arhanizacyjami naša vojska aceńvajecca pa mahutnaści jak 14-je ŭ Jeŭropie.
Raŭkoŭ padobny da čałavieka, jaki zdolny vučycca z pamyłak. Miechaničnaja zamiena jaho na inšaha čałavieka nie vypravić situacyju ŭ Piečach, a taksama inšych čaściach krainy. Rasčyščać hetyja aŭhijevy stajni pavinien sam ministr, pry jakim adbyłasia trahiedyja. Dla Raŭkova heta budzie sprava aficerskaha abaviazku, kab takoha bolš nie paŭtarałasia. I nichto bolš za jaho samoha ŭ hetym nie zacikaŭleny.
Navučyŭsia dumać katehoryjami Biełarusi
Ministr Raŭkoŭ — prabiełaruski. Jon nie davaŭ padstavaŭ u hetym zasumniavacca. Zdajecca, hetaha mała. Ale ŭspomnicie ministraŭ Kaścienku, Čumakova ci Žadobina. Z hetaha śpisu vybivajecca chiba što Leanid Malcaŭ.
«Ja nie toje što sa stracham, a sa škadavańniem hladzieŭ na tych aficeraŭ, jakija sychodzili ź biełaruskaha vojska ŭ Rasiju, va Ukrainu i inšyja krainy. Ščyra kažučy, było nie pa sabie», — śmiełyja słovy Raŭkova ŭ adnym ź intervju. Faktyčna my zajmieli ministra, jaki pierastaŭ dumać katehoryjami vialikaj dziaržavy SSSR, a navučyŭsia ŭsprymać siabie častkaj mienavita biełaruskaj armii.
Kaniečnie, u Minabarony zastajecca jašče dastatkova šmat ludziej, jakija dumajuć katehoryjami savieckaha minułaha. Naprykład, hałoŭny ideołah Alaksandr Hura ci pres-sakratar Uładzimir Makaraŭ. Toje, što Minabarony ihnaravała ci zamoŭčvała fakt śmierci Koržyča, jość ich niepasrednaja vina.
Raspracoŭščyk Vajennaj daktryny
Aficyjna Minsk zastajecca sajuźnikam Rasii, ale ŭ realnaści robicca šmat usiaho, kab papiaredzić ukrainski scenar. Andrej Raŭkoŭ byŭ adnym z tych, chto braŭ aktyŭny ŭdzieł u raspracoŭcy novaj Vajennaj daktryny Biełarusi.
«My, viadoma, nie sastupim svaju terytoryju i budziem vykarystoŭvać lubyja siły i srodki, u tym liku vajennyja, kab paźbiehnuć hetaha», — heta słovy Andreja Raŭkova. Da kaho jany nakiravanyja? Viadoma ž, nie da Litvy ci Polščy. Adrasat znachodzicca na ŭschod ad Biełarusi.
Praduhledžvajecca novaj Vajennaj daktrynaj i viadzieńnie hibrydnaj vajny. «Heta sumieś raznastajnych formaŭ i sposabaŭ dziejańnia, tradycyjnych i nietradycyjnych. A jakaja jana budzie — abstanoŭka pakaža… My praduhledžvajem vajennaj daktrynaj usio», — skazaŭ Raŭkoŭ.
Viadoma, hetaje rašeńnie prymaŭ nie ŭłasna jon, ale mienavita pry hetym ministru ŭ Biełarusi tak i nie źjaviłasia rasijskaja vajskovaja baza, jakaja ličyłasia ŭžo absalutna vyrašanaj spravaj.
Vyvučaje dośvied Ukrainy
Ministr Raŭkoŭ nie chavaje, što biełaruskaje vojska šmat čamu vučycca va ŭkrainskaha, jakoje supraćstaić rasijskaj ahresii.
«My vielmi aktyŭna vyvučajem toj dośvied, jaki atrymlivajuć uzbrojenyja siły Ukrainy na terytoryi svajoj krainy», — kazaŭ Raŭkoŭ. U jaho isnuje razumieńnie, adkul nam možna čakać niebiaśpieki. Voś jašče adna cytata ź siłavika:
«Mnohija dziaržavy ŭžyvajuć sposaby vyrašeńnia palityčnych pytańniaŭ z punktu hledžańnia raschistvańnia dziaržavy znutry. Sparadžajučy ŭnutrany ŭzbrojeny kanflikt, jany ŭžyvajuć ekanamičnyja, palityčnyja sposaby, potym užo — niejkija dyviersijnyja, terarystyčnyja, vajennyja. Raschistvajučy abstanoŭku, jany damahajucca taho, što adbyvajecca źmiena palityčnaj ułady, pierabudova dziaržavy. Heta ciapier stała praviłam u śviecie».
Moža być rašučym
Kali taho patrabujuć abstaviny, to Raŭkoŭ nie ciahnie kata za chvost. Uzhadvajecca, jak rasijskija prapahandysty stali zapuskać dezu, što ŭ biełaruskim vojsku pravodziłasia apytańnie miž aficerami ab abjadnańni Rasii i Biełarusi.
«Infarmacyja ab praviadzieńni siarod aficeraŭ biełaruskaj armii apytańnia na temu abjadnańnia Biełarusi i Rasii źjaŭlajecca vymysłam. Padobnyja apytańni supiarečać nacyjanalnym intaresam krainy i nikoli va Uzbrojenych Siłach nie pravodzilisia», — pa-biełarusku adkazaŭ Raŭkoŭ.
«Vykazanyja Vami sumnieńni nakont addanaści biełaruskich aficeraŭ svajoj Radzimie biespadstaŭnyja. Takija sumnieńni va ŭłasnaj armii nie słužać spravie harantavańnia biaśpieki suvierennaj niezaležnaj Biełarusi», — adkazvaŭ Raŭkoŭ Mikołu Statkieviču.
Ciapier Raŭkovu najpierš treba prademanstravać svaju rašučaść u vyrašeńni hetaj haniebnaj situacyi, jakaja ŭtvaryłasia ŭ Piečach, a taksama inšych čaściach krainy ź dziedaŭščynaj. Kali Raŭkovu heta ŭdasca zrabić, to jon moža zastacca ŭ historyi jak najlepšy ministr abarony časoŭ kiravańnia Łukašenki.
Čytajcie taksama: «Byłych kramloŭcaŭ nie byvaje». Piać faktaŭ pra ministra abarony Andreja Raŭkova
Apytanka
***
Na telehram-kanał «Našaj Nivy» možna padpisacca tut.
