Čamu i pierad kim Łukašenka apraŭdvajecca za supracoŭnictva z Azierbajdžanam?
U Minsk z dvuchdzionnym vizitam prylacieŭ ministr abarony Azierbajdžana Zakir Hasanaŭ, kab sustrecca z Alaksandram Łukašenkam. «Nie chaču ni pierad kim apraŭdvacca, jaki charaktar nosić naša supracoŭnictva. Chaču tolki skazać adno, što našy adnosiny ni ŭ jakim razie nie parušajuć ni adnu mižnarodnuju damovu, ni adnu rezalucyju Rady biaśpieki i AAN u cełym», — zajaviŭ kiraŭnik Biełarusi.
Ilcham Alijeŭ i Alaksandar Łukašenka.
Čamu Łukašenka zahavaryŭ pra supracoŭnictva z Azierbajdžanam u takoj formie? Pierad kim jon musić apraŭdvacca?
Azierbajdžan znachodzicca ŭ stanie viałaciakučaj vajny z Armienijaj. Ni adzin z bakoŭ nie adstupaje ŭ pytańniach Karabacha. Azierbajdžan ličyć hetuju terytoryju akupavanaj. Armienija ž havoryć pra niezaležnaść Karabacha pad poŭnym pratektaratam Jerevana.
Apošnija maštabnyja sutyknieńni adbylisia litaralna letaś, ich nazvali «Krasavickaj vajnoj».
Armienija, jak i Biełaruś, źjaŭlajecca členam ADKB, vajskovaha abjadnańnia, jakoje łučyć u sabie šeść postsavieckich krain na čale z Rasijaj. U ADKB uvachodziać satelity Rasii. Tyja krainy, jakija ekanamična i palityčna majuć peŭnuju zaležnaść ad Maskvy.
Heta značyć, što Biełaruś — vajskovy partnior Armienii. Adnak na spravie ŭsio vyhladaje krychu inakš. Nieadnarazova ŭ ŚMI traplali źviestki, što Biełaruś viadzie handal zbrojaj z Azierbajdžanam.
U 2005 hodzie Biełaruś pradała ŭ Azierbajdžan 19 tankaŭ. U 2006 — 41 tank, u 2008 — try samachodnyja harmaty «Pivonia», u 2009 — piać šturmavikoŭ i dzieviać «Pivoniaŭ», u 2010 — tryccać harmat D-30.
Takim čynam, Biełaruś niepasredna ŭzbrojvaje krainu, jakaja vajuje suprać našaha sajuźnika pa ADKB.
Ciapier armianskija ŚMI pišuć pra toje, što Azierbajdžan rychtujecca kupić u Biełarusi sistemy załpavaha ahniu «Pałanezy», a taksama inšuju zbroju.
U Łukašenki i Alijeva-małodšaha zdaŭna skłalisia partniorskija adnosiny. U samy razhar biełaruska-rasijskaha kryzisu 2010 hoda mienavita Azierbajdžan pazyčaŭ Biełarusi hrošy, kab addać Rasii. Aficyjny Baku taksama dapamahaŭ Biełarusi z pastaŭkami vieniesuelskaj nafty.
U Armienii niervova hladziać na taki chaŭrus svajho vajskovaha «sajuźnika» z Azierbajdžanam. U 2016 hodzie pasła Biełarusi ŭ Jerevanie Ihara Nazaruka vyklikali ŭ MZS, kab toj daŭ tłumačeńni adnosna pazicyi Biełarusi pa Nahornamu Karabachu. Paźniej armianie vykazvali niezadavolenaść novaj biełaruskaj vajskovaj daktrynaj.
Možna čakać, što vizit Hasanava ŭ Minsk budzie vyklikać čarhovuju porcyju krytyki ŭ Armienii.
