U Baranavičach dziaciej-ilhotnikaŭ sadziać u školnych stałoŭkach za asobnyja stały
U toj čas, jak prezident vystupaje za toje, kab «dzieci ź siemjaŭ, jakija nie tak bahatyja siońnia, nie vyłučalisia», u baranavickich škołach dziaciej-ilhotnikaŭ sadziać u stałovaj za asobnymi stałami. Baćki aburanyja takim dzialeńniem i ličać jaho źnievažalnym, piša Intex-press.
- Maja dačka vučycca ŭ druhim kłasie i ŭ škole siłkujecca tolki na datacyju, jakuju vydzialaje dziaržava. Niadaŭna dačka spytała ŭ mianie, čamu ŭ stałovaj jana siadzić za asobnym stałom i nie moža siadzieć ź siabroŭkaj, i čamu joj nie dajuć prysmaki - syrok abo sok, jak inšym dzieciam, - źviarnułasia ŭ Intex-press šmatdzietnaja mama Natalla.
- Čamu dzicia sadziać za asobny stoł? Heta źnievažalna. Ja nie chaču, kab jano pačuvałasia izhojem i łaviła kasyja pozirki i naśmieški adnakłaśnikaŭ, - aburajecca žančyna.
Śviatłana, jakaja vychoŭvaje čaćviarych dziaciej, taksama niezadavolenaja, što «ilhotnikaŭ» kormiać asobna ad inšych vučniaŭ. Pa słovach Śviatłany, u škole baćkam prapanujuć unieści dadatkovuju sumu, ale nie ŭsie mohuć štomiesiac vyłučyć ź siamiejnaha biudžetu 8-9 rubloŭ.
- Chiba dzieci vinavatyja ŭ tym, što zarobku baćkoŭ nie chapaje na dapłaty? Jak rastłumačyć dziciaci, jakoje vučycca ŭ pačatkovaj škole, čamu jaho sadziać asobna i nie dajuć syrok ci jabłyk? Usie pavinny charčavacca adnolkava. Ale vyraŭnavać košt porcyj dla «ilhotnikaŭ» i tych, čyje baćki dapłačvajuć, možna i ŭ mienšy bok. Kormicie ŭsich navučencaŭ na datacyju, - ličyć Śviatłana.
Abtelefanavaŭšy haradskija škoły, Intex-press vyśvietliła, što ŭ roznych navučalnych ustanovach da pytańnia charčavańnia «ilhotnikaŭ» padychodziać pa-roznamu. U adnych škołach usich baćkoŭ pierakanaŭča prosiać dapłačvać 40 kapiejek za abied.
Praŭda, baćki, jakija admaŭlajucca dapłačvać, usio adno jość.
U inšych škołach pra mahčymaść dapłaty nie apaviaščajuć, ale, kali baćki źviernucca z takoj prośbaj, admović im, jak adznačyli ŭ adnoj sa škoł, nie zmohuć.
U lubym vypadku, dziaciej, čyje baćki nie ŭnosiać 40 kapiejek, sadziać u stałoŭcy za asobnyja stały.
- Heta robicca nie dla taho, kab niejak vyłučyć hetych dziaciej. Rabotniki stałoŭki pavinny padać porcyi sotni školnikaŭ i, kab nie źbicca i ničoha nie pierabłytać, «ilhotnikam» nakryvajuć na asobnych stałach. Možna pasadzić za adzin stoł, ale jak potym rastłumačyć dziciaci, čamu jamu nielha jeści apielsin, jaki tam lažyć, - tłumačać u adnoj z haradskich škoł.
